ಪ್ರಧಾನಿ ಮೋದಿ ರಾಜಕೀಯ ಅಸಹಿಷ್ಣುತೆಯ ಅತಿದೊಡ್ಡ ಬಲಿಪಶು: ಮುಖ್ತಾರ್ ಅಬ್ಬಾಸ್ ನಖ್ವಿ

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಅವರು 'ರಾಜಕೀಯ ಅಸಹಿಷ್ಣುತೆಯ ಅತಿದೊಡ್ಡ ಬಲಿಪಶು'ವಾಗಿದ್ದಾರೆ ಎಂದು ಕೇಂದ್ರ ಸಚಿವ ಹಾಗೂ ಬಿಜೆಪಿ ನಾಯಕ ಮುಖ್ತಾರ್ ಅಬ್ಬಾಸ್ ನಖ್ವಿ ಹೇಳಿದ್ದಾರೆ.

ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಯನ್ನು ಅಧಿಕಾರದಿಂದ ಕೆಳಗಿಳಿಸುವಂತೆ ಕಲಾವಿದರ ಗುಂಪೊಂದು ಮತದಾರರಿಗೆ ಕರೆ ನೀಡಿರುವ ಹಿನ್ನೆಲೆಯಲ್ಲಿ ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವರು ಈ ಹೇಳಿಕೆ ನೀಡಿದ್ದಾರೆ.

ಇದೇ ವೇಳೆ ನೂರಾರು ಕಲಾವಿದರು ಹಾಗೂ ಬುದ್ಧಿಜೀವಿಗಳ ಮತ್ತೊಂದು ಗುಂಪು ಬಿಜೆಪಿ ಪರ ಧ್ವನಿಯೆತ್ತಿದೆ.

ಕಳೆದ 5 ವರ್ಷಗಳಲ್ಲಿ ಕೆಲವು ಸ್ವಘೋಷಿತ ಬುದ್ಧಿಜೀವಿಗಳು ಪ್ರಧಾನಿ ಮೋದಿ ವಿರುದ್ಧ ಅಮೆರಿಕ ಹಾಗೂ ಐರೋಪ್ಯ ಕೂಟಕ್ಕೂ ಪತ್ರ ಬರೆದಿದ್ದಾರೆ ಎಂದು ಸುದ್ದಿಗಾರರ ಜತೆ ಮಾತನಾಡುತ್ತ ಸಚಿವರು ಟೀಕಿಸಿದರು.

ಕೆಲವು ಕಾಂಗ್ರೆಸ್ ನಾಯಕರಂತೂ ಪಾಕಿಸ್ತಾನಕ್ಕೆ ತೆರಳಿ ಮೋದಿ ಪದಚ್ಯುತಿಗೆ ನೆರವಾಗುವಂತೆ ಕೋರಿಕೆ ಸಲ್ಲಿಸಿ ಬಂದಿದ್ದಾರೆ ಎಂದು ನಖ್ವಿ ಆರೋಪಿಸಿದರು.

ಪ್ರಧಾನಿ ಮೋದಿ ನೇತೃತ್ವದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬಂದ ಬಳಿಕ ಕೆಲವು ಸಾಮಾಜಿಕ ಕಾರ್ಯಕರ್ತರು ರಾಷ್ಟ್ರಪತಿಗಳಿಗೆ ಪತ್ರ ಬರೆದು ಸಂವಿಧಾನ ಅಪಾಯದಲ್ಲಿದೆ, ದೇಶದಲ್ಲಿ ಅಸಹಿಷ್ಣುತೆ ತಲೆ ಎತ್ತುತ್ತಿದೆ ಎಂದೆಲ್ಲ ದೂರಿ ಪತ್ರ ಬರೆದಿದ್ದರು ಎಂದು ನಖ್ವಿ ಹೇಳಿದರು.

'ಈ ಎಲ್ಲ ಸಂಚುಗಳ ಹೊರತಾಗಿಯೂ ಮೋದಿ ಅವರ ಮೇಲೆ ದೇಶದ ಜನತೆಯ ವಿಶ್ವಾಸ ದಿನೇ ದಿನೇ ವೃದ್ಧಿಸುತ್ತಿದೆ. ನಕಾರಾತ್ಮಕ ಪ್ರಚಾರಗಳ ಹೊರತಾಗಿಯೂ ಮೋದಿ ಅವರು ಕಠಿಣ ಪರಿಶ್ರಮದ ಮೂಲಕ ದೇಶವನ್ನು ಅಭಿವೃದ್ಧಿಯ ಕಡೆಗೆ ಒಯ್ಯುತ್ತಿದ್ದಾರೆ' ಎಂದು ನಖ್ವಿ ಹೇಳಿದರು.