ರಾಹುಲ್‌ ಸಂವಾದದಿಂದ ನೀತಿ ಸಂಹಿತೆ ಉಲ್ಲಂಘನೆ ಆಗಿಲ್ಲವೆಂದ ಆಯೋಗ

ಚೆನ್ನೈ: ಚುನಾವಣಾ ದಿನಾಂಕ ಘೋಷಣೆಯಾದ ದಿನವೇ ಚೆನ್ನೈಕಾಲೇಜೊಂದರ ವಿದ್ಯಾರ್ಥಿಗಳ ಜತೆ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ನಡೆಸಿದ್ದ ಸಂವಾದದಿಂದ ನೀತಿ ಸಂಹಿತೆ ಉಲ್ಲಂಘನೆಯಾಗಿಲ್ಲ ಎಂದು ಚುನಾವಣಾ ಆಯೋಗ ಸ್ಪಷ್ಟಪಡಿಸಿದೆ. ಮಾರ್ಚ್‌ 13ರಂದು ಚೆನ್ನೈನ ಸ್ಟೆಲ್ಲಾ ಮೇರಿಸ್‌ ಕಾಲೇಜಿನ ವಿದ್ಯಾರ್ಥಿನಿಯರ ಜತೆ ರಾಹುಲ್‌ ಗಾಂಧಿ ನಡೆಸಿದ್ದ ಸಂವಾದದ ವಿರುದ್ಧ ದಾಖಲಾಗಿದ್ದ ದೂರಿಗೆ ಸಂಬಂಧಿಸಿದಂತೆ ಸ್ಪಷ್ಟನೆ ನೀಡಿದ ತಮಿಳುನಾಡು ಮುಖ್ಯ ಚುನಾವಣಾ ಅಧಿಕಾರಿ ಸತ್ಯಬ್ರತಾ ಸಾಹೂ, ಆಯೋಗದ ಪೂರ್ವಾನುಮತಿ ಪಡೆದೇ ನಡೆಸಿರುವ ಆ ಕಾರ್ಯಕ್ರಮದಿಂದ ನೀತಿ ಸಂಹಿತೆ ಉಲ್ಲಂಘನೆ ಆಗಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ರಾಹುಲ್‌ ಅಂದು ಆಡಿದ ಮಾತುಗಳ ಬಗ್ಗೆಯೂ ವರದಿ ಪಡೆಯಲಾಗುತ್ತಿದೆ. ಅದರಲ್ಲೇನಾದರೂ ನೀತಿಸಂಹಿತೆಗೆ ಧಕ್ಕೆ ತರುವ ಅಂಶಗಳಿದ್ದರೆ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದರು. ಸಂವಾದದ ವೇಳೆ ರಾಹುಲ್‌ ಅವರು ಮಹಿಳೆಯರಿಗೆ ಶೇ.33 ಮೀಸಲು ಭರವಸೆ ನೀಡಿದ್ದು ನೀತಿ ಸಂಹಿತೆ ಉಲ್ಲಂಘನೆಯಾಗಿದೆ ಎಂದು ದೂರು ದಾಖಲಾಗಿತ್ತು.