ಬಹಿರಂಗ ಚರ್ಚೆಗೆ ಬನ್ನಿರೆಂದು ಆರ್‌ಜೆಡಿಗೆ ಕಿಶೋರ್‌ ಸವಾಲು

ಪಟನಾ: ಜೆಡಿಯು -ಆರ್‌ಜೆಡಿಯೊಂದಿಗೆ ವಿಲೀನ ಪ್ರಸ್ತಾವದ ಕುರಿತು ಲಾಲು ಪ್ರಸಾದ್‌ ಯಾದವ್‌ ಪತ್ನಿ ರಾಬ್ರಿದೇವಿ ಮಾಡಿರುವ ಆರೋಪಕ್ಕೆ ಪ್ರತಿಕ್ರಿಯಿಸಿರುವ ಪ್ರಶಾಂತ್‌ ಕಿಶೋರ್‌ ಅವರು, ''ಈ ಕುರಿತು ಮಾಧ್ಯಮಗಳ ಎದುರು ಬಹಿರಂಗ ಚರ್ಚೆಗೆ ಲಾಲು ಪ್ರಸಾದ್‌ ಯಾದವ್‌ ಬರಲಿ,'' ಎಂದು ಸವಾಲು ಹಾಕಿದ್ದಾರೆ. ''ರಾಬ್ರಿದೇವಿ ಆರೋಪ ಶುದ್ಧ ಸುಳ್ಳು. ಲಾಲು ಅವರು ನನ್ನ ಜತೆ ಬಹಿರಂಗ ಚರ್ಚೆಗೆ ಬರಲಿ. ಮಾಧ್ಯಮದ ಮುಂದೆ ಇಬ್ಬರೂ ಕುಳಿತು, ನಮ್ಮ ನಡುವೆ ನಡೆದ ಮಾತುಕತೆಯ ವಿವರಗಳೇನೆಂದು ಬಹಿರಂಗ ಪಡಿಸೋಣ. ಸತ್ಯ ಎಲ್ಲರಿಗೂ ಗೊತ್ತಾಗಲಿ,'' ಎಂದು ಟ್ವೀಟರ್‌ನಲ್ಲಿ ಸವಾಲು ಹಾಕಿದ್ದಾರೆ.

ಕಿಶೋರ್‌ ಸವಾಲಿಗೆ ಟ್ವೀಟ್‌ ಮೂಲಕವೇ ಪ್ರತಿಕ್ರಿಯಿಸಿರುವ ಆರ್‌ಜೆಡಿ, ''ಆ ರೀತಿ ಮಾಧ್ಯಮದ ಮುಂದೆ ಕುಳಿತು ಚರ್ಚಿಸಿದರೆ ನಿಮ್ಮ ಘನತೆಗೇ ಧಕ್ಕೆಯಾಗುವುದು ಗ್ಯಾರಂಟಿ. ಕಿಶೋರ್‌ ಬಂದು ಚರ್ಚಿಸಿರುವುದು ಹಗಲಿನಲ್ಲಿಯೇ ವಿನಾ ರಾತ್ರಿ ಹೊತ್ತಿನಲ್ಲಿ ಅಲ್ಲ. ಮಾತುಕತೆಯ ವಿವರ ಬಹಿರಂಗ ಪಡಿಸಿದರೆ, ಮಾನ ಹೋಗುವುದು ನಿಮ್ಮದೇ ವಿನಾ ನಮ್ಮದಲ್ಲ,'' ಎಂದು ಹೇಳಿದೆ.

ಪ್ರಧಾನಿ ಅಭ್ಯರ್ಥಿಯಾಗುವ ಇರಾದೆಯಿಂದ ಬಿಹಾರ ಸಿಎಂ ನಿತೀಶ್‌ಕುಮಾರ್‌ ಅವರು ಆರ್‌ಜೆಡಿ-ಜೆಡಿಯು ವಿಲೀನ ಪ್ರಸ್ತಾವವನ್ನು ಜೆಡಿಯು ಉಪಾಧ್ಯಕ್ಷ ಪ್ರಶಾಂತ್‌ ಕಿಶೋರ್‌ ಮೂಲಕ ಮಂಡಿಸಿದ್ದರು. ಈ ಬಗ್ಗೆ ಲಾಲು ಜತೆ ಐದು ಸಲ ಮಾತುಕತೆ ನಡೆದಿದೆ ಎಂದು ರಾಬ್ರಿದೇವಿ ಶುಕ್ರವಾರ ಆರೋಪ ಮಾಡಿದ್ದರು.