ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌, ಪತ್ನಿಯಿಂದ ಮತದಾನ

ಹೊಸದಿಲ್ಲಿ: ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಮತ್ತು ಅವರ ಪತ್ನಿ ಸವಿತಾ ಕೋವಿಂದ್‌ ಅವರು ಭಾನುವಾರ ದಿಲ್ಲಿಯಲ್ಲಿ ತಮ್ಮ ಮತ ಚಲಾಯಿಸಿದರು. ಕೋವಿಂದ್‌ ಅವರು ರಾಷ್ಟ್ರದ ಪ್ರಥಮ ಮಹಿಳೆ ಜತೆ ರಾಷ್ಟ್ರಪತಿ ಭವನ ಆವರಣದ ಬೂತ್‌ ನಂ.10ರಲ್ಲಿ ಬೆಳಗ್ಗೆ ಮತ ಚಲಾವಣೆ ಮಾಡಿದರು.

ಲೋಕಸಭೆ ಚುನಾವಣೆ 2019ರ 6ನೇ ಹಂತದ ಮತದಾನ ಪ್ರಕ್ರಿಯೆ ನಡೆಯುತ್ತಿದೆ. 59 ಲೋಕಸಭೆಯ 979 ಅಭ್ಯರ್ಥಿಗಳ ಹಣೆಬರಹವನ್ನು ಮತದಾರರು ಬರೆಯುತ್ತಿದ್ದಾರೆ.

ರಾಷ್ಟ್ರ ರಾಜಧಾನಿಯ 7 ಲೋಕಸಭಾ ಸ್ಥಾನಗಳಿಗೆ, ಉತ್ತರ ಪ್ರದೇಶದ 14 ಸ್ಥಾನಗಳಿಗೆ, ಹರಿಯಾಣದ 10 ಸ್ಥಾನಗಳಿಗೆ, ಬಿಹಾರ, ಮಧ್ಯಪ್ರದೇಶ ಮತ್ತು ಪಶ್ಚಿಮ ಬಂಗಾಳದ ತಲಾ 8 ಕ್ಷೇತ್ರಗಳಿಗೆ ಮತ್ತು ಜಾರ್ಖಂಡ್‌ನ 4 ಕ್ಷೇತ್ರಗಳಿಗೆ ಮತದಾನ ಪ್ರಕ್ರಿಯೆ ನಡೆಯುತ್ತಿದೆ.

ಆಜಂಗಢದಿಂದ ಮಾಜಿ ಸಿಎಂ ಅಖಿಲೇಶ್‌ ಯಾದವ್‌, ಭೋಪಾಲ್‌ನಿಂದ ದಿಗ್ವಿಜಯ್‌ ಸಿಂಗ್‌, ಸೋನಿಪತ್‌ನಿಂದ ಭೂಪಿಂದರ್‌ ಸಿಂಗ್‌ ಹೂಡಾ ಮತ್ತು ದಿಲ್ಲಿಯಿಂದ ಶೀಲಾ ದೀಕ್ಷಿತ್‌ ಮುಂತಾದ ಪ್ರಮುಖರು ಸ್ಪರ್ಧಿಸಿರುವ ಕ್ಷೇತ್ರಗಳಲ್ಲಿ ಚುನಾವಣೆ ನಡೆಯುತ್ತಿದೆ.