ಬಹಿರಂಗ ಪತ್ರದ ಮೂಲಕ ಬೆಂಬಲ ಕೋರಿದ ಪ್ರಿಯಾಂಕಾ

ಲಖನೌ: ಉತ್ತರ ಪ್ರದೇಶ ರಾಜಕಾರಣದ ಸುಧಾರಣೆಗಾಗಿ ತಮಗೆ ಸಾಥ್‌ ನೀಡುವಂತೆ ಕೋರಿ ಕಾಂಗ್ರೆಸ್‌ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಜನತೆಗೆ ಬಹಿರಂಗ ಪತ್ರ ಬರೆದಿದ್ದಾರೆ.

''ರಾಜ್ಯದಲ್ಲಿ ಮಹಿಳೆಯರು, ರೈತರು ಮತ್ತು ಕಾರ್ಮಿಕರು ಸಮಸ್ಯೆಗಳ ರಾಶಿಯಲ್ಲಿ ಸಿಲುಕಿದ್ದಾರೆ. ರಾಜಕಾರಣಿಗಳ ಜತೆ ತಮ್ಮ ನೋವು ಹಂಚಿಕೊಳ್ಳಲು ಯತ್ನಿಸುತ್ತಿದ್ದಾರೆ. ಆದರೆ, ಅವರಿಗೆ ಕಿವಿಗೊಡುವ ವ್ಯವಧಾನ ಆಡಳಿತ ಪಕ್ಷದವರಿಗಿಲ್ಲ,'' ಎಂದು ಹಿಂದಿ ಭಾಷೆಯಲ್ಲಿ ಬರೆದ ಪತ್ರದಲ್ಲಿ ವಿವರಿಸಿದ್ದಾರೆ.

''ನಿಮ್ಮ ನೋವುಗಳನ್ನು ಅನ್ಯರು ಕೇಳುತ್ತಾರೋ ಬಿಡುತ್ತಾರೋ ಬೇರೆ ಮಾತು, ಆದರೆ ನಾನು ನಿಮ್ಮೊಂದಿಗೆ ಇರುತ್ತೇನೆ. ನಿಮ್ಮ ಸಂಕಷ್ಟಗಳಿಗೆ ಕಿವಿಗೊಡುತ್ತೇನೆ. ಪರಿಹಾರದ ದಾರಿಗಳನ್ನು ಹುಡುಕುತ್ತೇನೆ,'' ಎಂದು ಭರವಸೆ ನೀಡಿದ್ದಾರೆ.

''ಜನರ ಜತೆ ಬೆರೆತು, ನೋವು-ನಲಿವಿಗೆ ಕಿವಿಗೊಡದ ಹೊರತು ಯಾವುದೇ ಸುಧಾರಣೆ ಸಾಧ್ಯವಾಗದು. ಈ ಸತ್ಯದ ಅರಿವು ಇಟ್ಟುಕೊಂಡೇ ನಿಮ್ಮೊಂದಿಗೆ ಬೆರೆಯುತ್ತೇನೆ. ಎಲ್ಲರು ಸೇರಿಯೇ ಸುಧಾರಣೆಯ ಮಾರ್ಗ ಹುಡುಕೋಣ,'' ಎಂದು ಅವರು ಮನವಿ ಮಾಡಿದ್ದಾರೆ.

ಚುನಾವಣೆ ಸಿದ್ಧತೆ ಕುರಿತು ಪಕ್ಷದ ಮುಖಂಡರ ಜತೆ ಚರ್ಚೆ ನಡೆಸಿದ ಬಳಿಕ ಪ್ರಿಯಾಂಕಾ, ಈ ಬಹಿರಂಗ ಪತ್ರ ಬಿಡುಗಡೆ ಮಾಡಿದ್ದಾರೆ. ಭಾನುವಾರ ಅವರು ಲಖನೌನಲ್ಲಿ ಕಾರ್ಯಕರ್ತರ ಜತೆ ಸಂವಾದ ನಡೆಸಿದ್ದಾರೆ. ಸೋಮವಾರದಿಂದ ಮೂರು ದಿನ ಪ್ರಯಾಗ್‌ರಾಜ್‌ನಿಂದ ವಾರಾಣಸಿವರೆಗೆ ಗಂಗಾ ನದಿಯಲ್ಲಿ 140 ಕಿ.ಮೀ ಪ್ರಯಾಣ ಕೈಗೊಂಡು, ನದಿ ತಟದಲ್ಲಿರುವ ಗ್ರಾಮಗಳ ಜನರನ್ನು ಭೇಟಿ ಮಾಡಲಿದ್ದಾರೆ.