ಉಳಿದವರ ಮಾನ ಕಳೆದ ಚೌಕೀದಾರ

ರಾಂಚಿ: ಸೇನೆ ಮೇಲಿನ ಪುಲ್ವಾಮಾ ಉಗ್ರ ದಾಳಿ ಬಳಿಕ ಮೌನ ವಹಿಸಿದ್ದ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರು ಶನಿವಾರ ಮತ್ತೆ ಪ್ರಧಾನಿ ನರೇಂದ್ರ ಮೋದಿ ಅವರ ವಿರುದ್ಧ ಆರೋಪಗಳ ಸುರಿಮಳೆ ಸುರಿಸಿದ್ದಾರೆ.

''ಭ್ರಷ್ಟಾಚಾರ ನಿರ್ಮೂಲನೆ, ಉದ್ಯೋಗ ಸೃಷ್ಟಿ ಮತ್ತು ರೈತರ ಸಂಕಷ್ಟ ನಿವಾರಣೆಯಂಥ ವಿಷಯಗಳಲ್ಲಿ ಪ್ರಧಾನಿ ಮೋದಿ ಶುದ್ಧ ಸುಳ್ಳು ಹೇಳುತ್ತಿದ್ದಾರೆ. ಅಚ್ಛೇ ದಿನ್‌ ಭರವಸೆ ನೀಡಿ ಅಧಿಕಾರಕ್ಕೆ ಬಂದ ಚೌಕೀದಾರ ಈಗ ಛೋರ್‌ ಆಗಿ ಬದಲಾಗಿದ್ದಾರೆ,'' ಎಂದು ರಾಹುಲ್‌ ಆರೋಪಿಸಿದರು. ಕಾಂಗ್ರೆಸ್‌ ರಾರ‍ಯಲಿ ಉದ್ದೇಶಿಸಿ ಮಾತನಾಡಿದ ರಾಹುಲ್‌, ''ಒಬ್ಬ ಚೌಕೀದಾರ ಈಗ ದೇಶದ ಉಳಿದ ಚೌಕೀದಾರರಿಗೆ ಅಪಕೀರ್ತಿ ತಂದಿದ್ದಾರೆ. ಆದರೆ, ಇವರನ್ನು ಹೊರತುಪಡಿಸಿ ಉಳಿದ ಚೌಕೀದಾರರೆಲ್ಲರೂ ಪ್ರಾಮಾಣಿಕರು. ಚೌಕೀದಾರ ಛೋರ್‌ ಹೈ ಎಂದು ಯಾರಾದರೂ ದೂಷಿಸಿದರೆ, ಉಳಿದ ಚೌಕೀದಾರರಿಗೆ ಆ ಛೋರ್‌ ಯಾರು ಎನ್ನುವುದು ಅರ್ಥವಾಗುತ್ತದೆ,'' ಎಂದು ವಾಗ್ದಾಳಿ ನಡೆಸಿದರು.

ರಫೇಲ್‌ ಪ್ರಸ್ತಾಪ: ಪುನಃ ರಫೇಲ್‌ ಯುದ್ಧ ವಿಮಾನ ಖರೀದಿ ಒಪ್ಪಂದ ಪ್ರಸ್ತಾಪಿಸಿದ ರಾಹುಲ್‌, ಈ ವ್ಯವಹಾರದ ಮೂಲಕ ವಾಯು ಪಡೆಯ 3000 ಕೋಟಿ ರೂ.ಗಳನ್ನು ದೋಚಿದ ಪ್ರಧಾನಿಯವರು ಎಚ್‌ಎಎಲ್‌ಗೆ ಸಿಗಬೇಕಾಗಿದ್ದ ಗುತ್ತಿಗೆ ತಪ್ಪಿಸಿ ಉದ್ಯಮಿ ಅನಿಲ್‌ ಅಂಬಾನಿ ಒಪ್ಪಿಸಿದರು ಎಂದು ಹಳೆ ಆರೋಪವನ್ನೇ ಪುನರುಚ್ಚರಿಸಿದರು.