‘ಮೋದಿಲೈ’ ನಿಘಂಟಿನಲ್ಲಿಲ್ಲ: ಆಕ್ಸ್‌ಫರ್ಡ್‌ ಸ್ಪಷ್ಟನೆ

ಹೊಸದಿಲ್ಲಿ: ಇಂಗ್ಲೀಷ್‌ ನಿಘಂಟಿಗೆ 'ಮೋದಿ ಲೈ'(Modilie) ಎಂಬ ಹೊಸ ಪದ ಸೇರ್ಪಡೆಯಾಗಿದೆ ಎಂದು ಟ್ವೀಟ್‌ ಮಾಡಿದ್ದ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಹಾಗೂ ಅವರ ಟ್ವಿಟ್ಟರ್‌ ಬೆಂಬಲಿಗರಿಗೆ ಖುದ್ದು ಆಕ್ಸ್‌ಫರ್ಡ್‌ ಡಿಕ್ಷನರಿ ಸಂಸ್ಥೆಯೇ ಸ್ಪಷ್ಟನೆ ನೀಡಿದೆ.

ಮೋದಿ ಲೈ ಎಂಬ ಪದ ನಮ್ಮ ನಿಘಂಟಿನಲ್ಲಿ ಇಲ್ಲ. ರಾಹುಲ್‌ ಗಾಂಧಿ ಸೇರಿದಂತೆ ಅನೇಕರು ಟ್ವೀಟ್‌ ಮಾಡುತ್ತಿರುವ ಇಂಗ್ಲಿಷ್‌ ನಿಘಂಟಿನ ಸ್ಕ್ರೀನ್‌ಶಾಟ್‌ ಶುದ್ಧ ಸುಳ್ಳು. ನಮ್ಮ ಯಾವುದೇ ನಿಘಂಟಿನಲ್ಲಿ ನಿಮಗೆ ಇಂತಹ ಪದ ಸಿಗುವುದಿಲ್ಲ ಎಂದು ಆಕ್ಸ್‌ಫಡ್‌ ಡಿಕ್ಷನರಿಯ ಅಧಿಕೃತ ಟ್ವಿಟ್ಟರ್‌ ಖಾತೆಯಲ್ಲಿ ತಿಳಿಸಲಾಗಿದೆ.

ಮೋದಿ ಲೈ ಎಂಬ ಹೊಸ ಪದ ಇಂಗ್ಲಿಷ್‌ ನಿಘಂಟಿನಲ್ಲಿ ಸೇರ್ಪಡೆಯಾಗಿದೆ. ಇದರ ಅರ್ಥ ಪದೇ ಪದೇ ಸತ್ಯವನ್ನು ಮಾರ್ಪಡಿಸುವುದು ಎಂದು ಸ್ಕ್ರೀನ್‌ಶಾಟ್‌ವೊಂದನ್ನು ರಾಹುಲ್‌ ಗಾಂಧಿ ಮಂಗಳವಾರ ತಮ್ಮ ಟ್ವಿಟ್ಟರ್‌ ಖಾತೆಯಲ್ಲಿ ಹಂಚಿಕೊಂಡಿದ್ದರು.