ರಫೇಲ್‌ ಪ್ರಕರಣಗಳ ಲಿಸ್ಟಿಂಗ್‌ ಗೊಂದಲ

ಹೊಸದಿಲ್ಲಿ: ರಫೇಲ್‌ ಒಪ್ಪಂದ ಕುರಿತ ತೀರ್ಪಿನ ಮರು ಪರಿಶೀಲನೆ ಕೋರಿಕೆ ಅರ್ಜಿ ಹಾಗೂ ತನ್ನ ತೀರ್ಪನ್ನು ತಪ್ಪಾಗಿ ಉಲ್ಲೇಖಿಸಿದ ರಾಹುಲ್‌ ಗಾಂಧಿ ವಿರುದ್ಧ ನ್ಯಾಯಾಂಗ ನಿಂದನೆ ಪ್ರಕರಣ ದಾಖಲಿಸುವ ಕುರಿತ ಮತ್ತೊಂದು ಅರ್ಜಿ ವಿಚಾರಣೆಯನ್ನು ಒಟ್ಟಾಗಿ ನಡೆಸುವ ಆದೇಶದ ವಿಷಯದಲ್ಲಿ 'ಸ್ವಲ್ಪ ಗೊಂದಲ' ಉಂಟಾಗಿದೆ ಎಂದು ಸುಪ್ರೀಂ ಕೋರ್ಟ್‌ ಸೋಮವಾರ ಹೇಳಿದೆ.
ಎರಡೂ ಪ್ರಕರಣಗಳ ಪ್ರತ್ಯೇಕ ಅರ್ಜಿಗಳ ವಿಚಾರಣೆಯನ್ನು ಒಟ್ಟಿಗೆ ನಡೆಸಲಾಗುವುದು ಎಂದು ಮುಖ್ಯ ನ್ಯಾಯಮೂರ್ತಿ ರಂಜನ್‌ ಗೊಗೊಯ್‌ ನೇತೃತ್ವದ ತ್ರಿಸದಸ್ಯ ಪೀಠ ಹೇಳಿದ್ದ ಹೊರತಾಗಿಯೂ ಸೋಮವಾರ ಮರು ಪರಿಶೀಲನೆ ಕೋರಿಕೆಯ ಅರ್ಜಿ ಜತೆ ನ್ಯಾಯಾಂಗ ನಿಂದನೆ ಪ್ರಕರಣದ ಅರ್ಜಿ ವಿಚಾರಣೆ ಪಟ್ಟಿಯಲ್ಲಿ ಸೇರಿರಲಿಲ್ಲ. ''ಎರಡೂ ವಿಷಯಗಳ ಕುರಿತು ಒಟ್ಟಿಗೆ ವಿಚಾರಣೆ ನಡೆಸಬೇಕೆಂದು ಮುಕ್ತ ಕೋರ್ಟ್‌ನಲ್ಲಿಯೇ ನಾವು ಆದೇಶ ನೀಡಿದ್ದೆವು. ಆದರೂ ಮೇ 6 ಮತ್ತು ಮೇ 10ರಂದು ಎರಡು ಪ್ರತ್ಯೇಕ ದಿನಾಂಕದಂದು ವಿಚಾರಣೆಗೆ ಪಟ್ಟಿ ಮಾಡಲಾಗಿದೆ. ಈ ರೀತಿ ಆಗಲು ಹೇಗೆ ಸಾಧ್ಯ?,'' ಎಂದು ನ್ಯಾಯಪೀಠ ಪ್ರಶ್ನಿಸಿತು. ಎರಡೂ ಪ್ರಕರಣಗಳ ವಿಚಾರಣೆಯನ್ನು ಮೇ 10ರಂದು ಒಟ್ಟಿಗೆ ನಡೆಸಲಾಗುವುದು ಎಂದು ಘೋಷಿಸಿ ವಿಚಾರಣೆ ಮುಂದೂಡಲಾಯಿತು.