ಸಿಕ್ಕಿಂನಲ್ಲಿ ಅತಂತ್ರ ವಿಧಾನಸಭೆ ಸಾಧ್ಯತೆ

ಗ್ಯಾಂಗ್ಟಕ್‌: ಈಶಾನ್ಯ ಭಾರತದ ಪುಟ್ಟ ರಾಜ್ಯ ಸಿಕ್ಕಿಂನಲ್ಲಿ ಆಡಳಿತಾರೂಢ ಸಿಕ್ಕಿಂ ಡೆಮಾಕ್ರಟಿಕ್‌ ಫ್ರಂಟ್‌ (ಎಸ್‌ಡಿಎಫ್‌) ಹಾಗೂ ಪ್ರತಿಪಕ್ಷ ಸಿಕ್ಕಿಂ ಕ್ರಾಂತಿಕಾರಿ ಮೋರ್ಚಾ (ಎಸ್‌ಕೆಎಂ) ನಡುವೆ ಭಾರಿ ಫೈಟ್‌ ಏರ್ಪಟ್ಟಿದ್ದು ಅತಂತ್ರ ವಿಧಾನಸಭೆ ಸೃಷ್ಟಿಯಾಗುವ ಸಾಧ್ಯತೆಗಳಿವೆ. ಸರಳ ಬಹುಮತಕ್ಕೆ 17 ಸ್ಥಾನಗಳು ಬೇಕಿವೆ.

32 ಸದಸ್ಯಬಲದ ವಿಧಾನಸಭೆಯಲ್ಲಿ ಎಸ್‌ಡಿಎಫ್‌ 17 ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿದ್ದರೆ, ಎಸ್‌ಕೆಎಂ 15 ಕ್ಷೇತ್ರಗಳಲ್ಲಿ ಜಯ ದಾಖಲಿಸುವ ಸುಳಿವು ನೀಡಿದೆ. ಎಸ್‌ಕೆಎಂ ಜತೆ ಮೈತ್ರಿ ಮಾಡಿಕೊಂಡು ಸಿಕ್ಕಿಂನಲ್ಲೂ ತನ್ನ ಪತಾಕೆ ಹಾರಿಸಲು ಬಿಜೆಪಿ ಸಿದ್ಧತೆ ನಡೆಸಿತ್ತಾದರೂ ಕೊನೆ ಕ್ಷಣದಲ್ಲಿ ದಿಢೀರ್‌ ನಿಲುವುದು ಬದಲಿಸಿತು. ಇತ್ತ ಸಿಕ್ಕಿಂ ಯುವಕರ ಪೋಸ್ಟರ್‌ ಬಾಯ್‌ ಎನಿಸಿರುವ ಪುಟ್ಬಾಲ್‌ ಆಟಗಾರ ಬೈಚುಂಗ್‌ ಭುಟಿಯಾ ಅವರ 'ಹಮ್ರಾವೋ ಸಿಕ್ಕಿಂ ಪಾರ್ಟಿ'(ಎಚ್‌ಎಸ್‌ಪಿ) ಪಕ್ಷವನ್ನು ಹಿಂಬಾಗಿಲ ಮೂಲಕ ಬೆಂಬಲಿಸಿ ಅಧಿಕಾರಕ್ಕೆ ಬರುವುದು ಬಿಜೆಪಿಯ ಪ್ಲ್ಯಾನ್‌ ಆಗಿತ್ತು. ಇದಕ್ಕಾಗಿ ಗೃಹ ಖಾತೆ ಸಹಾಯಕ ಸಚಿವ ಕಿರಣ್‌ ರಿಜಿಜು ಹಾಗೂ ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ‍್ಯದರ್ಶಿ ರಾಮ್‌ ಮಾಧವ್‌ ಅವರನ್ನು ಮುಂದೆ ಬಿಡಲಾಗಿತ್ತು. ಆದರೆ ಎಚ್‌ಎಸ್‌ಪಿ ಪಕ್ಷವೂ ಖಾತೆ ತೆರೆಯಲು ವಿಫಲವಾಗಿದೆ.

ಎಸ್‌ಡಿಎಫ್‌ ಮುಖ್ಯಸ್ಥ ಹಾಗೂ ಮುಖ್ಯಮಂತ್ರಿ ಪವನ್‌ ಚಾಮ್ಲಿಂಗ್‌ ಅವರು ಪೊಕಾಕ್‌ ಕಮರಾಂಗ್‌ ಕ್ಷೆತ್ರದಿಂದ 2,899 ಮತಗಳ ಅಂತರದೊಂದಿಗೆ ಪ್ರತಿಸ್ಪರ್ಧಿ ಎಸ್‌ಕೆಎಂನ ಖಾರ್ಕಾ ಬಹದ್ದೂರ್‌ ರಾಯ್‌ ಅವರನ್ನು ಸೋಲಿಸಿದ್ದಾರೆ. ನಾಮ್ಚಿ ಸಿಂತಿಹಾಂಗ್‌ ಕ್ಷೇತ್ರದಲ್ಲೂ ಇವರು ಗೆದ್ದಿದ್ದಾರೆ. 1994ರಿಂದಲೂ ಸಿಕ್ಕಿಂ ಮುಖ್ಯಮಂತ್ರಿಯಾಗಿದ್ದಾರೆ. ಕಳೆದ ವಿಧಾನಸಭೆ ಚುನಾವಣೆಯಲ್ಲಿ ಎಸ್‌ಡಿಎಫ್‌ 23 ಹಾಗೂ ಎಸ್‌ಕೆಎಂ 9 ಕ್ಷೇತ್ರಗಳಲ್ಲಿ ಗೆದ್ದಿತ್ತು.

ಸಿಕ್ಕಿಂ ಸದಸ್ಯ ಬಲ 32

ಮ್ಯಾಜಿಕ್‌ ನಂ: 17

ಎಸ್‌ಡಿಎಫ್‌: 17

ಎಸ್‌ಕೆಎಂ : 15

ಎಚ್‌ಎಸ್‌ಪಿ: 0