ಡಮ್ಮಿ ಮತಗಳಿಗೆ ಬದಲು ಅಸಲಿ ಮತಗಳೂ ಡಿಲೀಟ್‌?

ಹೊಸದಿಲ್ಲಿ: ಹಿಮಾಚಲ ಪ್ರದೇಶದಲ್ಲಿ ಕಳೆದ ಭಾನುವಾರ ನಡೆದ ಮತದಾನದ ವೇಳೆ ಡಮ್ಮಿ ಮತಗಳಿಗೆ ಬದಲಾಗಿ ಅಸಲಿ ಮತಗಳನ್ನು ಡಿಲೀಟ್‌ ಮಾಡುವ ಮೂಲಕ ತಪ್ಪೆಸಗಿದ 20 ಅಧಿಕಾರಿಗಳನ್ನು ಆಯೋಗ ಅಮಾನತುಗೊಳಿಸುವ ಸಾಧ್ಯತೆಯಿದೆ.
ಚುನಾವನೆ ವೇಳೆ ಐದು ಮತಗಟ್ಟೆಗಳಲ್ಲಿ ಚುನಾವಣಾ ಸಿಬ್ಬಂದಿ ಮತದಾನ ಆರಂಭಕ್ಕೆ ಮುನ್ನ ಇವಿಎಂಗಳ ಪರೀಕ್ಷೆಗೆಂದು ಮಾಡಲಾದ 'ಡಮ್ಮಿ ವೋಟಿಂಗ್‌' ಮತಗಳನ್ನು ಡಿಲೀಟ್‌ ಮಾಡಲು ಮರೆತುಹೋಗಿದ್ದರು. ಹೀಗಾಗಿ ಪೋಲಿಂಗ್‌ ಏಜೆಂಟ್‌ಗಳ ಉಪಸ್ಥಿತಿಯಲ್ಲಿ ಹೀಗೆ ಮಾಡಲಾದ ಸುಮಾರು 50 ಡಮ್ಮಿ ವೋಟುಗಳು ಅಂದು ಮತದಾರರು ಚಲಾಯಿಸಿದ ಅಸಲಿ ಮತಗಳ ಜತೆ ಸೇರಿಹೋಗಿದ್ದವು. ಬಳಿಕ ತಪ್ಪಿನ ಅರಿವಾದ ಸಿಬ್ಬಂದಿ ಕೆಲವೊಂದು ಮತಗಳನ್ನು ಡಿಲೀಟ್‌ ಮಾಡಿದ್ದಾರೆ. ಚುನಾವನಾ ವೀಕ್ಷಕರು ಇದನ್ನು ಗಮನಿಸಿ ದೂರು ದಾಖಲಿಸಿದ್ದಾರೆ. ಐವರು ಚುನಾವಣಾ ಅಧಿಕಾರಿಗಳು ಹಾಗೂ 15 ಚುನಾವಣಾ ಸಿಬ್ಬಂದಿ ವಿರುದ್ಧ ಆಯೋಗ ಕ್ರಮ ಜರುಗಿಸುವ ಸಾಧ್ಯತೆಯಿದೆ.