ಹೊಸ ಪಕ್ಷ ರಚನೆ ಘೋಷಣೆ: ತೇಜ್‌ಪ್ರತಾಪ್‌ಗೆ ಜೀವ ಬೆದರಿಕೆ

ಪಟನಾ: ರಾಷ್ಟ್ರೀಯ ಜನತಾದಳದಿಂದ ಹೊರಬಂದು 'ಲಾಲು-ರಾಬ್ರಿ ಮೋರ್ಚಾ' ಸ್ಥಾಪಿಸಿದ ನಂತರ ತಮಗೆ ಜೀವ ಬೆದರಿಕೆ ಕರೆಗಳು ಬರುತ್ತಿವೆ ಎಂದು ಲಾಲು ಪ್ರಸಾದ್‌ ಯಾದವ್‌ ಅವರ ಹಿರಿಯ ಪುತ್ರ ತೇಜ್‌ಪ್ರತಾಪ್‌ ಯಾದವ್‌ ತಿಳಿಸಿದ್ದಾರೆ.

ಆರ್‌ಜೆಡಿ ವಿದ್ಯಾರ್ಥಿ ವಿಭಾಗದ ಮುಖ್ಯಸ್ಥನೆಂದು ಹೇಳಿಕೊಂಡಿರುವ ವ್ಯಕ್ತಿ ತಮ್ಮ ಸಹಾಯಕ ಸೃಜನ್‌ ಸ್ವರಾಜ್‌ ಅವರಿಗೆ ಕರೆ ಮಾಡಿ, ತಮ್ಮಿಬ್ಬರನ್ನೂ ಮುಗಿಸುವ ಬೆದರಿಕೆ ಹಾಕಿದ್ದಾರೆ ಎಂದು ಪಟನಾದ ಸೆಕ್ರೆಟರಿಯೇಟ್‌ ಪೊಲೀಸ್‌ ಠಾಣೆಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

ಈ ಸಂಬಂಧ ಪ್ರಥಮ ವರ್ತಮಾನ ವರದಿ (ಎಫ್‌ಐಆರ್‌) ದಾಖಲಾಗಿದೆ. ಜೆಡಿಯು-ಆರ್‌ಜೆಡಿ ಸಮ್ಮಿಶ್ರ ಸರಕಾರದಲ್ಲಿ ಆರೋಗ್ಯ ಸಚಿವರಾಗಿ ಕೆಲಸ ಮಾಡಿದ್ದ ತೇಜ್‌ಪ್ರತಾಪ್‌ ಅವರು ಸರನ್‌ ಲೋಕಸಭಾ ಕ್ಷೇತ್ರದಲ್ಲಿ ಆರ್‌ಜೆಡಿ ಅಭ್ಯರ್ಥಿಯಾಗಿರುವ ತಮ್ಮ ಮಾವ ಚಂದ್ರಿಕಾ ರಾಯ್‌ ವಿರುದ್ಧ ಕಣಕ್ಕೆ ಇಳಿಯುವುದಾಗಿ ಘೋಷಿಸಿದ್ದಾರೆ.