ಟೈಮ್‌ ಬರಹದ ಹಿಂದೆ ಪಾಕಿಸ್ತಾನ ಹುನ್ನಾರವೆಂದು ಬಿಜೆಪಿ ಆರೋಪ

ಹೊಸದಿಲ್ಲಿ: ಅಮೆರಿಕದ 'ದಿ ಟೈಮ್‌' ನಿಯತಕಾಲಿಕೆ ಮುಖಪುಟದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಕುರಿತ ಲೇಖನಕ್ಕೆ 'ಭಾರತದ ಡಿವೈಡರ್‌ ಇನ್‌ ಚೀಫ್‌' ಎಂದು ಶೀರ್ಷಿಕೆ ನೀಡಿರುವ ಕುರಿತು ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಬಿಜೆಪಿ, ''ಅಂಕಣ ಬರೆದಿರುವುದು ಪಾಕಿಸ್ತಾನಿ ಪ್ರಜೆ. ಅವರ ಉದ್ದೇಶ ಮೋದಿಗೆ ಕುಖ್ಯಾತಿ ತರುವುದಾಗಿದೆ,'' ಎಂದು ಆರೋಪಿಸಿದೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಬಿಜೆಪಿ ವಕ್ತಾರ ಸಂಬಿತ್‌ ಪಾತ್ರಾ, ಭಾರತದ ವಿರುದ್ಧ ಪಾಕಿಸ್ತಾನ ಹೊಂದಿರುವ ಅಜೆಂಡಾವನ್ನು ಅಂಕಣ ಬಿಂಬಿಸುತ್ತಿದೆ. 2014ರ ಚುನಾವಣೆ ವೇಳೆ ಮತ್ತು ನಂತರದ ದಿನಗಳಲ್ಲಿ ಕೂಡ ಹಲವು ವಿದೇಶಿ ನಿಯತಕಾಲಿಕೆಗಳು ಮೋದಿ ವಿರುದ್ಧ ವರದಿಗಳನ್ನು ಪ್ರಕಟಿಸಿದವು. ನವಭಾರತ ನಿರ್ಮಿಸಲು ಪ್ರಧಾನಿ ಮೋದಿ ಸರಕಾರ ಜಾರಿಗೆ ತಂದ ಮಹತ್ತರ ಯೋಜನೆಗಳು ಇವರಿಗೆ ಕಾಣುವುದಿಲ್ಲ ಎಂದು ವಾಗ್ದಾಳಿ ನಡೆಸಿದರು.

ಭಾರತದ ಪತ್ರಕರ್ತೆ ತವ್ಲೀನ್‌ ಸಿಂಗ್‌ ಮತ್ತು ಪಾಕಿಸ್ತಾನದ ಉದ್ಯಮಿ ಹಾಗೂ ರಾಜಕಾರಣಿ ದಿ.ಸಲ್ಮಾನ್‌ ತಾಸೀರ್‌ ಅವರ ಪುತ್ರ ಆತೀಶ್‌ ತಾಸೀರ್‌ ಬರೆದಿರುವ ಲೇಖನ ಈಗ ವಿವಾದದ ಕೇಂದ್ರಬಿಂದುವಾಗಿದೆ.

ಮೆತ್ತಗಾದ ತವ್ಲೀನ್‌: ಪುತ್ರನ ಲೇಖನ ದೇಶದಲ್ಲಿ ಭಾರಿ ವಿವಾದಕ್ಕೆ ಕಾರಣವಾದ ಬೆನ್ನಲ್ಲಿಯೇ ತವ್ಲೀನ್‌ ಸಿಂಗ್‌ ತಮ್ಮ ಟ್ವಿಟ್ಟರ್‌ ಖಾತೆಯಲ್ಲಿ ಮೋದಿ ಪರವಾದ ಟೈಮ್‌ ನಿಯತಕಾಲಿಕೆಯ ಮತ್ತೊಂದು ಲೇಖನವನ್ನು ಹಂಚಿಕೊಂಡಿದ್ದಾರೆ. ಭಾರತದ ಆರ್ಥಿಕ ಸುಧಾರಣೆಗೆ ಮೋದಿ ಅತ್ಯುತ್ತಮ ಆಯ್ಕೆ ಎಂಬ ಶೀರ್ಷಿಕೆಯ ಲೇಖನ ಇದಾಗಿದೆ.