ರಾಹುಲ್‌ ಗಾಂಧಿ ಇಮೇಜ್‌ 2014ಕ್ಕಿಂತ ಕಳಪೆಯಾಗಿದೆ: ವಿಜಯ್‌ ರೂಪಾನಿ

ಮುಂಬಯಿ: ಸಾಮಾಜಿಕ ತಾಣಗಳಲ್ಲಿ ರಾಹುಲ್‌ ಗಾಂಧಿ ಅವರ 'ಅಪ್ರಬುದ್ಧತೆ' ಬಗ್ಗೆ ಟ್ರೋಲ್‌ಗಳಾಗುವುದನ್ನು ನೋಡಿದಾಗ ಅಯ್ಯೋ ಎನಿಸುತ್ತದೆ. ರಾಹುಲ್‌ ಇಮೇಜ್‌ 2014ಕ್ಕಿಂತ ಕಳಪೆಯಾಗಿದೆ ಎಂದು ಗುಜರಾತ್‌ ಸಿಎಂ ವಿಜಯ್‌ ರೂಪಾನಿ ಹೇಳಿದ್ದಾರೆ.

ಪಿಟಿಐ ಜತೆಗಿನ ಸಂದರ್ಶನದಲ್ಲಿ ಮಾತನಾಡಿದ ರೂಪಾನಿ 2014ರಲ್ಲಿ ಮೋದಿ ಅಲೆಯಿತ್ತು. ಈ ವರ್ಷ ಮೋದಿ ಸುನಾಮಿಯೇ ಇದೆ. ನರೇಂದ್ರ ಮೋದಿ ಅವರು ಪ್ರಧಾನಿಯಾದ ಬಳಿಕ ಭಾರತದ ಜನತೆ ಸರಿಯಾದ ವ್ಯಕ್ತಿಯನ್ನು ಆರಿಸಿದ್ದೇವೆ ಎಂದುಕೊಂಡಿದ್ದಾರೆ ಎಂದು ರೂಪಾನಿ ಅಭಿಪ್ರಾಯ ವ್ಯಕ್ತ ಪಡಿಸಿದ್ದಾರೆ.

ರಾಹುಲ್‌ ಗಾಂಧಿ ಅವರನ್ನು ಸಾಮಾಜಿಕ ತಾಣಗಳಲ್ಲಿ ಅವರ ಅಪ್ರಬುದ್ಧತೆ ಬಗ್ಗೆ ಟ್ರೋಲ್‌ಗಳನ್ನು ಗಮನಿಸಿದಾಗ ಕನಿಕರವಾಗುತ್ತದೆ. ರಾಹುಲ್‌ ಇಮೇಜ್‌ ಗಂಭೀರ ರಾಜಕಾರಣಿ ಅಲ್ಲ ಎಂಬುದಾಗಿದೆ. ಸಂಸತ್ತಿನಲ್ಲಿ ಕಣ್ಣು ಮಿಟುಕಿಸುವ ಮೂಲಕ ಅದು ಸ್ಪಷ್ಟವಾಗಿದೆ. ಮೋದಿಜೀ ಅವರನ್ನು ಅಪ್ಪಿಕೊಳ್ಳುವ ಮೂಲಕವೂ ತಾನೊಬ್ಬ ಗಂಭೀರ ರಾಜಕಾರಣಿ ಅಲ್ಲ ಎಂಬುದನ್ನು ಪ್ರೂವ್‌ ಮಾಡಿದ್ದಾರೆ. ಇದೆಲ್ಲವೂ ರಾಹುಲ್‌ ಅವರ ಅಪ್ರಬುದ್ಧತೆಯನ್ನು ಸೂಚಿಸುತ್ತದೆ. ರಾಹುಲ್‌ ಇಮೇಜ್‌ 2014ಕ್ಕಿಂತಲೂ ಕಳಪೆಯಾಗಿದೆ ಎಂದು ರೂಪಾನಿ ಹೇಳಿದ್ದಾರೆ.

ಹಲವು ವರ್ಷಗಳ ನಂತರ ನಂಬಿಕಾರ್ಹ ಮತ್ತು ಪಾರದರ್ಶಕ ಆಡಳಿತವನ್ನು ಅನುಭವಿಸುತ್ತಿದ್ದಾರೆ. ಪುಲ್ವಾಮ ದಾಳಿ ನಂತರ ಮೋದಿ ನಿರ್ಣಾಯಕ ಪ್ರಧಾನಿ ಮತ್ತು ಸ್ಥಿರ ಆಡಳಿತ ನೀಡುತ್ತಾರೆ ಎಂಬುದು ಗೊತ್ತಾಗಿದೆ. ಜನ ಮೋದಿ ಹೆಸರಿಗಷ್ಟೇ ಮತ ಚಲಾಯಿಸುತ್ತಾರೆ ಎಂದು ಸಂದರ್ಶನದಲ್ಲಿ ರೂಪಾನಿ ತಿಳಿಸಿದ್ದಾರೆ.