ಇವಿಎಂ ಮತ ಎಣಿಕೆ ಬಳಿಕ ವಿವಿಪ್ಯಾಟ್‌ ತಾಳೆ

ಹೊಸದಿಲ್ಲಿ: ಮೇ 23ರಂದು ನಡೆಯಲಿರುವ ಲೋಕಸಭಾ ಚುನಾವಣೆಯ ಮತ ಎಣಿಕೆ ವೇಳೆ ಮೊದಲು ವಿವಿಪ್ಯಾಟ್‌ಗಳನ್ನು ತಾಳೆ ನೋಡಿ, ಬಳಿಕ ಮತಯಂತ್ರಗಳಲ್ಲಿ ಕೌಂಟಿಂಗ್‌ ಆರಂಭಿಸಬೇಕೆಂಬ ಪ್ರತಿಪಕ್ಷಗಳ ಬೇಡಿಕೆಯನ್ನು ಚುನಾವಣಾ ಆಯೋಗ ಬುಧವಾರ ತಿರಸ್ಕರಿಸಿದೆ.

ಇದುವರೆಗಿನ ನಿಯಮದಂತೆಯೇ ಮೊದಲು ಇವಿಎಂಗಳಲ್ಲಿ ಮತ ಎಣಿಕೆ ಮಾಡಲಾಗುವುದು. ಕೊನೆಯಲ್ಲಿ ಆಯಾ ಲೋಕಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿರುವ ಪ್ರತಿ ವಿಧಾನಸಭಾ ಕ್ಷೇತ್ರದ 5 ವಿವಿಪ್ಯಾಟ್‌ಗಳನ್ನು ಯಾದೃಶ್ಚಿಕವಾಗಿ ಆರಿಸಿ, ಅವುಗಳನ್ನು ಮತಯಂತ್ರಗಳೊಂದಿಗೆ ತಾಳೆ ನೋಡಲಾಗುವುದು ಎಂದು ಆಯೋಗ ಸ್ಪಷ್ಟಪಡಿಸಿದೆ.

ಇದೇ ವೇಳೆ, ವಿಳಂಬ ತಪ್ಪಿಸಲು ಅಂಚೆ ಮತಗಳನ್ನೂ ಇವಿಎಂಗಳ ಮತ ಎಣಿಕೆ ವೇಳೆಯೇ ಲೆಕ್ಕ ಮಾಡಲು ಚುನಾವಣಾ ಆಯೋಗ ನಿರ್ಧರಿಸಿದೆ ಎಂದು ಮೂಲಗಳು ತಿಳಿಸಿವೆ. ಇದುವರೆಗೂ ಸೇವಾ ಸಿಬ್ಬಂದಿಯು ಅಂಚೆ ಮೂಲಕ ಮಾಡಿದ ಮತಗಳನ್ನು ಇವಿಎಂನಲ್ಲಿ ಮತ ಎಣಿಕೆಗೂ ಮುನ್ನವೆ ಲೆಕ್ಕ ಹಾಕಲಾಗುತ್ತಿತ್ತು. ಸೇನಾ ಸಿಬ್ಬಂದಿ, ಕೇಂದ್ರೀಯ ಪೊಲೀಸ್‌ ಪಡೆ ಸಿಬ್ಬಂದಿ, ರಾಜ್ಯ ಪೊಲೀಸ್‌ ಸಿಬ್ಬಂದಿ, ವಿದೇಶಗಳಲ್ಲಿರುವ ಭಾರತೀಯ ರಾಯಭಾರಿಗಳು ಮತ್ತು ಅವರ ಸಹಾಯಕ ಸಿಬ್ಬಂದಿ ಸೇರಿದಂತೆ ಒಟ್ಟು 18 ಲಕ್ಷ ಮಂದಿ ನೋಂದಾಯಿತ ಅಂಚೆ ಮತದಾರರಿದ್ದು, ಈ ಪೈಕಿ 16.49 ಲಕ್ಷ ಮಂದಿ ಮೇ 17ರಂದು ಸಂಬಂಧಪಟ್ಟ ಚುನಾವಣಾ ಅಧಿಕಾರಿಗೆ ತಮ್ಮ ಮತಗಳನ್ನು ಅಂಚೆ ಮೂಲಕ ಕಳುಹಿಸಿದ್ದಾರೆ. ಸೇವೆಯ ಮೇಲೆ ತಮ್ಮ ಕ್ಷೇತ್ರದಿಂದ ಬೇರೆಡೆ ನಿಯೋಜನೆಗೊಂಡ ಹಿನ್ನೆಲೆಯಲ್ಲಿ ಇವರಿಗೆ ಅಂಚೆ ಮೂಲಕ ಮತದಾನ ಅವಕಾಶ ಮಾಡಿಕೊಡಲಾಗುತ್ತದೆ.

ನಿರ್ದಿಷ್ಟ ಕಾರಣ ಗೊತ್ತಿಲ್ಲ: ಮಂಗಳವಾರ ದಿಲ್ಲಿಯಲ್ಲಿ ಚುನಾವಣಾ ಆಯೋಗವನ್ನು ಭೇಟಿ ಮಾಡಿದ್ದ ಪ್ರತಿಪಕ್ಷಗಳು ವಿವಿಪ್ಯಾಟ್‌ಗಳನ್ನು ಮೊದಲು ತಾಳೆ ನೋಡಬೇಕು. ಒಂದು ವೇಳೆ ವ್ಯತ್ಯಾಸ ಕಂಡು ಬಂದರೆ ವಿಧಾನಸಭಾ ವ್ಯಾಪ್ತಿಯ ಎಲ್ಲಾ ವಿವಿಪ್ಯಾಟ್‌ಗಳನ್ನೂ ತಾಳೆ ನೋಡಬೇಕು ಎಂಬ ಬೇಡಿಕೆಯನ್ನು ಮುಂದಿಟ್ಟಿದ್ದವು. ಈ ಬಗ್ಗೆ ಪರಿಶೀಲನೆ ನಡೆಸಿ, ಬುಧವಾರ ತೀರ್ಮಾನ ಪ್ರಕಟಿಸುವುದಾಗಿ ಆಯೋಗ ಹೇಳಿತ್ತು. ಆದರೆ, ಬುಧವಾರ ಪ್ರತಿಪಕ್ಷಗಳ ಬೇಡಿಕೆಯನ್ನು ಆಯೋಗ ತಿರಸ್ಕರಿಸಿದೆಯಾದರೂ ಇದಕ್ಕೆ ನಿರ್ದಿಷ್ಟ ಕಾರಣವನ್ನು ತಿಳಿಸಿಲ್ಲ.