ವೈರಲ್ ವೀಡಿಯೋ: ಪ್ರಧಾನಿ ಮೋದಿ 'ಡಿವೈಡರ್ ಇನ್ ಚೀಫ್' ಎಂದ ಟೈಮ್ ಮ್ಯಾಗಜಿನ್‌ಗೆ ತಪರಾಕಿ

ಬೆಂಗಳೂರು: ಪ್ರಧಾನಿ ನರೇಂದ್ರ ಮೋದಿ ಅವರನ್ನು 'ಡಿವೈಡರ್ ಇನ್ ಚೀಫ್' (ಪ್ರಧಾನ ವಿಭಜಕ) ಎಂದು ಕರೆದ ಅಮೆರಿಕದ ಟೈಮ್ ಮ್ಯಾಗಜಿನ್‌ ಪತ್ರಿಕೆಯನ್ನು 'ಆ್ಯನ್‌ ಆ್ಯಂಗ್ರಿ ಇಂಡಿಯನ್' ಯುವಕ ಅತುಲ್ ಮಿಶ್ರಾ ತೀವ್ರ ತರಾಟೆಗೆ ತೆಗೆದುಕೊಂಡಿರುವ ಯೂಟ್ಯೂಬ್ ವೀಡಿಯೋ ಒಂದು ವೈರಲ್ ಆಗಿದೆ.

ಮೇ 11ರಂದು ಪೋಸ್ಟ್ ಆಗಿರುವ ಈ ವೀಡಿಯೋ ಒಂದೇ ದಿನದಲ್ಲಿ 19 ಸಾವಿರಕ್ಕೂ ಅಧಿಕ ಲೈಕ್‌ಗಳನ್ನು ಪಡೆದಿದ್ದು, 1,66,865 ವೀಕ್ಷಣೆ ಪಡೆದಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವ ದೇಶದ ಚುನಾಯಿತ ಬಲಿಷ್ಠ ನಾಯಕ. ಅಂಥವರನ್ನು ಡಿವೈಡರ್ ಇನ್ ಚೀಫ್ ಎಂದು ಕರೆಯಲು ನಿಮಗೆಷ್ಟು ಧಾರ್ಷ್ಟ್ಯ ಎಂದು ಪ್ರಶ್ನಿರುವ ಯುವಕ, ನಿಮ್ಮ ಟೈಮ್ ಮ್ಯಾಗಜಿನ್‌ಗೆ ಇಲ್ಲಿ ಕವಡೆ ಕಿಮ್ಮತ್ತೂ ಇಲ್ಲ ಎಂದು ವಾಗ್ದಾಳಿ ನಡೆಸಿದ್ದಾರೆ.


ಹಲವು ಪ್ರತಿಷ್ಠಿತ ಅಂತಾರಾಷ್ಟ್ರೀಯ ಪ್ರಶಸ್ತಿಗಳ ಗೌರವಕ್ಕೆ ಪಾತ್ರರಾದ ನಮ್ಮ ಪ್ರಧಾನಿಯವರ ಬಗ್ಗೆ ಬರೆಯಬೇಕಾದರೆ ಸಾಕಷ್ಟು ಅಧ್ಯಯನ ನಡೆಸಿರಬೇಕು. ಆದರೆ ನಿಮ್ಮ ವರದಿಗಾರ ಅದೇನು ಓದಿಕೊಂಡು ಬರೆದಿದ್ದಾನೋ ಗೊತ್ತಿಲ್ಲ. ಪ್ರಧಾನಿ ಮೋದಿ ಅವರ ನಾಯಕತ್ವದಲ್ಲಿ ದೇಶ ಹಿಂದೆಂದಿಗಿಂತಲೂ ಬಲಿಷ್ಠವಾಗಿದೆ, ಒಗ್ಗಟ್ಟಾಗಿದೆ. ಅವರ ವಿರುದ್ಧ ಯಾವನೇ ಅಲ್ಪಸಂಖ್ಯಾತ ಸಮುದಾಯದ ವ್ಯಕ್ತಿ ಒಂದೇ ಒಂದು ದೂರನ್ನೂ ಸಲ್ಲಿಸಿಲ್ಲ. ಹೀಗಿರುವಾಗ ಅವರನ್ನು ಡಿವೈಡರ್ ಇನ್‌ ಚೀಫ್‌ ಎಂದು ಯಾವ ಆಧಾರದಲ್ಲಿ ಕರೆಯುತ್ತೀರಿ? ಎಂದು ಯುವಕ ತೀವ್ರ ತರಾಟೆಗೆ ತೆಗೆದುಕೊಂಡಿದ್ದಾರೆ.

ಪ್ರಧಾನಿ ಮೋದಿ ಅವರ ಆಡಳಿತದಲ್ಲಿ ಜಾರಿಗೊಳಿಸಿದ ಹಲವು ಸಾಮಾಜಿಕ, ಆರ್ಥಿಕ ಯೋಜನೆಗಳು ಜನಸಾಮಾನ್ಯರ ಬದುಕಿನ ದಿಕ್ಕನ್ನೇ ಬದಲಾಯಿಸಿ ಸುಧಾರಣೆಯತ್ತ ಕರೆದೊಯ್ದಿದೆ. ಜನ್‌ಧನ್ ಯೋಜನೆ, ಆಯುಷ್ಮಾನ್ ಭಾರತ್‌ ಯೋಜನೆ, ಡಿಜಿಟಲ್ ಇಂಡಿಯಾ, ಉಜ್ವಲಾ ಯೋಜನೆಯಂತಹ ಹತ್ತು ಹಲವು ಯೋಜನೆಗಳು ಭಾರತದ ಚಹರೆಯನ್ನೇ ಬದಲಿಸಿವೆ.

ಪ್ರಧಾನಿ ಮೋದಿ ಅವರ ನಾಯಕತ್ವದಲ್ಲೇ ಭಾರತದ 'ಯೋಗ'ವನ್ನು ಜಗತ್ತಿನಾದ್ಯಂತ ಒಪ್ಪಿಕೊಂಡು ವಿಶ್ವ ಯೋಗ ದಿನ ಆಚರಿಸಲಾಗುತ್ತಿದೆ. ಇವೆಲ್ಲದರ ಅರಿವು ನಿಮಗಿದೆಯೇ? ಪ್ರಧಾನಿ ಮೋದಿ ಭಾರತೀಯರನ್ನು ಒಗ್ಗೂಡಿಸಿರುವುದಷ್ಟೇ ಅಲ್ಲ, ಅವರ ಶತ್ರುಗಳನ್ನೂ ಒಗ್ಗೂಡಿಸಿದ್ದಾರೆ. ಇದೂ ಸಹ ನಿಮಗೆ ತಿಳಿದಿರಬೇಕಾಗಿತ್ತು ಎಂದು 'ಆ್ಯನ್‌ ಆ್ಯಂಗ್ರಿ ಇಂಡಿಯನ್' ಟೈಮ್‌ ಮ್ಯಾಗಜಿನ್‌ಗೆ ತರಾಟೆಗೆ ತೆಗೆದುಕೊಂಡಿದ್ದಾರೆ.