ಕಾಂಗ್ರೆಸ್‌ ಬೆಂಬಲ ಪಡೆಯಲು ಫೆಡರಲ್‌ ಫ್ರಂಟ್‌ ಸಿದ್ಧ, ಆದರೆ ಪ್ರಧಾನಿ ಸ್ಥಾನ ಬಿಟ್ಟು ಕೊಡಲ್ಲ: ಟಿಆರ್‌ಎಸ್‌

ಹೈದರಾಬಾದ್‌: ಲೋಕಸಭಾ ಚುನಾವಣೆ ಫಲಿತಾಂಶ ನಂತರ ಸರಕಾರ ರಚನೆ ಮಾಡುವ ಅವಕಾಶ ದೊರೆತರೆ ಪ್ರಾದೇಶಿಕ ಪಕ್ಷಗಳ ಉದ್ದೇಶಿತ ಫೆಡರಲ್‌ ಫ್ರಂಟ್. ಕಾಂಗ್ರೆಸ್‌ ಪಕ್ಷದ ಬೆಂಬಲ ಪಡೆಯಲು ಸಿದ್ಧ. ಆದರೆ ಕಾಂಗ್ರೆಸ್‌ಗೆ ಡ್ರೈವಿಂಗ್‌ ಸ್ಥಾನ ನೀಡುವುದಿಲ್ಲ ಎಂದು ತೆಲಂಗಾಣ ರಾಷ್ಟ್ರ ಸಮಿತಿ ತಿಳಿಸಿದೆ.

ಕಾಂಗ್ರೆಸ್‌ ಮತ್ತು ಬಿಜೆಪಿಯೇತರ ಒಕ್ಕೂಟ ರಚಿಸಲು ತೆಲಂಗಾಣ ರಾಷ್ಟ್ರ ಸಮಿತಿ ಅಧ್ಯಕ್ಷ ಕೆ. ಚಂದ್ರಶೇಖರ್‌ ರಾವ್‌ ಪ್ರಯತ್ನಿಸುತ್ತಿದ್ದಾರೆ. ಈ ನಿಟ್ಟಿನಲ್ಲಿ ಇತ್ತಿಚೆಗೆ ಪ್ರಾದೇಶಿಕ ಪಕ್ಷಗಳ ನಾಯಕರ ಜತೆ ಚರ್ಚೆ ನಡೆಸಿದ್ದಾರೆ.

ಅಗತ್ಯ ಬಿದ್ದರೆ ಕಾಂಗ್ರೆಸ್‌ ಬೆಂಬಲ ಪಡೆಯಲು ನಾವು ಸಿದ್ಧರಿದ್ದೇವೆ. ಆದರೆ ರಾಹುಲ್‌ ಗಾಂಧಿ ಈ ಬಗ್ಗೆ ಸ್ಪಷ್ಟ ನಿಲುವು ತೆಗೆದುಕೊಳ್ಳಬೇಕು ಎಂದು ಪಕ್ಷದ ವಕ್ತಾರ ಅಬೀದ್‌ ರಸೂಲ್ ಖಾನ್‌ ತಿಳಿಸಿದ್ದಾರೆ.

ಎಲ್ಲ ನಿರ್ಧಾರವನ್ನು ಮೇ 23ರ ನಂತರವಷ್ಟೇ ಕೈಗೊಳ್ಳಲಾಗುವುದು. ಫೆಡರಲ್‌ ಫ್ರಂಟ್‌ ನಾಯಕರೇ ಚುಕ್ಕಾಣಿ ಹಿಡಿಯಲಿದ್ದಾರೆ. ಯಾವುದೇ ಕಾರಣಕ್ಕೂ ಕಾಂಗ್ರೆಸ್‌ಗೆ ಅವಕಾಶ ಕೊಡಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಬಿಜೆಪಿ ಜತೆ ಯಾವುದೇ ಕಾರಣಕ್ಕೂ ಕೈ ಜೋಡಿಸುವುದಿಲ್ಲ ಎಂದು ಟಿಆರ್‌ಎಸ್‌ ಸ್ಪಷ್ಟಪಡಿಸಿದೆ.