ಅಮಿತ್‌ ಶಾಗೆ ಕೇಂದ್ರ ಸಚಿವ ಸ್ಥಾನ, ಬಿಜೆಪಿ ಅಧ್ಯಕ್ಷಗಿರಿ ಯಾರಿಗೆ?

ಹೊಸದಿಲ್ಲಿ: ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಗೆ ಅಭೂತಪೂರ್ವ ಯಶಸ್ಸು ತಂದುಕೊಟ್ಟ ಕೀರ್ತಿ ಅಮಿತ್‌ ಶಾ ಅವರಿಗೆ ಸಲ್ಲುತ್ತದೆ.

ಈಗ ಕೇಳಿಬಂದಿರುವ ಊಹಾಪೋಹಗಳೆಂದರೆ ನರೇಂದ್ರ ಮೋದಿ 2.0 ಆಡಳಿತದಲ್ಲಿ ಅಮಿತ್‌ ಭಾಯಿ ಸಚಿವ ಸ್ಥಾನ ಪಡೆಯುವುದು ಬಹುತೇಕ ಗ್ಯಾರಂಟಿಯಾಗಿದೆ. ಅಮಿತ್‌ ಶಾಗೆ ಪ್ರಮುಖ ಖಾತೆ ಕೂಡ ಸಿಗಲಿದೆ.

ಅಮಿತ್‌ ಭಾಯಿ ಸರಕಾರದಲ್ಲಿ ಭಾಗಿಯಾದರೆ ಪಕ್ಷದ ಚುಕ್ಕಾಣಿ ಯಾರು ಹಿಡಿಯಲಿದ್ದಾರೆ ಎಂಬುದು ಮಿಲಿಯನ್‌ ಡಾಲರ್‌ ಪ್ರಶ್ನೆಯಾಗಿದೆ.

ಕಳೆದ ಕೆಲವು ವರ್ಷಗಳಿಂದ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರಾಗಿರುವ ಅಮಿತ್‌ ಶಾ ಹಲವಾರು ಕ್ರಿಯಾಶೀಲ ಯೋಜನೆಗಳನ್ನು ಜಾರಿಗೆ ತಂದು ಇಡೀ ದೇಶದಲ್ಲಿ ಕಮಲ ಅರಳುವಂತೆ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಅಮಿತ್‌ ಭಾಯಿ, ನರೇಂದ್ರ ಮೋದಿ ಜೋಡಿ ಮಾಡಿರುವ ಮೋಡಿಗೆ ಇಡೀ ದೇಶವೇ ತಲೆದೂಗಿದೆ.

2014ರಲ್ಲಿ ರಾಜನಾಥ್‌ ಸಿಂಗ್‌ ಅಧ್ಯಕ್ಷ ಪಟ್ಟದಿಂದ ಕೆಳಗಿಳಿದ ನಂತರ ಅಮಿತ್‌ ಶಾ ಉತ್ತರದಾಯಿತ್ವ ತೆಗೆದುಕೊಂಡರು. ಅಲ್ಲಿಂದ ಇಲ್ಲಿಯವರೆಗೂ ಬಿಜೆಪಿಯ ಜೈತ್ರಯಾತ್ರೆ ಮುಂದುವರಿದಿದೆ.

ಈ ಬಾರಿ ಅಮಿತ್‌ ಶಾ ಸಚಿವರಾಗುವುದು ಬಹುತೇಖ ಖಚಿವಾಗಿದೆ. ಇದರಿಂದ ಸಹಜವಾಗಿ ಅವರ ಬದಲು ಯಾರ ಎಂಬ ಪ್ರಶ್ನೆ ಉದ್ಭವವಾಗಿದೆ. ಮೂಲಗಳ ಪ್ರಕಾರ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರಾಗಿ ಜೆಪಿ ನಡ್ಡಾ ಅಥವಾ ಧರ್ಮೇಂದ್ರ ಪ್ರಧಾನ್‌ ನೇಮಕವಾಗು ಸಾಧ್ಯತೆ ಇದೆ.

ನಿತಿನ್‌ ಗಡ್ಕರಿ ಕೂಡ ಟವೆಲ್‌ ಹಾಕಲು ಮುಂದಾಗಿದ್ದಾರೆ. ಆದರೆ ಮೋದಿ ಮತ್ತು ಟೀಮ್‌ ಈ ಪ್ರಸ್ತಾವಕ್ಕೆ ಹಸಿರು ನಿಶಾನೆ ತೋರುವುದು ಕಷ್ಟಸಾಧ್ಯ.

ಎರಡನೇ ಪ್ರಧಾನಿ ಹುದ್ದೆಯನ್ನು ಮೋದಿ ಇದೇ ಮೇ 30ರಂದು ಗುರುವಾರ ಅಲಂಕರಿಸಲಿದ್ದಾರೆ. ಅಂದೇ ಬಹುತೇಕ ಕೆಲವು ಪ್ರಮುಖ ಸಚಿವರು ಪ್ರಮಾಣ ಸ್ವೀಕರಿಸುವ ಸಾಧ್ಯತೆ ಇದೆ. ಆಗ ಎಲ್ಲ ಪ್ರಶ್ನೆಗಳಿಗೆ ಉತ್ತರ ದೊರೆಯಲಿದೆ.

ಅಂದು ನಡೆಯಲಿರುವ ಪ್ರಮಾಣ ವಚನ ಸಮಾರಂಭಕ್ಕೆ ಈಗಾಗಲೇ ಭಾರಿ ಸಿದ್ಧತೆ ನಡೆದಿವೆ. ಜತೆಗೆ ಬಹುತೇಕ ಎಲ್ಲ ನೆರೆ ಹೊರೆ ದೇಶಗಳ ಮುಖ್ಯಸ್ಥರನ್ನು ಆಹ್ವಾನಿಸಲಾಗಿದೆ. ಪಾಕಿಸ್ತಾನದ ಪ್ರಧಾನ ಮಂತ್ರಿ ಇಮ್ರಾನ್ ಖಾನ್‌ಗೆ ಆಹ್ವಾನ ನೀಡಿಲ್ಲ.