ಇಪ್ಪತ್ತು ವರ್ಷಗಳ ದಾಂಪತ್ಯಕ್ಕೆ ಗುಡ್‍ಬೈ ಹೇಳಿದ ರಾಮ್‍ಪಾಲ್

ಬಾಲಿವುಡ್‍ನ ಮತ್ತೊಂದು ತಾರಾ ಜೋಡಿಯ ದಾಂಪತ್ಯ ಜೀವನ ಮುರಿದುಬಿದ್ದಿದೆ. ನಟ ಅರ್ಜುನ್ ರಾಮ್‍ಪಾಲ್ (45) ತನ್ನ ಪತ್ನಿ ಮೆಹರ್ ಜೆಸಿಯಾ (47) ರಿಂದ ಬೇರ್ಪಡುತ್ತಿರುವುದಾಗಿ ಹೇಳಿದ್ದಾರೆ. ಇವರಿಬ್ಬರು ತಮ್ಮ 20 ವರ್ಷಗಳ ಸುದೀರ್ಘ ದಾಂಪತ್ಯ ಜೀವನಕ್ಕೆ ಗುಡ್‌ಬೈ ಹೇಳುತ್ತಿದ್ದಾರೆ.

ಮೂರು ವರ್ಷಗಳಿಂದ ಇವರಿಬ್ಬರೂ ವಿಚ್ಛೇದನ ಸುದ್ದಿ ಬಾಲಿವುಡ್ ವಲಯದಲ್ಲಿ ಹರಿದಾಡುತ್ತಿತ್ತು. ಆದರೆ ಇವರಿಬ್ಬರೂ ಒಟ್ಟಿಗೆ ಕಾಣಿಸಿಕೊಂಡು ಅಚ್ಚರಿ ಮೂಡಿಸಿದ್ದರು. ಈಗ ತಾವಿಬ್ಬರೂ ವಿಚ್ಛೇದನ ಪಡೆಯುತ್ತಿರುವುದಾಗಿ ಜಂಟಿ ಹೇಳಿಕೆ ನೀಡುವ ಮೂಲಕ ಚಕಿತಗೊಳಿಸಿದ್ದಾರೆ.

"20 ವರ್ಷಗಳ ಸುಂದರ ಪಯಣದ ಬಳಿಕ ಪರಸ್ಪರ ಒಪ್ಪಿಗೆ ಮೇರೆಗೆ ನಾವು ಬೇರ್ಪಡಲು ನಿರ್ಧರಿಸಿದ್ದೇವೆ. ಇದರ ಹಿಂದೆ ವಿಶೇಷವಾದ ಕಾರಣವೇನು ಇಲ್ಲ. ಬೇರೆ ಬೇರೆ ದಾರಿಯಲ್ಲಿ ಸಾಗಬೇಕೆಂದಿದ್ದೇವೆ. ಆದಕಾರಣ ಈ ನಿರ್ಧಾರ ಬಂದಿದ್ದೇವೆ. ಹೊಸ ಪ್ರಯಾಣ ಆರಂಭವಿಸಬೇಕು ಎಂದುಕೊಂಡಿದ್ದರೂ ನಮಗೆ ಬೇಕಾದವರಿಗಾಗಿ ನಮ್ಮ ನಡುವಿನ ಸಂಬಂಧ ಮುಂದುರೆಯುತ್ತಿದೆ" ಎಂದಿದ್ದಾರೆ.

ತನಗಿಂತಲೂ ವಯಸ್ಸಿನಲ್ಲಿ ಹಿರಿಯರಾದ ಮಾಡೆಲ್ ಮೆಹರ್ ಜೆಸಿಯಾರನ್ನು 1998ರಲ್ಲಿ ಅರ್ಜುನ್ ವರಿಸಿದ್ದರು. ಇವರ ದಾಂಪತ್ಯದ ಫಲವಾಗಿ ಮಹಿಕಾ (16), ಮೈರಾ (13) ಎಂಬ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ. ಮಾಡೆಲ್ ಆಗಿ ಕರಿಯರ್ ಆರಂಭಿಸಿದ ಅರ್ಜುನ್ ರಾಮ್‍ಪಾಲ್, ಪ್ಯಾರ್ ಇಷ್ಕ್ ಔರ್ ಮೆಹಬ್ಬತ್ (2001) ಚಿತ್ರದ ಮೂಲಕ ಬಾಲಿವುಡ್‌ಗೆ ಅಡಿಯಿಟ್ಟರು.

ಬಳಿಕ ದಿವಾನಪನ್, ಆಂಖೆ, ದಿಲ್ ಹೈ ತುಮ್ಹಾರಾ, ದಿಲ್ ಕಾ ರಿಷ್ತಾ ಮುಂತಾದ ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ಡಾನ್, ಓಂ ಶಾಂತಿ ಓಂ, ರಾಕ್ ಆನ್, ಹೌಸ್‍ಫುಲ್, ರಾಜ್‍ನೀತಿ, ರಾ ವನ್, ಹೀರೋಯಿನ್ ಚಿತ್ರಗಳಲ್ಲಿನ ಅರ್ಜುನ್ ಅಭಿನಯ ಉತ್ತಮ ಪ್ರಶಂಸೆಗೆ ಪಾತ್ರವಾಗಿದೆ. ಇತ್ತೀಚೆಗೆ ’ಡಾಡಿ’ ಚಿತ್ರದ ಮೂಲಕ ಪ್ರೇಕ್ಷಕರ ಮುಂದೆ ಬಂದ ಅರ್ಜುನ್ ಶೀಘ್ರದಲ್ಲೇ ’ಪಲ್ತಾನ್’ ಮೂಲಕ ತೆರೆಗೆ ಬರುತ್ತಿದ್ದಾರೆ.