'ಮೇಡಂ ಪ್ಲೀಸ್ ಸಲ್ಮಾನ್‌ರನ್ನು ಮದುವೆ ಮಾಡಿಕೊಳ್ಳಿ' ಎಂದ ಅಭಿಮಾನಿ

ಬಾಲಿವುಡ್ ನಟ ಸಲ್ಮಾನ್ ಖಾನ್, ಕತ್ರಿನಾ ಕೈಫ್ ನಡುವೆ ಒಳ್ಳೆಯ ಆತ್ಮೀಯತೆ ಇದೆ. ಕತ್ರಿನಾಗೆ ಏನೇ ಸಮಸ್ಯೆ ಬಂದರೂ ಮೊದಲು ಸ್ಪಂದಿಸುವುದು ಸಲ್ಮಾನ್ ಖಾನ್ ಎಂಬುದರಲ್ಲಿ ಯಾವುದೇ ಅನುಮಾನ ಇಲ್ಲ. ಕರಿಯರ್ ಪರವಾಗಿ ಸಲ್ಮಾನ್ ಸಾಕಷ್ಟು ಸಹಾಯ ಮಾಡಿದ್ದಾರೆ. ಇವರಿಬ್ಬರೂ ಡೇಟಿಂಗ್‌ನಲ್ಲಿ ಇದ್ದಾರೆ ಎಂಬ ಸುದ್ದಿಯೂ ಇದೆ. ಆದರೆ ಇತ್ತೀಚೆಗೆ ಕತ್ರಿನಾ ಒಂದು ಕಾರ್ಯಕ್ರಮಕ್ಕೆ ಹೋದಾಗ "ಸಲ್ಮಾನ್‌ರನ್ನು ಮದುವೆಯಾಗಬಹುದಲ್ಲವೇ..?" ಎಂದು ಆಕೆಯನ್ನು ಯಾವುದೇ ಅಳುಕಿಲ್ಲದೆ ಅಭಿಮಾನಿಯೊಬ್ಬ ಕೇಳಿದ್ದ.

ಇದಕ್ಕೆ ಕತ್ರಿನಾ ನೀಡಿರುವ ಉತ್ತರ ಸಹ ಈಗ ವೈರಲ್ ಆಗಿದೆ. ಇತ್ತೀಚೆಗೆ ಕತ್ರಿನಾ ಫೇಮಸ್ಲಿ ಫಿಲಂಫೇರ್ ಎಂಬ ಕಾರ್ಯಕ್ರಮಕ್ಕೆ ಅತಿಥಿಯಾಗಿ ಹೋಗಿದ್ದರು. ಆ ಕಾರ್ಯಕ್ರಮಕ್ಕೆ ಆಗಮಿಸಿದ ಅಭಿಮಾನಿಗಳಲ್ಲಿ ಓರ್ವ ಸಲ್ಮಾನ್, ಕತ್ರಿನಾ ಜೋಡಿಯಾಗಿ ನಡೆಸುತ್ತಿರುವ 'ಭಾರತ್' ಪೋಸ್ಟರ್ ಹಿಡಿದು ಅದರ ಮೇಲೆ "ಪ್ಲೀಸ್ ಮೇಡಂ, ಸಲ್ಮಾನ್ ನಿಮಗೆ ಪರ್‌ಫೆಕ್ಟ್. ಅವರನ್ನು ಮದುವೆ ಮಾಡಿಕೊಳ್ಳಿ" ಎಂದು ಬರೆದಿದ್ದ.

ಆ ಪೋಸ್ಟರನ್ನು ನೋಡಿದ ಕತ್ರಿನಾ "ಮುಗುಳ್ನಗುತ್ತಾ... ನಿನ್ನ ಪ್ರಶ್ನೆಗೆ ಇದೇ ನನ್ನ ಉತ್ತರ" ಎಂಬಂತೆ ನೋಡಿದ್ದರು. ಆದರೆ ಕತ್ರಿನಾ ರಿಯಾಕ್ಷನ್ ಗ್ರೀನ್ ಸಿಗ್ನಲ್ ಕೊಟ್ಟಂತೆಯೇ? ಅಲ್ಲವೇ? ಎಂಬುದು ಅರ್ಥವಾಗದೆ ಈಗ ಅಭಿಮಾನಿಗಳು ಇನ್ನಷ್ಟು ಗೊಂದಲಕ್ಕೊಳಗಾಗಿದ್ದಾರೆ.

ಕತ್ರಿನಾ, ಸಲ್ಮಾನ್ ಖಾನ್ ಜೊತೆಯಾಗಿ ಮೈನೆ ಪ್ಯಾರ್ ಕ್ಯೂ ಕಿಯಾ, ಏಕ್ ಥಾ ಟೈಗರ್, ಟೈಗರ್ ಜಿಂದಾ ಹೈ ಚಿತ್ರಗಳಲ್ಲಿ ತೆರೆಹಂಚಿಕೊಂಡಿದ್ದಾರೆ. ಸದ್ಯಕ್ಕೆ ಭಾರತ್ ಸಿನಿಮಾ ಕೊನೆಯ ಹಂತದ ಚಿತ್ರೀಕರಣದಲ್ಲಿದೆ. ಅಲಿ ಅಬ್ಬಸ್ ಜಾಫರ್ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಸಿನಿಮಾ ಇದು. ರಂಜಾನ್ ಹಬ್ಬಕ್ಕೆ ಸಿನಿಮಾ ತೆರೆಗೆ ಬರಲಿದೆ. ಈ ಚಿತ್ರದಲ್ಲಿ ದಿಶಾ ಪಟಾನಿ, ಸುನೀಲ್ ಗ್ರೋವರ್ ಹಾಗೂ ಜಾಕಿ ಶ್ರಾಫ್‌ ಸಹ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಅಲಿ ಅಬ್ಬಾಸ್ ಝಪರ್ ಈ ಚಿತ್ರದ ನಿರ್ದೇಶಕರಾಗಿದ್ದು, ಜೂನ್ 5 ರಂದು ಚಿತ್ರ ಬಿಡುಗಡೆಯಾಗಲಿದೆ.

ನಟಿ ಕತ್ರೀನಾ ಕೈಫ್‌ಗೆ ಮಾತ್ರ ಸೆಲೆಬ್ರಿಟಿಗಳ ಮದುವೆಗೆ ಹಾಜರಾಗಲು ಇಷ್ಟವಿಲ್ಲ ಅನ್ಸುತ್ತೆ. ಇತ್ತೀಚೆಗೆ ಫಿಲಂಫೇರ್‌ ಮನರಂಜನಾ ಮಾಧ್ಯಮಕ್ಕೆ ಸಂದರ್ಶನ ನೀಡಿದ ಕತ್ರೀನಾ ಕೈಫ್‌, ಸೆಲೆಬ್ರಿಟಿಗಳು ಮದುವೆಯಾಗುತ್ತಿರುವುದರ ಬಗ್ಗೆ ಹೇಳಿದ್ದೇನು ಗೊತ್ತಾ? '' ನನಗೆ ಅನಿಸಿದ್ದೇನೆಂದರೆ ಎಲ್ಲರೂ ಮದುವೆಯಾಗುತ್ತಿದ್ದಾರೆ. ಕಾಯಿರಿ.. ನನ್ನನ್ನು ಹಿಂದೆ ಬಿಟ್ಟು ಹೋಗಬೇಡಿ'' ಎಂದು ಬಾಲಿವುಡ್‌ ನಟಿ ಕತ್ರೀನಾ ಕೈಫ್‌ ಪ್ರತಿಕ್ರಿಯೆ ನೀಡಿದ್ದಾಳೆ. ಈ ಪ್ರತಿಕ್ರಿಯೆಗೆ ಹಲವರು ಅಚ್ಚರಿಗೊಳಗಾಗಿದ್ದಾರೆ.