ಚೀನಾದಲ್ಲಿ ಮೋದಿಗಿಂತ ಆಮಿರ್‌ಗೆ ಹೆಚ್ಚು ಫಾಲೋವರ್ಸ್!

ಚೀನಾದಲ್ಲಿ ಬಾಲಿವುಡ್ ಸಿನಿಮಾ ದಂಗಲ್ ಭಾರಿ ಯಶಸ್ಸು ಗಳಿಸಿದ್ದು, ನಟ ಆಮಿರ್ ಖಾನ್ ಪ್ರಸಿದ್ಧಿ ಚೀನಾದಲ್ಲಿ ವ್ಯಾಪಕವಾಗಿ ವಿಸ್ತರಿಸಿದೆ. ಚೀನಾದ ಸಾಮಾಜಿಕ ತಾಣದಲ್ಲಿ ಕೇವಲ ಒಂದೇ ತಿಂಗಳ ಅವಧಿಯಲ್ಲಿ ಆಮಿರ್‌ ಖಾನ್ 5 ಲಕ್ಷಕ್ಕೂ ಹೆಚ್ಚು ಫಾಲೋವರ್‌ಗಳನ್ನು ಸಂಪಾದಿಸಿದ್ದಾರೆ. ಫಾಲೋವರ್ಸ್‌ ಸಂಖ್ಯೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಹಿಂದಿಕ್ಕಿದ್ದಾರೆ.

ಚೀನಾದ ಅತ್ಯಂತ ಜನಪ್ರಿಯ ಮೈಕ್ರೋ ಬ್ಲಾಗಿಂಗ್ ವೆಬ್‌ಸೈಟ್‍‌ನ ವೈಬೊ ಅಕೌಂಟ್‌ ಹೊಂದಿರುವ 51 ವರ್ಷದ ಆಮಿರ್ ಖಾನ್ 5,86,591 ಫಾಲೋವರ್‌ಗಳನ್ನು ಹೊಂದಿದ್ದಾರೆ. ಆಮಿರ್ ಖಾತೆ, ಕಳೆದ ತಿಂಗಳಷ್ಟೇ ಅಂದರೆ ಚೀನಾದಲ್ಲಿ ದಂಗಲ್ ಬಿಡುಗಡೆ ಸಂದರ್ಭ ಆಮೆರ್ ಹಾನ್(Amier Han) ಎಂಬ ಹೆಸರಿನಲ್ಲಿ ತೆರೆಯಲಾಗಿದೆ.

ಮೋದಿ @ವೈಬೊ
2015ರಲ್ಲಿ, ಅಂದರೆ ಚೀನಾಗೆ ಭೇಟಿ ನೀಡುವ ಮೊದಲು ಪ್ರಧಾನಿ ಮೋದಿ ಸಾಮಾಜಿಕ ತಾಣ ವೈಬೊದಲ್ಲಿ ಖಾತೆ ತೆರೆದಿದ್ದರು. ಆಗ ಮೋದಿಗೆ 1.69 ಲಕ್ಷ ಚೀನಿ ಫಾಲೋವರ್‌ಗಳಿದ್ದರು. ಈಗಲೂ ಈ ಖಾತೆಯನ್ನು ಬಳಕೆ ಮಾಡುತ್ತಿರುವ ಮೋದಿ, ಚೀನಾಗೆ ಸಂಬಂಧಿಸಿದ ಕಾರ್ಯಕ್ರಮಗಳ ಬಗ್ಗೆ ಹಂಚಿಕೊಳ್ಳುತ್ತಾರೆ.

ದಂಗಲ್ ಚೀನಾದಲ್ಲೂ ಹಿಟ್
ಚೀನಾದಲ್ಲಿ ದಂಗಲ್ ಬಿಡುಗಡೆಗೊಂಡ ಕೇವಲ 13 ದಿನಗಳಲ್ಲಿ ಸುಮಾರು 490 ಕೋಟಿ ರೂ. (500 ದಶಲಕ್ಷ ಯಾನ್) ಸಂಗ್ರಹಿಸುವ ಮೂಲಕ ದಾಖಲೆ ಬರೆದಿದೆ. ಹಾಲಿವುಡ್ ಸಿನಿಮಾಗಳಿಗಿಂತ ಟಾಪ್ ಪಟ್ಟಿಯಲ್ಲಿ ಕಾಣಿಸಿಕೊಂಡಿದೆ.