ಮೊದಲ ಪತ್ನಿ ಜತೆಗಿನ ವಿಚ್ಛೇದನಕ್ಕೆ ಕಾರಣ ನೀಡಿದ ಅಮೀರ್ ಖಾನ್

ಹದಿನಾರು ವರ್ಷಗಳ ವೈವಾಹಿಕ ಬದುಕಿಗೆ ತೆರೆಬಿದ್ದಿದ್ದರೂ ತನ್ನ ಮಾಜಿ ಪತ್ನಿ ರೀನಾ ದತ್ತಾ ಜತೆಗೆ ಈಗಲೂ ಸ್ನೇಹಸಂಬಂಧ ಮುಂದುವರೆದಿದೆ ಎಂದಿದ್ದಾರೆ ಬಾಲಿವುಡ್ ಮಿಸ್ಟರ್ ಪರ್ಫೆಕ್ಷನಿಸ್ಟ್ ಅಮೀರ್ ಖಾನ್. ಕರಣ್ ಜೋಹಾರ್ ನಡೆಸಿಕೊಡುವ ಚಾಟ್ ಶೋನಲ್ಲಿ ಅಮೀರ್ ಖಾನ್ ಮಾತನಾಡುತ್ತಾ, ರೀನಾಗೆ ವಿಚ್ಛೇದನ ನೀಡಿದ್ದರ ಹಿಂದಿರುವ ಕಾರಣಗಳನ್ನು ತಿಳಿಸಿದ್ದಾರೆ.

"ರೀನಾಗೆ ವಿಚ್ಛೇದನ ನೀಡಿದ ಮಾತ್ರಕ್ಕೆ ಆಕೆ ಬಗ್ಗೆ ನನಗೆ ಗೌರವ ಇಲ್ಲ ಎಂದರ್ಥವಲ್ಲ. ದೂರವಾಗುವ ಸಂದರ್ಭದಲ್ಲಿ ನಮ್ಮಿಬ್ಬರ ಜತೆಗೆ ಕುಟುಂಬಿಕರೂ ತುಂಬಾ ನೋವನುಭವಿಸಿದರು. ಆದರೆ ಭಿನ್ನಾಭಿಪ್ರಾಯಗಳು ಬಂದ ಬಳಿಕ ಜತೆಗೂ ಇರುವುದರಲ್ಲಿ ಅರ್ಥವಿಲ್ಲ. ಆಕೆ ಮೇಲೆ ನನಗೆ ಪ್ರೀತಿ ಕಡಿಮೆಯಾಯಿತು." ಎಂದಿದ್ದಾರೆ.

"ಬಹಳ ಚಿಕ್ಕ ವಯಸ್ಸಿಗೇ ನಮಗೆ ಮದುವೆ ಮಾಡಲಾಯಿತು. ಬಹುಶಃ ಈ ಕಾರಣಕ್ಕೆ ಆ ರೀತಿ ಆಗಿರಬಹುದು" ಎಂದಿದ್ದಾರೆ ಅಮೀರ್ ಖಾನ್. ಗಂಡ ಹೆಂಡತಿಯಾಗಿ ದೂರವಾಗಿದ್ದೇವೆಯೇ ಹೊರತು ಸ್ನೇಹಿತರಾಗಿ ಎಂದಿಗೂ ಜತೆಯಾಗಿಯೇ ಇರುತ್ತೇವೆ. ಸಾಮಾಜಿಕ ಕಾರ್ಯಕ್ರಮಗಳಲ್ಲಿ ಜತೆಯಾಗಿಯೇ ಭಾಗಿಯಾಗುತ್ತೇವೆ ಎಂದಿದ್ದಾರೆ ಅಮೀರ್ ಖಾನ್.

2002ರಲ್ಲಿ ರೀನಾ ಜತೆಗೆ ವಿಚ್ಛೇದನ ಪಡೆದ ಅಮೀರ್ ಖಾನ್ ಬಳಿಕ ಸಹಾಯಕ ನಿರ್ದೇಶಕಿಯಾಗಿದ್ದ ಕಿರಣ್ ರಾವ್‌ರನ್ನು ವಹಿಸಿದರು. 2005ರಲ್ಲಿ ಕಿರಣ್ ರಾವ್‍ ಜತೆಗೆ ಅಮೀರ್ ಖಾನ್ ಮದುವೆಯಾಯಿತು.