ದೀಪ್‌ವೀರ್‌ ಪರಿಣಯಕ್ಕೆ ಸಾಕ್ಷಿಯಾಗಲಿರುವ ಲೇಕ್‌ ಕೊಮೊ

ಬಾಲಿವುಡ್‌ನ ಸ್ಟಾರ್‌ ನಟರಾದ ದೀಪಿಕಾ ಪಡುಕೋಣೆ ಮತ್ತು ರಣವೀರ್‌ ಸಿಂಗ್‌ ಮದುವೆ ತಾಣ ಲೇಕ್‌ ಕೊಮೊ ಭಾರತ ಮಾತ್ರವಲ್ಲದೆ, ಇಡೀ ಜಗತ್ತಿನ ಗಮನ ಸೆಳೆದಿದೆ. ಉತ್ತರ ಇಟಲಿಯ ಈ ಸುಂದರ ಪ್ರದೇಶದಲ್ಲಿರುವ ವಿಲ್ಲಾ ಡೆಲ್‌ ಬಲ್ಬಿಯಾನೆಲ್ಲೊದಲ್ಲಿ ಈ ಜೋಡಿ ಮದುವೆಯಾಗಲಿದೆ.

ಯೂರೋಪ್‌ನಲ್ಲಿರುವ ಲೇಕ್‌ ಕೊಮೊ ಪ್ರಕೃತಿಯಲ್ಲಿ ಸೌಂದರ್ಯವೆಲ್ಲಾ ಒಂದೇ ಕಡೆ ಮಡುಗಟ್ಟಿದಂತೆ ಸುಂದರವಾಗಿದೆ. ಈಗಾಗಲೇ ಹಾಲಿವುಡ್‌ನ ಖ್ಯಾತ ಸಿಲೆಬ್ರಿಟಿಗಳ ಮದುವೆಯೂ ಇಲ್ಲಿ ನಡೆದಿದೆ. ಡೇವಿಡ್‌ ಬೋವೆ, ಜಾರ್ಜ್‌ ಕ್ಲೂನಿ ಮತ್ತು ಕಿಮ್‌ ಕರ್ದಾಶಿಯನ್‌ ಮುಂತಾದವರು ಕೂಡಾ ಇದೇ ತಾಣದಲ್ಲಿ ಮದುವೆಯಾಗಿದ್ದಾರೆ.

ನೀಲ ಸರೋವರ ಮತ್ತು ಹಸಿರು ಪರ್ವತಗಳ ಮಧ್ಯದಲ್ಲಿರುವ ರೋಮನ್‌ ಶೈಲಿಯ ಪ್ರಾಚೀನ ವಿಲ್ಲಾ ಡೆಲ್‌ ಬಲ್ಬಿಯಾನೆಲ್ಲೊ ತನ್ನ ಅದ್ಭುತ ಇಟಾಲಿಯನ್‌ ವಾಸ್ತುಶಿಲ್ಪದಿಂದಲೂ ಗಮನ ಸೆಳೆಯುತ್ತದೆ. ಸುಮಾರು ಏಳು ಶತಮಾನಗಳಷ್ಟು ಪ್ರಾಚೀನವಾಗಿರುವ ಈ ವಿಲ್ಲಾದಲ್ಲೇ ಲೇಕ್‌ ಕೊಮೊವಿನ ಅದ್ಭುತ ಸೌಂದರ್ಯ ಹೊರಹೊಮ್ಮುತ್ತದೆ.

ಈ ಸುಂದರ ಮತ್ತು ಪ್ರಶಾಂತ ಪ್ರದೇಶದಲ್ಲಿ ದೀಪಿಕಾ ಪಡುಕೋಣೆ ಮತ್ತು ರಣವೀರ್‌ ಸಿಂಗ್‌ ಸತಿ ಪತಿಯಾಗಲಿದ್ದಾರೆ. ಎರಡು ಪ್ರತ್ಯೇಕ ಸಮಾರಂಭಗಳಲ್ಲಿ ಮದುವೆ ಕಾರ್ಯಕ್ರಮ ನಡೆಯಲಿವೆ. ಒಂದು ಸಮಾರಂಭದಲ್ಲಿ ಕರ್ನಾಟಕ ಮೂಲದ ದೀಪಿಕಾರಿಗೆ ಕೊಂಕಣಿ ಸಾಂಪ್ರದಾಯದ ಮದುವೆ ಶಾಸ್ತ್ರ ನಡೆಯಲಿದ್ದು, ಇನ್ನೊಂದರಲ್ಲಿ ರಣವೀರ್‌ ಸಿಂಗ್‌ರ ಸಿಂಧ್‌ ಸಂಪ್ರದಾಯದಂತೆ ಮದುವೆ ನಡೆಯಲಿದೆ.

ಸ್ಟಾರ್‌ ಮದುವೆಯ ಹಿನ್ನೆಲೆಯಲ್ಲಿ ಈಗಾಗಲೇ ಈ ವಿಲ್ಲಾಗೆ ಸಾರ್ವಜನಿಕರ ಪ್ರವೇಶವನ್ನು ನಿರಾಕರಿಸಲಾಗಿದೆ. ವಿಲ್ಲಾ ಸುತ್ತ ಬಿಗಿ ಭದ್ರತೆ ಹಾಕಲಾಗಿದ್ದು, ಕೇವಲ ಒಂದೇ ದ್ವಾರದಲ್ಲಿ ಅತಿಥಿಗಳಿಗೆ ಪ್ರವೇಶ ಕಲ್ಪಿಸಲಾಗಿದೆ. ವಿಲ್ಲಾ ಒಳಗಡೆ ವಿಶಾಲವಾದ ಲ್ಯಾಂಡ್‌ಸ್ಕೇಪ್‌ ಗಾರ್ಡನ್‌, ರೋಮನ್‌ ಶೈಲಿಯ ಪ್ರತಿಮೆಗಳು ಮತ್ತು ಕಲಾಕೃತಿಗಳು ಗಮನ ಸೆಳೆಯುತ್ತವೆ.