ಬಾಲಿವುಡ್ ನಟ ಸತೀಶ್ ಕೌಶಿಕ್ ಅವರು (Satish Kaushik) 66ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ಇಂದು ಬೆಳಗ್ಗೆ ಅವರ ನಿವಾಸದಲ್ಲಿ ( ಮಾರ್ಚ್ 9) ಹೃದಯಾಘಾತದಿಂದ ನಿಧನರಾದರು ಎನ್ನಲಾಗಿದೆ. ನಟ ಅನುಪಮ್ ಖೇರ್ ಅವರು ಸೋಶಿಯಲ್ ಮೀಡಿಯಾ ಪೋಸ್ಟ್ ಹಾಕಿದ ನಂತರ ಈ ಸುದ್ದಿ ಅಧಿಕೃತವಾಗಿದೆ. ನಟಿ ಕಂಗನಾ ರಣಾವತ್ ಮುಂತಾದವರು ಸತೀಶ್ ನಿಧನಕ್ಕೆ ಕಂಬನಿ ಮಿಡಿದಿದ್ದಾರೆ.
ಅನುಪಮ್ ಖೇರ್ ಅವರು, "ಹೌದು, ಜಗತ್ತಿನಲ್ಲಿ ಸಾವು ಅನ್ನೋದು ನಿಜವಾದ ಸತ್ಯ. ನಾನು ನನ್ನ ಫ್ರೆಂಡ್ ಬಗ್ಗೆ ಈ ರೀತಿ ಬರೆಯುತ್ತೇನೆ ಅಂತ ಕನಸಿನಲ್ಲಿಯೂ ಅಂದುಕೊಂಡಿರಲಿಲ್ಲ. 45 ವರ್ಷಗಳ ಸ್ನೇಹ ಒಂದೇ ಸಲ ನಿಂತಿದೆ. ಸತೀಶ್ ಇಲ್ಲದೆ ಇನ್ಮುಂದೆ ಜೀವನ ಒಂದೇ ರೀತಿ ಇರೋದಿಲ್ಲ. ಓಂ ಶಾಂತಿ" ಎಂದು ಸೋಶಿಯಲ್ ಮೀಡಿಯಾ ಪೋಸ್ಟ್ ಹಂಚಿಕೊಂಡಿದ್ದಾರೆ.
undefined
ಕಂಗನಾ ರಣಾವತ್ ಅವರು, "ಈ ಭಯಂಕರ ನ್ಯೂಸ್ನಿಂದಲೇ ಬೆಳಗ್ಗೆ ಏಳುವಂತಾಯ್ತು. ಇವರು ನನಗೆ ಸದಾ ಬೆಂಬಲ ನೀಡುತ್ತಿದ್ದರು. ಅತ್ಯಂತ ಯಶಸ್ವಿ ನಟ, ನಿರ್ದೇಶಕ ಸತೀಶ್ ಕೌಶಿಕ್. ವೈಯಕ್ತಿಕವಾಗಿ ಕೂಡ ಸತೀಶ್ ಅವರು ತುಂಬ ವಿನಮ್ರ, ಪ್ರಾಮಾಣಿಕ ವ್ಯಕ್ತಿ. ಎಮರ್ಜೆನ್ಸಿ ಸಿನಿಮಾದಲ್ಲಿ ನಾನು ಅವರಿಗೆ ನಿರ್ದೇಶನ ಮಾಡಿರೋದು ತುಂಬ ಖುಷಿಯಾಗಿತ್ತು. ಸತೀಶ್ ಅವರನ್ನು ಮಿಸ್ ಮಾಡಿಕೊಳ್ತೀನಿ. ಓಂ ಶಾಂತಿ" ಎಂದು ಬರೆದುಕೊಂಡಿದ್ದಾರೆ.
ಮಧುರ್ ಭಂಡಾರ್ಕರ್ ಅವರು, "ನಟ, ನಿರ್ದೇಶಕ ಸತೀಶ್ ಕೌಶಿಕ್ ಅವರ ನಿಧನದ ಸುದ್ದಿ ಕೇಳಿ ಶಾಕ್ ಆಯ್ತು. ಜೀವನದಾದ್ಯಂತ ಅತ್ಯುತ್ಸಾಹದಿಂದ ಕೂಡಿದ್ದರು. ಚಿತ್ರರಂಗದ ಸಮಗ್ರತೆಯಲ್ಲಿ ಅವರನ್ನು ಮಿಸ್ ಮಾಡಿಕೊಳ್ಳಲಾಗುತ್ತದೆ. ಇಡೀ ಕುಟುಂಬಕ್ಕೆ ದುಃಖ ಭರಿಸುವ ಶಕ್ತಿ ಸಿಗಲಿ" ಎಂದು ಸೋಶಿಯಲ್ ಮೀಡಿಯಾ ಪೋಸ್ಟ್ ಹಾಕಿದ್ದಾರೆ.
undefined
ಸಾಯುವ ಎರಡು ದಿನಕ್ಕೂ ಮುನ್ನ ಸತೀಶ್ ಅವರು ಜಾವೇದ್ ಅಖ್ತರ್ ಮನೆಯಲ್ಲಿ ಹೋಳಿ ಹಬ್ಬ ಆಚರಿಸಿದ್ದಾರೆ. ಟ್ವಿಟ್ಟರ್ನಲ್ಲಿ ಕೂಡ ಅವರು ಹೋಳಿ ಹಬ್ಬದ ಆಚರಣೆಯ ಫೋಟೋವನ್ನು ಶೇರ್ ಮಾಡಿದ್ದಾರೆ. ಅಷ್ಟೇ ಅಲ್ಲದೆ ರಿಚಾ ಛಡ್ಡಾ, ಮಹಿಮಾ ಚೌಧರಿ, ಅಲಿ ಫಜಲ್ ಅವರ ಪಾರ್ಟಿಯಲ್ಲಿಯೂ ಕೂಡ ಭಾಗವಹಿಸಿದ್ದರು.
1956 ಏಪ್ರಿಲ್ 13ರಂದು ಜನಿಸಿದ್ದ ಸತೀಶ್ ಕೌಶಿಕ್ ಅವರು ನಟ, ನಿರ್ದೇಶಕ, ನಿರ್ಮಾಪಕ, ಕಾಮಿಡಿಯನ್, ಸ್ಕ್ರೀನ್ ರೈಟರ್ ಆಗಿ ಗುರುತಿಸಿಕೊಂಡಿದ್ದಾರೆ. ನ್ಯಾಶನಲ್ ಸ್ಕೂಲ್ ಆಫ್ ಡ್ರಾಮಾ & ಫಿಲ್ಮ್ & ಟೆಲಿವಿಷನ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾದಲ್ಲಿ ಸತೀಶ್ ಅವರು ಶಿಕ್ಷಣ ಪಡೆದಿದ್ದರು. 'ರಾಮ್ ಲಖನ್', 'ಸಾಜನ್ ಚಾಲೆ ಸಸುರಾಲ್', 'ಜಾನೆ ಭಾಯ್ ದೊ ಯಾರೋ' ಸಿನಿಮಾಗಳಲ್ಲಿ ಸತೀಶ್ ಅವರು ನಟಿಸಿದ್ದು, ಶೇಖರ್ ಕಪೂರ್ ಅವರ 'ಮಿ ಇಂಡಿಯಾ' ಸಿನಿಮಾ ಮೂಲಕ ಮನೆಮಾತಾಗಿದ್ದರು.
Satish Kaushik Death: 2 ದಿನದ ಹಿಂದೆ ಹೋಳಿ ಆಚರಿಸಿದ್ದ 'ರಾಮ್ ಲಖನ್' ನಟ ಸತೀಶ್ ಕೌಶಿಕ್ ಇನ್ನಿಲ್ಲ
Satish Kaushik Passes Away News in Kannada: ರಾಮ್ ಲಖನ್', 'ಸಾಜನ್ ಚಾಲೆ ಸಸುರಾಲ್', 'ಜಾನೆ ಭಾಯ್ ದೊ ಯಾರೋ' ಮುಂತಾದ ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದ್ದ ಸತೀಶ್ ಕೌಶಿಕ್ ಅವರು ಚಿತ್ರರಂಗದಲ್ಲಿ ನಟ, ನಿರ್ದೇಶಕ, ನಿರ್ಮಾಪಕ, ಸ್ಕ್ರೀನ್ರೈಟರ್, ಕಾಮಿಡಿಯನ್ ಆಗಿ ಗುರುತಿಸಿಕೊಂಡಿದ್ದರು. ಅನುಪಮ್ ಖೇರ್ ಅವರ ಸ್ನೇಹಿತ ಸತೀಶ್ ಕೌಶಿಲ್ ಇಂದು ನಿಧನರಾಗಿದ್ದಾರೆ. ಇವರ ನಿಧನಕ್ಕೆ ಅನೇಕ ಸೆಲೆಬ್ರಿಟಿಗಳು ಸೋಶಿಯಲ್ ಮೀಡಿಯಾದಲ್ಲಿ ಸಂತಾಪ ಸೂಚಿಸುತ್ತಿದ್ದಾರೆ.
ಹೈಲೈಟ್ಸ್:
- ನಟ, ನಿರ್ದೇಶಕ, ನಿರ್ಮಾಪಕ ಸತೀಶ್ ಕೌಶಿಕ್ ನಿಧನ
- ರಾಮ್ ಲಖನ್', 'ಸಾಜನ್ ಚಾಲೆ ಸಸುರಾಲ್' ಸಿನಿಮಾಗಳಲ್ಲಿ ಸತೀಶ್ ನಟನೆ
- ಸತೀಶ್ ನಿಧನಕ್ಕೆ ಬಾಲಿವುಡ್ ತಾರೆಯರ ಸಂತಾಪ