ಪರ್ಸನಲ್‌ ಲೋನ್‌ ಕೊಡ್ತಾರಾ ನಟ ಸೋನು ಸೂದ್‌? ಇಂಥ ನಕಲಿ ಕೆಲಸದ ಬಗ್ಗೆ ಇರಲಿ ಎಚ್ಚರ!

ಲಾಕ್‌ಡೌನ್‌ ಸಂದರ್ಭದಲ್ಲಿ ತಮ್ಮ ಊರುಗಳಿಗೆ ತೆರಳಲು ಸಾಧ್ಯವಾಗದ ವಲಸೆ ಕಾರ್ಮಿಕರಿಗೆ ಸಾರಿಗೆ ವ್ಯವಸ್ಥೆ ಕಲ್ಪಿಸುವ ಮೂಲಕ ಲಕ್ಷಾಂತರ ಜನರ ಸಹಾಯಕ್ಕೆ ಧಾವಿಸಿದ್ದರು ನಟ ಸೋನು ಸೂದ್‌. ಆದರೆ ಅಂಥ ನಟನ ಹೆಸರು ಈಗ ದುರ್ಬಳಕೆ ಆಗುತ್ತಿದೆ. ಆ ಬಗ್ಗೆ ಸ್ವತಃ ಸೋನು ಸೂದ್‌ ಎಚ್ಚರಿಕೆ ನೀಡಿದ್ದಾರೆ. ಅಭಿಮಾನಿಗಳು, ನೆಟ್ಟಿಗರು ಈ ವಿಚಾರದಲ್ಲಿ ಹುಷಾರಾಗಿರಬೇಕು ಎಂದು ಅವರು ಹೇಳಿದ್ದಾರೆ.

ಹೌದು, ಸೋಶಿಯಲ್‌ ಮೀಡಿಯಾ ಮೂಲಕ ಸೋನು ಸೂದ್‌ ಹೆಸರನ್ನು ಅನೇಕರು ದುರ್ಬಳಕೆ ಮಾಡಿಕೊಳ್ಳಲು ಆರಂಭಿಸಿದ್ದಾರೆ. ಬಡವರ ಪಾಲಿಗೆ ರಿಯಲ್‌ ಹೀರೋ ಆಗಿರುವ ಈ ಬಾಲಿವುಡ್ ನಟನ ಹೆಸರು ಹೇಳಿಕೊಂಡು ಜನರನ್ನು ಯಾಮಾರಿಸುವ ಪ್ರಯತ್ನಗಳು ನಡೆಯುತ್ತಿವೆ. ಅದು ಸೋನು ಸೂದ್‌ ಅವರ ಗಮನಕ್ಕೂ ಬಂದಿದೆ. ಅದನ್ನು ಸಾಕ್ಷಿ ಸಮೇತ ಜನರ ಮುಂದಿರಿಸಲಾಗಿದೆ.

ಸೋನು ಸೂದ್‌ ಹೆಸರಿನಲ್ಲಿ ಪರ್ಸನಲ್ ಲೋನ್‌ ಕೊಡಲಾಗುವುದು ಎಂದು ಕಿಡಿಗೇಡಿಗಳು ಟ್ವಿಟರ್‌ನಲ್ಲಿ ಪೋಸ್ಟ್‌ ಮಾಡಿದ್ದಾರೆ. 'ಸೋನು ಸೂದ್‌ ಫೌಂಡೇಶನ್‌ ವತಿಯಿಂದ ಕೊಡಲಾಗುವ ಪರ್ಸನಲ್‌ ಲೋನ್‌ಗಾಗಿ ಈ ದೂರವಾಣಿ ಸಂಖ್ಯೆಗೆ ಕೆರೆ ಮಾಡಿ' ಎಂದು ವಂಚಕರು ಮಾಡಿರುವ ಟ್ವೀಟ್‌ನ ಸ್ಕ್ರೀನ್‌ ಶಾಟ್‌ ಅನ್ನು ಸೋನು ಸೂದ್‌ ಶೇರ್‌ ಮಾಡಿಕೊಂಡಿದ್ದಾರೆ. 'ಇವು ನಕಲಿ ಖಾತೆಗಳು. ಎಚ್ಚರಿಕೆ!!' ಎಂದು ಅವರು ಜನರನ್ನು ಎಚ್ಚರಿಸುವ ಪ್ರಯತ್ನ ಮಾಡಿದ್ದಾರೆ.

also read: ಪ್ರಚಾರಕ್ಕಾಗಿ ಸಹಾಯ ಮಾಡ್ತೀರಿ ಎಂದವರಿಗೆ ನಟ ಸೋನು ಸೂದ್‌ ಸಾಕ್ಷಿ ಸಮೇತ ಕೊಟ್ಟ ಉತ್ತರ ಇದು!

ಇನ್ನು, ಸೋನು ಸೂದ್‌ ಅವರ ಹೆಸರಿಗೆ ಮಸಿ ಬಳಿಯುವ ಕೆಲಸ ಮೊದಲಿನಿಂದಲೂ ನಡೆಯುತ್ತಲೇ ಇದೆ. ಸೋಶಿಯಲ್‌ ಮೀಡಿಯಾದಲ್ಲಿ ಅವರ ವಿರುದ್ಧ ಅನೇಕರು ಅಪಪ್ರಚಾರ ಮಾಡುತ್ತಿದ್ದಾರೆ. ಪ್ರಚಾರದ ಸಲುವಾಗಿ ಸೋನು ಬಡವರಿಗೆ ಸಹಾಯ ಮಾಡುವ ನಾಟಕ ಆಡುತ್ತಿದ್ದಾರೆ ಎಂಬುದಾಗಿಯೂ ಆರೋಪಿಸಲಾಗಿದೆ. ಅದಕ್ಕೆಲ್ಲ ಸೋನು ಸೂದ್‌ ಪ್ರತ್ಯುತ್ತರ ನೀಡುತ್ತಲೇ ಬಂದಿದ್ದಾರೆ.

also read: ಕನ್ನಡಿಗನ ದೊಡ್ಡ ಸಾಹಸಕ್ಕೆ ಕೈ ಜೋಡಿಸಿದ 'ರಿಯಲ್ ಹೀರೋ' ಸೋನು ಸೂದ್‌!