ಕೋವಿಡ್‌-19 ರೋಗಿಗಳ ಮುಂದೆ ಡ್ಯಾನ್ಸ್‌ ಮಾಡಿದ ಡಾಕ್ಟರ್! ಮಾಧುರಿ ದೀಕ್ಷಿತ್‌ ಕೊಟ್ಟ ಪ್ರತಿಕ್ರಿಯೆ ಏನು?

ಡ್ಯಾನ್ಸ್‌ ವಿಚಾರದಲ್ಲಿ ನಟಿ ಮಾಧುರಿ ದೀಕ್ಷಿತ್‌ಗೆ ಸರಿಸಾಟಿಯಾದವರು ಮತ್ತೊಬ್ಬರಿಲ್ಲ ಎನ್ನಬಹುದು. ಅವರಿಂದ ಮೆಚ್ಚುಗೆ ಪಡೆಯಬೇಕು ಎಂದು ಎಷ್ಟೋ ಹೊಸ ಪ್ರತಿಭೆಗಳು ಕಾಯುತ್ತಿರುತ್ತಾರೆ. ಈಗ ವೈದ್ಯರೊಬ್ಬರ ಡ್ಯಾನ್ಸ್‌ ನೋಡಿ ಮಾಧುರಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಈ ಕುರಿತು ಅವರು ಟ್ವಿಟರ್‌ನಲ್ಲಿ ಬರೆದುಕೊಂಡಿದ್ದಾರೆ. ಡಾಕ್ಟರ್‌ ಪ್ರತಿಭೆಗೆ ಭೇಷ್‌ ಎಂದಿದ್ದಾರೆ ಮಾಧುರಿ.

ಡಾಕ್ಟರ್‌ಗೂ ಡ್ಯಾನ್ಸ್‌ಗೂ ಏನು ಸಂಬಂಧ ಎಂಬ ಪ್ರಶ್ನೆ ಮೂಡುವುದು ಸಹಜ. ಅದಕ್ಕೆ ಉತ್ತರ ಇಲ್ಲಿದೆ. ಅಸ್ಸಾಂನ ENT surgeon ಒಬ್ಬರು ತಮ್ಮ ಆಸ್ಪತ್ರೆಯಲ್ಲಿರುವ ಕೋವಿಡ್‌-19 ರೋಗಿಗಳ ಮುಂದೆ ಡ್ಯಾನ್ಸ್‌ ಮಾಡುವ ಮೂಲಕ ಅವರಲ್ಲಿ ಜೀವನೋತ್ಸಾಹ ತುಂಬುವ ಕಾರ್ಯ ಮಾಡುತ್ತಿದ್ದಾರೆ. ಪಿಪಿಇ ಕಿಟ್‌ ಧರಿಸಿ ಅವರು ನರ್ತಿಸುತ್ತಿರುವ ಒಂದು ವಿಡಿಯೋ ವೈರಲ್‌ ಆಗಿದೆ. ಅದು ಮಾಧುರಿ ಗಮನಕ್ಕೂ ಬಂದಿದ್ದು, ಮೆಚ್ಚುಗೆ ಮಾತುಗಳನ್ನು ಆಡಿದ್ದಾರೆ.

'ಅದ್ಭುತ ಡ್ಯಾನ್ಸ್‌ ಸ್ಟೆಪ್‌ಗಳು... ಎಲ್ಲಕ್ಕಿಂತ ಹೆಚ್ಚಾಗಿ, ಧನಾತ್ಮಕವಾಗಿ ಇರಬೇಕು ಎನ್ನುವ ಆ ಜೀವನೋತ್ಸಾಹ! ಡಾ. ಆರೂಪ್‌ಗೆ ಶುಭವಾಗಲಿ' ಎಂದು ಟ್ವೀಟ್‌ ಮಾಡಿದ್ದಾರೆ ಮಾಧುರಿ ದೀಕ್ಷಿತ್‌. ಅಂದಹಾಗೆ, ಈ ವೈದ್ಯರು ಡ್ಯಾನ್ಸ್‌ ಮಾಡಿರುವುದು ಹೃತಿಕ್‌ ರೋಷನ್‌ ನಟನೆಯ 'ವಾರ್‌' ಚಿತ್ರದ 'ಗಂಗ್ರೂ..' ಹಾಡಿಗೆ. ಅದನ್ನು ನೋಡಿ ಹೃತಿಕ್‌ ರೋಷನ್‌ ಸಹ ಖುಷಿಪಟ್ಟಿದ್ದರು.

also read: ಮಾಧುರಿ ದೀಕ್ಷಿತ್‌ಗಾಗಿ 16 ದಿನ ಡ್ಯಾನ್ಸ್ ಪ್ರಾಕ್ಟೀಸ್‌ ಮಾಡಿದ್ದ ಸಂಜಯ್ ದತ್‌!

'ಇವರಿಂದ ನಾನು ಡ್ಯಾನ್ಸ್‌ ಸ್ಟೆಪ್ಸ್‌ ಕಲಿಯಬೇಕು' ಎಂದು ಹೃತಿಕ್‌ ಟ್ವೀಟ್‌ ಮಾಡಿದ್ದರು. ಅದಕ್ಕೆ ಪ್ರತಿಕ್ರಿಯಸಿದ್ದ ಡಾಕ್ಟರ್‌, 'ನಿಮಗೆ ಡ್ಯಾನ್ಸ್‌ ಹೇಳಿಕೊಡುವಷ್ಟು ಸಮರ್ಥ ನಾನಲ್ಲ' ಎಂದಿದ್ದು ಮಾತ್ರವಲ್ಲದೆ, ಅಸ್ಸಾಂಗೆ ಬನ್ನಿ ಎಂದು ಹೃತಿಕ್‌ಗೆ ಆಹ್ವಾನ ನೀಡಿದ್ದರು. ಒಟ್ಟಿನಲ್ಲಿ, ಕೋವಿಡ್‌-19 ಕುರಿತಾಗಿ ಬರೀ ನೆಗೆಟಿವ್‌ ಸುದ್ದಿಗಳೇ ಹರಿದಾಡುತ್ತಿರುವ ಸಂದರ್ಭದಲ್ಲಿ ಈ ವೈದ್ಯರು ತಮ್ಮ ಡ್ಯಾನ್‌ನಿಂದ ರೋಗಿಗಳನ್ನು ರಂಜಿಸುವ ಪ್ರಯತ್ನ ಮಾಡಿರುವುದು ಮೆಚ್ಚುಗೆಗೆ ಪಾತ್ರವಾಗುತ್ತಿದೆ.

also read: ಎಲ್ಲ ಸ್ಟಾರ್ ನಟರನ್ನು ಬಿಟ್ಟು ಶ್ರೀರಾಮ್ ಮದುವೆಯಾಗಿದ್ದೇಕೆ ನಟಿ ಮಾಧುರಿ ದೀಕ್ಷಿತ್?