ರಾಮದೇವ್‌ ಪಾತ್ರದಲ್ಲಿ ಬಾಲಿವುಡ್‌ ಸ್ಟಾರ್‌ ನಟ?

ಇತ್ತೀಚೆಗೆ ಬಾಲಿವುಡ್‌ ಅಂಗಳದಲ್ಲಿ ಖ್ಯಾತ ವ್ಯಕ್ತಿಗಳ ಜೀವನಾಧಾರಿತ ಚಿತ್ರಗಳು ಹೆಚ್ಚಾಗಿ ಬರುತ್ತಿವೆ. ಇದೀಗ ಈ ಸಾಲಿಗೆ ಯೋಗ ಗುರು ಬಾಬಾ ರಾಮದೇವ್‌ ಜೀವನ ಕುರಿತಾದ ಚಿತ್ರವೂ ಒಂದಾಗಲಿದೆ.

ಹೌದು, ಬೆಳ್ಳಿತೆರೆ ಮೇಲೆ ಬಾಬಾ ರಾಮದೇವ್‌ ಜೀವನಗಾಥೆ ಬರುವುದು ಬಹುತೇಕ ಖಚಿತವಾಗಿದೆ. ಇನ್ನು ಈ ಚಿತ್ರವನ್ನು ಬಾಲಿವುಡ್‌ ನಟ ಅಜಯ್‌ ದೇವಗನ್‌ ನಿರ್ಮಿಸಲಿದ್ದು, ಸ್ವತಃ ಅವರೇ ಬಾಬಾ ರಾಮದೇವ್‌ ಪಾತ್ರವನ್ನು ನಿಭಾಯಿಸಲಿದ್ದಾರೆ ಎಂಬ ಮಾಹಿತಿ ಮೂಲಗಳಿಂದ ದೊರೆತಿದೆ.

ಈ ಮೊದಲು ಯೋಗ ಗುರುವಿನ ಯಶೋಗಾಥೆಯನ್ನು ಕಿರುತೆರೆಯ ಮೇಲೆ ತರಲು ಅಜಯ್‌ ಯೋಜನೆ ರೂಪಿಸಿದ್ದರು. ಅಷ್ಟೇ ಅಲ್ಲದೆ 'ದಿಲ್‌ ದಢಕ್ನೆ ದೋ' ಖ್ಯಾತಿಯ ನಟ ವಿಕ್ರಾಂತ್‌ ಮೆಸ್ಸಿ ರಾಮದೇವ್‌ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗಿತ್ತು. ಆದರೆ ಕಾರಣಾಂತರಗಳಿಂದ ವಿಕ್ರಾಂತ್‌ ಮೆಸ್ಸಿ ಈ ಪ್ರಾಜೆಕ್ಟ್‌ನಿಂದ ಹೊರಬಂದರು.

ಸದ್ಯಕ್ಕೆ ಹಿರಿತೆರೆಯ ಮೇಲೆ ಬಾಬಾ ರಾಮದೇವ್‌ ಕಥೆಯನ್ನು ತರಲು ಅಜಯ್‌ ಪ್ರಯತ್ನಿಸುತ್ತಿದ್ದು, ಅವರೇ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಮಾತುಗಳು ಬಾಲಿವುಡ್‌ ಅಂಗಳದಲ್ಲಿ ಹರಿದಾಡುತ್ತಿದೆ. ಇದು ಎಷ್ಟರ ಮಟ್ಟಿಗೆ ನಿಜ ಎಂಬುದನ್ನು ಕಾಲವೇ ಉತ್ತರಿಸಬೇಕು. ಈ ಹಿಂದೆ ಅಜಯ್‌ ದೇವಗನ್‌ 'ಶಿವಾಯ್‌' ಚಿತ್ರವನ್ನು ನಿರ್ಮಿಸಿ, ನಿರ್ದೇಶನದ ಜತೆಗೆ ಮುಖ್ಯ ಪಾತ್ರದಲ್ಲಿಯೂ ಮಿಂಚಿದ್ದರು.