ಅಕ್ಷಯ್‌ ಕುಮಾರ್‌ ಸಂಭಾವನೆ 120 ಕೋಟಿ ರೂ.!

ನಟ ಅಕ್ಷಯ್‌ ಕುಮಾರ್‌ ಮತ್ತು ನಿರ್ಮಾಪಕ ಆನಂದ್‌ ಎಲ್‌. ರಾಯ್‌ ಹೊಸ ಚಿತ್ರವೊಂದಕ್ಕಾಗಿ ಕೈ ಜೋಡಿಸುತ್ತಿದ್ದು, ಆ ಚಿತ್ರಕ್ಕಾಗಿ ಕಿಲಾಡಿ ಅಕ್ಕಿ ಬರೋಬ್ಬರಿ 120 ಕೋಟಿ ರೂ. ಸಂಭಾವನೆ ಡಿಮಾಂಡ್‌ ಮಾಡಿದ್ದಾರಂತೆ. ಈ ಮೂಲಕ ಬಾಲಿವುಡ್‌ನಲ್ಲಿಅತ್ಯಧಿಕ ಸಂಭಾವನೆ ಪಡೆಯುವ ಅಗ್ರ ನಟರಾಗಿ ಗಮನ ಸೆಳೆದಿದ್ದಾರೆ. ಈ ಸಿನಿಮಾದಲ್ಲಿಅವರೊಂದಿಗೆ ಸೈಫ್‌ ಆಲಿ ಖಾನ್‌ ಕೂಡ ನಟಿಸುತ್ತಿದ್ದಾರೆ.

ಅಕ್ಷಯ್‌ ಕುಮಾರ್‌ರ ಸಿನಿಮಾ ಥಿಯೇಟರ್‌ಗಳಲ್ಲಿಉತ್ತಮ ಗಳಿಕೆ ಮಾಡುತ್ತಿರುವುದು ಮಾತ್ರವಲ್ಲದೆ, ಅವರ ಸಿನಿಮಾಗಳ ಸ್ಯಾಟಲೈಟ್‌ ಮತ್ತು ಡಿಜಿಟಲ್‌ ಹಕ್ಕುಗಳಿಗೂ ವ್ಯಾಪಕ ಬೇಡಿಕೆ ಕಂಡುಬರುತ್ತಿರುವುದರಿಂದ ಅವರಿಗೆ ಸಹಜವಾಗಿಯೇ ಇಷ್ಟೊಂದು ದೊಡ್ಡ ಮೊತ್ತದ ಸಂಭಾವನೆ ನೀಡಲಾಗುತ್ತಿದೆ ಎಂದು ತಿಳಿದುಬಂದಿದೆ.

ಸದ್ಯಕ್ಕೆ ಬಾಲಿವುಡ್‌ನ ಹಿಟ್‌ ಮಷಿನ್‌ ಎಂದೇ ಕರೆಸಿಕೊಳ್ಳುತ್ತಿರುವ ಅವರ ಕಳೆದ ವರ್ಷ ಬಿಡುಗಡೆಯಾದ 'ಮಿಷನ್‌ ಮಂಗಲ್‌', 'ಕೇಸರಿ', 'ಹೌಸ್‌ಫುಲ್‌ 4' ಮತ್ತು 'ಗುಡ್‌ ನ್ಯೂಸ್‌' ಸಿನಿಮಾಗಳ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ಉತ್ತಮವಾಗಿತ್ತು. 'ಗುಡ್‌ ನ್ಯೂಸ್‌' ಸಿನಿಮಾ ಈಗಲೂ ಥಿಯೇಟರ್‌ನಲ್ಲಿ ಪ್ರದರ್ಶನ ಕಾಣುತ್ತಿದ್ದು, ಉತ್ತಮ ಆದಾಯ ತರುತ್ತಿದೆ.

ಅಕ್ಷಯ್‌ರ ಮುಂದಿನ ಸಿನಿಮಾಗಳಾದ ಸೂರ್ಯವಂಶಿ, ಲಕ್ಷ್ಮಿ ಬಾಂಬ್‌ ಮತ್ತು ಬಚ್ಚನ್‌ ಪಾಂಡೆ ಕೂಡ ಗಲ್ಲಾಪೆಟ್ಟಿಗೆ ಸೂರೆಗೈಯುವ ಭರವಸೆ ಮೂಡಿಸಿರುವುದರಿಂದ ಅವರ ಸಂಭಾವನೆ 100 ಕೋಟಿ ರೂಪಾಯಿ ಮೀರಿದೆ ಎಂದು ಹೇಳಲಾಗುತ್ತಿದೆ. ಎಲ್ಲದಕ್ಕೂ ಘಟಾನುಘಟಿ ನಿರ್ದೇಶಕರು ಆ್ಯಕ್ಷನ್‌-ಕಟ್ ಹೇಳುತ್ತಿದ್ದಾರೆ.