ಅಕ್ಷಯ್ ಕುಮಾರ್ 'ಸೂರ್ಯವಂಶಿ' ಫಸ್ಟ್ ಲುಕ್ ರಿಲೀಸ್

ಬಿಡುಗಡೆಗೆ ಸಿದ್ಧವಾಗರುವ ಬಾಲಿವುಡ್ ಸ್ಟಾರ್ ನಟ ಅಕ್ಷಯ್ ಕುಮಾರ್ 'ಕೇಸರಿ' ಚಿತ್ರವು ಸದ್ದು ಮಾಡುತ್ತಿರುವ ಈ ಹೊತ್ತಿನಲ್ಲೇ ಮತ್ತೊಂದು ಚಿತ್ರವು ತನ್ನ ಫಸ್ಟ್ ಲುಕ್ ಬಿಡುಗಡೆ ಮಾಡಿಕೊಂಡು ಸುದ್ದಿ ಮಾಡಲು ಶುರು ಮಾಡಿದೆ. ಹೌದು, ರೋಹಿತ್ ಶೆಟ್ಟಿ ನಿರ್ದೇಶನದ ಸೂರ್ಯವಂಶಿ ಚಿತ್ರವು ಅಕ್ಷಯ್ ಕುಮಾರ್ ನಾಯಕತ್ವದಲ್ಲಿ ಮೂಡಿ ಬರುತ್ತಿದ್ದು, ಚಿತ್ರದ ಫಸ್ಟ್ ಲುಕ್ ಬಿಡುಗಡೆ ಮಾಡುವ ಮೂಲಕ ಚಿತ್ರತಂಡವು ಪ್ರಚಾರ ಕಾರ್ಯವನ್ನು ಶುರು ಮಾಡಿಕೊಂಡಿದೆ.

ಸಾಕಷ್ಟು ಜೀವನ ಚರಿತ್ರೆಗಳಲ್ಲಿ, ನೈಜ ಕಥೆಗಳ ಚಿತ್ರಗಳಲ್ಲಿ ಈಗಾಗಲೇ ಕಾಣಿಸಿಕೊಂಡಿರುವ ನಟ ಅಕ್ಷಯ್ ಕುಮಾರ್ ಅವರು ಮತ್ತೆ ಈ 'ಸೂರ್ಯವಂಶಿ' ಚಿತ್ರದಲ್ಲಿ ಖಾಕಿ ತೊಟ್ಟಿದ್ದಾರೆ. ಈಗಾಗಲೇ ರೌಡಿ ರಾಥೋಡ್ ಚಿತ್ರದಲ್ಲಿ ಖಾಕಿ ತೊಟ್ಟು ಅಬ್ಬರಿಸಿದ್ದ ಅಕ್ಷಯ್ ಕುಮಾರ್ ಅವರು ರೋಹಿತ್ ಶೆಟ್ಟಿ ನಿರ್ದೇಶನದ ಈ ಚಿತ್ರದಲ್ಲಿ ವಿಭಿನ್ನ ರೀತಿಯಲ್ಲಿ ಕಾಣಿಸಿಕೊಂಡಿದ್ದಾರೆ. ಆದರೆ, ಈ ಚಿತ್ರದಲ್ಲಿಯೂ ಅವರ ಖಾಕಿ ಖದರ್ ಮುಂದುವರಿಯಲಿದೆ ಎನ್ನಲಾಗಿದೆ.

ತಮ್ಮ ಟ್ವೀಟರ್ ಪೇಜ್‌ನಲ್ಲಿ 'ಸೂರ್ಯವಂಶಿ' ಚಿತ್ರದ ಫಸ್ಟ್ ಲುಕ್‌ ಬಿಡುಗಡೆಯನ್ನು ಟ್ವೀಟ್ ಮಾಡಿರುವ ನಟ ಅಕ್ಷಯ್ ಕುಮಾರ್ ಅವರು 'ಬುಲೆಟ್‌ನಿಂದಲೇ ಬುಲೆಟ್‌ ಅನ್ನು ಎದುರಿಸಬೇಕು' ಎಂದು ಬರೆದುಕೊಂಡಿದ್ದಾರೆ.

ಈ ಮೊದಲು 'ಸಿಂಗಂ', 'ಸಿಂಬಾ' ಮುಂತಾದ ಯಶಸ್ವಿ ಚಿತ್ರಗಳನ್ನ ತೆರೆಗೆ ತಂದಿರುವ ನಿರ್ದೇಶಕ ರೋಹಿತ್ ಶೆಟ್ಟಿ ಈಗ ಮತ್ತೆ ರಫ್ ಅಂಡ್ ಟಫ್‌ 'ಕಾಪ್‌' ಕುರಿತಂತೆ ಮತ್ತೊಂದು ಸಿನಿಮಾ ಮಾಡುತ್ತಿದ್ದಾರೆ. ತಮ್ಮ ಚಿತ್ರಕ್ಕೆ 'ಸೂರ್ಯವಂಶಿ' ಎಂದು ಹೆಸರಿಟ್ಟಿರುವ ರೋಹಿತ್ ಶೆಟ್ಟಿಯವರು ಅಕ್ಷಯ್‌ಕುಮಾರ್‌ಗೆ ಮತ್ತೆ ಖಾಕಿ ತೊಡಿಸಿದ್ದಾರೆ. ರೋಹಿತ್‌ ಶೆಟ್ಟಿ ನಿರ್ದೇಶನದಲ್ಲಿ ಬರುತ್ತಿರುವ ಪೊಲೀಸ್ ಕಥೆಯಾಧರಿಸಿದ ನಾಲ್ಕನೇ ಸಿನಿಮಾ ಈ ಸೂರ್ಯವಂಶಿ ಎಂಬುದು ವಿಶೇಷ.

ಈ ಚಿತ್ರವು ಮುಂದಿನ ವರ್ಷ, 2020ರಲ್ಲಿ ಬಿಡುಗಡೆ ಆಗಲಿದೆ ಎಂದು ಚಿತ್ರತಂಡ ಹೇಳಿದೆ. ಸೂರ್ಯವಂಶಿ ಚಿತ್ರಕ್ಕೆ 'bullet for a bullet' ಎಂದು ಟ್ಯಾಗ್‌ ಲೈನ್ ಇಡಲಾಗಿದೆ. 'ಬುಲೆಟ್‌ನಿಂದಲೇ ಬುಲೆಟ್‌ ಅನ್ನು ಎದುರಿಸಬೇಕು' ಎನ್ನೋದು ಚಿತ್ರದ ಕಥೆಯ ತಿರುಳು ಎನ್ನಲಾಗಿದೆ. ಸೂರ್ಯವಂಶಿ ಚಿತ್ರವನ್ನು ಖ್ಯಾತ ನಿರ್ಮಾಪಕ ಕರಣ್ ಜೋಹರ್ ನಿರ್ಮಾಣ ಮಾಡಲಿದ್ದಾರೆ.