ಶಾಕಾಹಾರಿಯಾಗಿ ಬದಲಾದ ನಟ ಅಕ್ಷಯ್ ಕುಮಾರ್

ಬಾಲಿವುಡ್ ಸೂಪರ್ ಸ್ಟಾರ್ ಅಕ್ಷಯ್ ಕುಮಾರ್ ಬಾಲಿವುಡ್‌ನಲ್ಲಿ ಅತ್ಯಂತ ಫಿಟ್ ಆಗಿರುವ ನಟರಲ್ಲಿ ಒಬ್ಬರು. ಇದರಲ್ಲಿ ಎರಡನೇ ಮಾತೇ ಇಲ್ಲ. ಐವತ್ತೊಂದನೇ ವಯಸ್ಸಲ್ಲೂ ತಮ್ಮ ದೇಹವನ್ನು ಫಿಟ್ ಆಗಿ ಇಟ್ಟುಕೊಂಡಿದ್ದಾರೆ. ಸಾಮಾಜಿಕ ಮಾಧ್ಯಮದಲ್ಲಿ ಆಗಾಗ ಫಿಟ್‌ನೆಸ್ ಬಗ್ಗೆ ಸ್ವಾರಸ್ಯಕರವಾದ ಸಂಗತಿಗಳನ್ನು ಹಂಚಿಕೊಳ್ಳುತ್ತಿರುತ್ತಾರೆ.

ಇನ್ನು ಮುಂದಿನ ದಿನಗಳಲ್ಲಿ ಒಟ್ಟಾರೆ ಆರೋಗ್ಯಕರವಾದ ಜೀವನಶೈಲಿ ಅನುಸರಿಸಲು ಅಕ್ಷಯ್ ಕುಮಾರ್ ನಿರ್ಧರಿಸಿದ್ದಾಂತೆ. ಮೂಲಗಳ ಪ್ರಕಾರ ಅಕ್ಷಯ್ ಕುಮಾರ್ ಸಸ್ಯಾಹಾರಿಯಾಗಿ ಬದಲಾಗಿದ್ದಾರೆ. ಈಗಾಗಲೆ ಬಾಲಿವುಡ್‌ನಲ್ಲಿ ಜಾನ್ ಅಬ್ರಹಾಂ, ಅನುಷ್ಕಾ ಶರ್ಮಾ ಸಹ ಸಸ್ಯಾಹಾರಿಗಳಾಗಿ ಬದಲಾಗಿದ್ದಾರೆ.

ಇದೀಗ ಅಕ್ಷಯ್ ಕುಮಾರ್ ಈ ಪಟ್ಟಿಗೆ ಹೊಸ ಸೇರ್ಪಡೆ ಎನ್ನಬಹುದು. ಕಳೆದ ನಾಲ್ಕು ತಿಂಗಳ ಹಿಂದೆಯೇ ಅವರು ಶಾಕಾಹಾರಿಯಾಗಿ ಬದಲಾಗಿದ್ದಾರೆ ಎಂದಿವೆ ಬಾಲಿವುಡ್ ಮೂಲಗಳು. ಇದಕ್ಕೆ ಕಾರಣ ಫಿಟ್‌ನೆಸ್ ಹಾಗೂ ಹೊಸ ರೀತಿಯ ಜೀವನಶೈಲಿ ಅಂತೆ.

ಇನ್ನೊಂದು ಕಡೆ ಅಕ್ಷಯ್ ಕುಮಾರ್ ಅಭಿನಯದ ಕೇಸರಿ ಸಿನಿಮಾ ಬಿಡುಗಡೆಗೆ ಸಿದ್ಧವಾಗಿದೆ. ಈಗಾಗಲೆ ಚಿತ್ರದ ಟ್ರೇಲರ್ ರಿಲೀಸ್ ಆಗಿದ್ದು ಪ್ರೇಕ್ಷಕರನ್ನು ಸಿಕ್ಕಾಪಟ್ಟೆ ಸೆಳೆಯುತ್ತಿದೆ. ಬ್ರಿಟೀಷ್ ಇಂಡಿಯನ್ ಆರ್ಮಿಯ 21 ಮಂದಿ ಕೆಚ್ಚೆದೆಯ ಸಿಖ್ ಯೋಧರ ಕಥೆ ಇದು. 10,000 ಮಂದಿ ಅಫ್ಗಾನ್ ಆಕ್ರಮಣಕಾರರನ್ನು ಸದೆಬಡಿದ ಕಥಾನಕವನ್ನು ತೆರೆಗೆ ತರಲಾಗಿದೆ.

ಫಿಟ್‌ನೆಸ್ ವಿಚಾರಕ್ಕೆ ಬಂದರೆ ಅಕ್ಷಯ್ ಸಿಕ್ಕಾಪಟ್ಟೆ ಕಾಳಜಿ ವಹಿಸುತ್ತಾರೆ. ಹೊಸ ವರ್ಷದ ಮೊದಲನೇ ದಿನ ಬೆಳಗ್ಗೆಯೇ ವರ್ಕೌಟ್‌ ಮಾಡುತ್ತಿರುವ ವೀಡಿಯೋವೊಂದನ್ನು ಅಕ್ಕಿ ಅಲಿಯಾಸ್‌ ಅಕ್ಷಯ್‌ ಕುಮಾರ್‌ ತಮ್ಮ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಶೇರ್‌ ಹಂಚಿಕೊಂಡಿದ್ದರು. ಅಲ್ಲದೆ, ಹಿಂಭಾಗದಲ್ಲಿ ಸೂರ್ಯ ಉದಯಿಸುತ್ತಿರುವ ದೃಶ್ಯ ಸಹ ಇದ್ದು, ವರ್ಷದ ಮೊದಲ ಸೂರ್ಯ ಉದಯಿಸುತ್ತಿರುವುದನ್ನು ಅಭಿಮಾನಿಗಳೊಂದಿಗೆ ಶೇರ್‌ ಮಾಡಿಕೊಳ್ಳುತ್ತಿದ್ದೇನೆ ಎಂದು ಹಾಕಿಕೊಂಡಿದ್ದನ್ನು ಇಲ್ಲಿ ಸ್ಮರಿಸಬಹುದು. ಅಕ್ಷಯ್ ಕುಮಾರ್ ಖಳನಟನಾಗಿ ಅಭಿನಯಿಸಿರುವ 2.0 ಸಿನಿಮಾದ ಪಾತ್ರಕ್ಕೆ ಅದ್ಭುತ ಪ್ರತಿಕ್ರಿಯ ವ್ಯಕ್ತವಾಗಿತ್ತು.