ನನಗೆ ಡಿಪ್ರೆಷನ್‌ ಇಲ್ಲ ಆದರೆ, ಆಂಗ್‌ಸೈಟಿ ಇದೆ: ಆಲಿಯಾ ಭಟ್‌

ಬಾಲಿವುಡ್‌ ನಟಿ ಅಲಿಯಾ ಭಟ್‌ ಯಶಸ್ಸಿನ ತುತ್ತತುದಿಯಲ್ಲಿದ್ದಾರೆ. ಚಿತ್ರರಂಗದಲ್ಲಿ ಯಶಸ್ಸು ಅವರ ಕೈ ಹಿಡಿದಿದೆ. ಅವರ ನಟನೆಯ ಗಲ್ಲಿ ಬಾಯ್‌ ದೊಡ್ಡ ಯಶಸ್ಸನ್ನು ಕಂಡಿದೆ. ಅಮಿತಾಬ್‌ ಜತೆ ಕಳಂಕ್‌ ಚಿತ್ರದಲ್ಲಿ ನಟಿಸಿದ್ದು, ಇದೂ ಕೂಡಾ ಭಾರೀ ನಿರೀಕ್ಷೆ ಹುಟ್ಟಿಸಿದೆ. ಇದಲ್ಲದೆ, ಭ್ರಹ್ಮಾಸ್ತ್ರ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಜನಪ್ರಿಯ ನಿರ್ದೇಶಕ ರಾಜಮೌಳಿಯ ಆರ್‌ಆರ್‌ಆರ್‌ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಬಾಳ ಸಂಗಾತಿಯಾಗಿ ರಣಬೀರ್‌ ಕಪೂರ್‌ ಪ್ರೀತಿಯೂ ಸಿಕ್ಕಿದೆ. ಸದ್ಯದಲ್ಲೇ ಮದುವೆಯಾಗಲಿದ್ದಾರೆ. ಇಷ್ಟಾದರೂ, ಸೋಲಿನ ನೆರಳೂ ಸೋಂಕದ ಅಲಿಯಾ ಭಟ್‌ ಕೂಡಾ ಆತಂಕ, ತಲ್ಲಣಗೊಳ್ಳುತ್ತಿದ್ದಾರೆ. ಯಾಕೆ? ತಾವು ಆಂಗ್‌ಸೈಟಿ (ಆತಂಕ) ಯಿಂದ ಬಳಲುತ್ತಿರುವುದಾಗಿ ಸ್ವತಃ ಅಲಿಯಾ ಭಟ್‌ ಹೇಳಿಕೊಂಡಿದ್ದಾರೆ.

'ನನಗೆ ಡಿಪ್ರೆಷನ್‌ ಇಲ್ಲ. ಆದರೆ, ಆಂಗ್‌ಸೈಟಿ ಇದೆ. ಇದು ಆಗಾಗ್ಗೆ ಕಾಣಿಸಿಕೊಳ್ಳುತ್ತಿದೆ. ಕಳೆದ 5-6 ತಿಂಗಳಿನಿಂದ ಹೀಗಾಗುತ್ತಿದೆ. ಆಂಗ್‌ಸೈಟಿ ಅಟ್ಯಾಕ್‌ ಅಲ್ಲ ಇದು. ಆದರೆ ಸಣ್ಣ ಪ್ರಮಾಣದ ತಳಮಳ ಕಾಣಿಸಿಕೊಳ್ಳುತ್ತಿದೆ. ಇದರ ಬಗ್ಗೆ ನನಗೆ ಅರಿವು ಇದೆ ಅನ್ನೋದೇ ಸಮಾಧಾನ. ನನ್ನ ಸಹೋದರಿ ಶಹೀನ್‌ ಭಟ್‌ನಿಂದ ಇದನ್ನು ಅರ್ಥ ಮಾಡಿಕೊಳ್ಳಲು ಸಾಧ್ಯವಾಗಿದೆ. ಅವಳು ಡಿಪ್ರೆಷನ್‌ ವಿರುದ್ಧ ಹೋರಾಡಿದವಳು. ಅವಳ ಪುಸ್ತಕಗಳನ್ನು ನಾನು ಓದುತ್ತಿರುತ್ತೇನೆ. ಇದು ಎಷ್ಟು ಕೆಟ್ಟದಾಗಿದ್ದರೂ ಪರವಾಗಿಲ್ಲ, ಅದನ್ನು ಅನುಭವಿಸುತ್ತೇನೆ. ಕೆಲವೊಮ್ಮೆ ನನಗೆ ಕಾರಣವೇ ಇಲ್ಲದೆ ಸುಮ್ಮನೆ ಅಳಬೇಕೆನ್ನಿಸುತ್ತದೆ. ಆಮೇಲೆ ಆ ಭಾವನೆ ಹೊರಟು ಹೊರಟು ಹೋಗುತ್ತದೆ' ಎಂದು ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದಾರೆ.

'ಮೊದ ಮೊದಲು ನನಗೆ ಸ್ವಲ್ಪ ಕನ್‌ಫ್ಯೂಸ್‌ ಆಗುತ್ತಿತ್ತು. ಆಂಗ್‌ಸೈಟಿ ಕಾಣಿಸಿಕೊಂಡಾಗಲೆಲ್ಲಾ ಅದಕ್ಕೊಂದು ಕಾರಣ ಕೊಟ್ಟುಕೊಳ್ಳುತ್ತಿದ್ದೆ. ಕೆಲಸದ ಒತ್ತಡ ಅಥವಾ ಆಯಾಸದಿಂದ ಹೀಗಾಗಿರಬಹುದು, ಅಥವಾ ಯಾರನ್ನೂ ಭೇಟಿ ಮಾಡಲಾಗದೆ ಇರುವುದರಿಂದ ಹೀಗಾಗುತ್ತಿರಬಹುದು ಎಂದುಕೊಳ್ತಿದ್ದೆ. ನಾನು ಯಾವ ತರದವಳು ಎಂದರೆ, ಕುಬ್ಜಳಾಗಿಬಿಡುತ್ತಿದ್ದೆ. ಇದರ ಬಗ್ಗೆ ನನ್ನ ಸ್ನೇಹಿತರೊಂದಿಗೆ ಮಾತನಾಡಿದೆ, ಅಯಾನ್‌ಗೆ ಹೇಳಿದೆ, ನನ್ನ ಸಹೋದರಿಯ ಸ್ನೇಹಿತ ರೋಹನ್‌ ಜತೆ ಮಾತನಾಡಿದೆ. ಎಲ್ಲರೂ ನಿನಗೆ ಇದು ಗೊತ್ತಾದ ನಂತರ ಹೊರಟು ಹೋಗುತ್ತೆ ಎನ್ನುತ್ತಿದ್ದರು. ಬಹಳ ಮುಖ್ಯವಾದ ಸಂಗತಿ ಏನೆಂದರೆ, ಇದನ್ನು ಒಪ್ಪಿಕೊಳ್ಳುವುದು. ನಾನು ಚೆನ್ನಾಗಿದ್ದೇನೆ ಎಂದು ಹೇಳಬಾರದು. ನೀವು ಆರಾಮಾಗಿಲ್ಲ ಎಂದರೆ, ಆರಾಮಾಗಿಲ್ಲ ಎಂದೇ ಹೇಳಬೇಕು' ಎಂದು ಮುಕ್ತವಾಗಿ ತಮ್ಮ ಭಾವನೆಗಳನ್ನು ಹಂಚಿಕೊಂಡಿದ್ದಾರೆ. ಅಲಿಯಾ ಹೀಗೆ ಮನಸ್ಸುಬಿಚ್ಚಿ ಆಂಗ್‌ಸೈಟಿ ಬಗ್ಗೆ ಮಾತನಾಡಿರುವುದು ಹೀಗೆ ಬಳಲುತ್ತಿರುವ ಹಲವರಿಗೆ ಧೈರ್ಯ, ಸಮಾಧಾನ ನೀಡಿದೆ.

ಕೆಲವೊಮ್ಮೆ ದುಃಖ ಉಮ್ಮಳಿಸಿ ಬರುತ್ತಿತ್ತು. ಕಾರಣವೇ ಇಲ್ಲದೆ ಅಳಬೇಕು ಎನಿಸುತ್ತಿತ್ತು. ಕೆಲ ದಿನಗಳಿಂದ ಹೀಗಾಗುತ್ತಿತ್ತು. ಈಗ ಅದನ್ನು ನಾನು ಸಮರ್ಥವಾಗಿ ಎದುರಿಸುತ್ತಿದ್ದೇನೆ.

-ಆಲಿಯಾ ಭಟ್‌, ನಟಿ