ಕಾಶ್ಮೀರಿ ಸಂಗೀತದ ಫ್ಲೇವರ್‌ ಇರುವ ’ರಾಝಿ’

ಆಲಿಯಾ ಭಟ್‌ ನಟನೆಯ 'ರಾಝಿ' ಚಿತ್ರದ ಟ್ರೇಲರ್‌ ಸಖತ್‌ ಸದ್ದು ಮಾಡಿತ್ತು. ಈಗ ಹಾಡುಗಳ ಸರದಿ. ಗಾಯಕ ಶಂಕರ್‌ ಮಹಾದೇವನ್‌, ಎಹ್ಸಾನ್‌ ನೂರಾನಿ ಮತ್ತು ಲೋಯ್‌ ಜಂಟಿಯಾಗಿ ಸಂಗೀತ ನೀಡಿರುವ ಚಿತ್ರಕ್ಕೆ ಖ್ಯಾತ ಚಿತ್ರಸಾಹಿತಿ ಗುಲ್ಜಾರ್‌ ಅವರ ಸಾಹಿತ್ಯವಿದೆ. ವಿಭಾ ಸರಫ್‌, ಹರ್ಷದೀಪ್‌ ಕೌರ್‌ ಮತ್ತು ಶಂಕರ್‌ ಮಹದೇವನ್‌ರ ಕಂಠಸಿರಿಯಲ್ಲಿ ಗೀತೆಗಳು ಮೂಡಿಬಂದಿದೆ. ಈ ಚಿತ್ರದಲ್ಲಿ ಕಾಶ್ಮೀರಿಯ ಹೆಸರಾಂತ ಮ್ಯೂಸಿಕ್‌ ಮಾದರಿಯನ್ನು ಬಳಸಿಕೊಳ್ಳಲಾಗಿದೆ. ಈ ಸಿನಿಮಾ ಬಹುತೇಕ ಕಾಶ್ಮೀರದಲ್ಲೇ ನಡೆಯುವುದರಿಂದ ಕಾಶ್ಮೀರಿ ಮ್ಯೂಸಿಕ್‌ ಫ್ಲೇವರ್‌ ಇಲ್ಲಿದೆ.

ಈಗಾಗಲೇ ಬಿಡುಗಡೆಯಾಗಿರುವ 'ಏ ವತನ್‌', 'ದಿಲ್‌ ಬರೋ' ಹೀಗೆ ನಾಲ್ಕು ಗೀತೆಗಳು ಸಿನಿಮಾದಲ್ಲಿದ್ದು, ಅಷ್ಟೂ ಗೀತೆಗಳು ಸೂಪರ್‌ ಹಿಟ್‌ ಸಾಲಿನಲ್ಲಿವೆ. ಟ್ರೇಲರ್‌ ನಂತರ ಹಾಡುಗಳು ಟ್ರೆಂಡ್‌ ಮಾಡಿವೆ.

ಅಂದಹಾಗೆ 1971ರಲ್ಲಿ ನಡೆದ ನೈಜ ಘಟನೆಯನ್ನು ಸಿನಿಮಾ ಮಾಡಿದ್ದಾರೆ ನಿರ್ದೇಶಕಿ ಮೇಘನಾ ಗುಲ್ಜಾರ್‌. ಹರೀಂದರ್‌ ಸಿಕ್ಕಾರ ಕಾಲಿಂಗ್‌ ಸೆಹಮತ್‌ ಕಾದಂಬರಿಯ ಎಳೆಯನ್ನೂ ಚಿತ್ರಕ್ಕಾಗಿ ಬಳಸಿಕೊಂಡಿದ್ದಾರೆ ನಿರ್ದೇಶಕರು. ಭಾರತೀಯ ಮಹಿಳಾ ಪತ್ತೆದಾರಿ ಪಾಕಿಸ್ತಾನ ವ್ಯಕ್ತಿಯೊಂದಿಗೆ ಮದುವೆ ಆಗುವ ಮೂಲಕ ದೇಶದ ಪರವಾಗಿ ಕೆಲಸ ಮಾಡುವ ಕಥಾಹಂದರ ಸಿನಿಮಾದಲ್ಲಿದೆ. ಪತ್ತೆದಾರಿ ಮಹಿಳೆಯಾಗಿ ಆಲಿಯಾ ಭಟ್‌ ನಟಿಸಿದ್ದಾರೆ.

ರಾಘಿಯನ್ನು ಜಂಗ್ಲಿ ಪಿಕ್ಚರ್ಸ್‌ ಮತ್ತು ಧರ್ಮ ಪ್ರೊಡಕ್ಷನ್‌ ಅಡಿ ವಿನೀತ್‌ ಜೈನ್‌, ಕರಣ್‌ ಜೋಹರ್‌, ಹೈರೋ ಯಶ್‌ ಜೋಹರ್‌, ಅಪೂರ್ವ ಮೆಹ್ತಾ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಇದೇ ತಿಂಗಳು ಸಿನಿಮಾ ತೆರೆಕಾಣುತ್ತಿದೆ.