ರಾಜಮೌಳಿ ಸಿನಿಮಾ ಆಫರ್‌ ನಿರಾಕರಿಸಿದ ಆಲಿಯಾ ಭಟ್

ಕೈತುಂಬಾ ಸಂಭಾವನೆಯ ಆಫರ್‌ ಇದ್ದರೂ ಎಸ್‌. ಎಸ್‌. ರಾಜಮೌಳಿ ನಿರ್ದೇಶನದ ಆರ್‌ಆರ್‌ಆರ್‌ ಸಿನಿಮಾದಲ್ಲಿ ನಟಿಸಲು ಬಾಲಿವುಡ್‌ ನಟಿ ಆಲಿಯಾ ಭಟ್‌ ನಿರಾಕರಿಸಿದ್ದಾರೆ ಎಂಬ ಸುದ್ದಿ ಈಗ ಸಿನಿಮಾ ಜಗತ್ತಿನಲ್ಲಿ ಹರಿದಾಡುತ್ತಿದೆ.

ಜೂನಿಯರ್‌ ಎಂಟಿಆರ್‌ ಮತ್ತು ರಾಮ್‌ಚರಣ್‌ ತೇಜಾ ನಟನೆಯ ಈ ಸಿನಿಮಾ 300 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗುತ್ತಿದೆ. ಈಗಾಗಲೇ ಕಳಂಕ್‌, ಬ್ರಹ್ಮಾಸ್ತ್ರ, ತಂದೆ ಮಹೇಶ್‌ ಭಟ್‌ ನಿರ್ಮಾಣ ಅವರ ಸಡಕ್‌-2ನಲ್ಲಿ ಬ್ಯುಸಿಯಾಗಿರುವ ಆಲಿಯಾ ವಿಶ್ವದ ಮೊದಲ ವಿಕಲಚೇತನ ಪರ್ವತಾರೋಹಿ ಅರುಣಿಮಾ ಸಿನ್ಹಾ ಜೀವನಕಥೆಯನ್ನು ಆಧರಿಸಿದ ಸಿನಿಮಾದಲ್ಲಿ ಕೂಡ ನಟಿಸುತ್ತಿದ್ದಾರೆ.

ಇದರಿಂದಾಗಿ ಕೈತುಂಬಾ ಸಂಭಾವನೆಯ ಆಫರ್‌ ನೀಡಿದರೂ ರಾಜಮೌಳಿ ಅವರ ಸಿನಿಮಾದ ಆಹ್ವಾನವನ್ನು ನಟಿ ನಯವಾಗಿ ನಿರಾಕರಿಸಿದ್ದಾರೆ ಎಂದು ತಿಳಿದು ಬಂದಿದೆ. ರಾಜಮೌಳಿ ತಮ್ಮ ಮಹತ್ವಾಕಾಂಕ್ಷೆಯ ಸಿನಿಮಾಕ್ಕಾಗಿ ನಾಯಕಿಯ ಹುಡುಕಾಟ ಮುಂದುವರಿಸಿದ್ದು, ಇದರಿಂದಾಗಿಯೇ ಸಿನಿಮಾದ ಶೂಟಿಂಗ್‌ ವಿಳಂಬವಾಗುತ್ತಿದೆ ಎಂದು ಹೇಳಲಾಗುತ್ತಿದೆ.

ಇನ್ನೊಂದು ಕಡೆ ನಟಿ ಪ್ರಿಯಾಮಣಿ ಜಗದ್ವಿಖ್ಯಾತ ನಿರ್ದೇಶಕ ಎಸ್‌ಎಸ್ ರಾಜಮೌಳಿ ನಿರ್ದೇಶನದಲ್ಲಿ ಮುಂಬರುವ 'ಆರ್‌ಆರ್‌ಆರ್' ಚಿತ್ರದಲ್ಲಿ ಪ್ರಮುಖ ಪಾತ್ರವೊಂದನ್ನು ಮಾಡಲಿದ್ದಾರೆ ಎನ್ನಲಾಗುತ್ತಿದೆ. ಈಗಾಗಲೇ ಸೌತ್ ಇಂಡಿಯಾದ ಎಲ್ಲ ಭಾಷೆಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿರುವ ಪ್ರಿಯಾಮಣಿ ಈಗ ರಾಜಮೌಳಿಯವರ ಚಿತ್ರದಲ್ಲೂ ನಟಿಸಲಿದ್ದಾರೆ ಎನ್ನಲಾಗಿದೆ. ಮದುವೆ ನಂತರವೂ ತಮ್ಮ ನಟನೆಯನ್ನು ಪ್ರಿಯಾಮಣಿ ಮುಂದುವರಿಸಿದ್ದಾರೆ ಎಂಬುದು ಗಮನಿಸಬೇಕಾದ ಸಂಗತಿ.