ಸಿನಿಮಾ ಜಗತ್ತು ಕಂಡ 'ಪ್ರತಿಭಾನ್ವಿತ ಕಲಾವಿದ ಇರ್ಫಾನ್ ಖಾನ್‌' ಕುರಿತ ಆಸಕ್ತಿಕರ ಮಾಹಿತಿಗಳು

ಬಾಲಿವುಡ್‌ ಮಾತ್ರವಲ್ಲದೆ, ಹಾಲಿವುಡ್ ಸಿನಿಮಾರಂಗದಲ್ಲಿ ಗಮನಸೆಳೆದ ಪ್ರತಿಭಾನ್ವಿತ ಕಲಾವಿದ ಇರ್ಫಾನ್‌ ಖಾನ್‌. ಕಿರುತೆರೆಯಲ್ಲಿ ಮೊದಲ ಬಣ್ಣದ ಹಚ್ಚಿದ ಇರ್ಫಾನ್, 'ಸಲಾಮ್‌ ಬಾಂಬೆ' ಚಿತ್ರದಲ್ಲಿ ನಟಿಸುವ ಮೂಲಕ ಸಿನಿಮಾರಂಗಕ್ಕೂ ಕಾಲಿಟ್ಟರು. ನಾನಾ ರೀತಿಯ ಪಾತ್ರಗಳ ಮುಖೇನ ಸಿನಿಪ್ರಿಯರನ್ನು ರಂಜಿಸಿದರು. ಅನೇಕ ಪ್ರಶಸ್ತಿಗಳನ್ನು ಪಡೆದರು. ಇದೀಗ ತಮ್ಮ 54 ವಯಸ್ಸಿನಲ್ಲೇ ನಿಧನರಾಗಿದ್ದಾರೆ. ಭಾರತೀಯ ಸಿನಿಮಾ ಜಗತ್ತಿಗೆ ಇದು ತುಂಬಲಾರದ ನಷ್ಟ. ಈ ಸಂದರ್ಭದಲ್ಲಿ ಅವರು ಕುರಿತು ಒಂದಷ್ಟು ವಿಶೇಷವಾದ ಅಪರೂಪದ ಮಾಹಿತಿಗಳು ಇಲ್ಲಿವೆ.

* ಕ್ರಿಕೆಟರ್ ಆಗಬೇಕು ಎಂದುಕೊಂಡಿದ್ದ ಇರ್ಫಾನ್ ಖಾನ್, ಕೊನೆಗೆ ನಟರಾಗಿ ಗುರುತಿಸಿಕೊಂಡರು

* ಜೈಪುರದಲ್ಲಿ ಎಂಎ ಮಾಡಿಕೊಂಡಿದ್ದ ಅವರು 1984ರಲ್ಲಿ ಎನ್‌ಎಸ್‌ಡಿ (ನ್ಯಾಷನಲ್ ಸ್ಕೂಲ್ ಆಫ್‌ ಡ್ರಾಮಾ) ಸೇರಿಕೊಂಡರು

* ಅವರ ಪೂರ್ಣ ಹೆಸರು ಸಹಬ್ಜಾದೆ ಇರ್ಫಾನ್ ಅಲಿ ಖಾನ್‌

* ಎನ್‌ಎಸ್‌ಡಿಯಲ್ಲಿ ಅಂತಿಮ ವರ್ಷ ಓದುತ್ತಿರುವಾಗಲೇ ಮೀರಾ ನಾಯರ್ ಅವರ 'ಸಲಾಮ್ ಬಾಂಬೆ' ಸಿನಿಮಾಕ್ಕೆ ಆಯ್ಕೆ ಆದರು.

ಬಾಲಿವುಡ್‌ನ ಪ್ರಖ್ಯಾತ ನಟ ಇರ್ಫಾನ್ ಖಾನ್ ಇನ್ನಿಲ್ಲ! ಯಾರ ಪ್ರಾರ್ಥನೆಯೂ ಫಲಿಸಲಿಲ್ಲ!

* ಆರಂಭದಲ್ಲಿ ಏಸಿ ರಿಪೇರಿ ಮಾಡುವ ಕೆಲಸ ಮಾಡುತ್ತಿದ್ದ ಇರ್ಫಾನ್‌. ಅವರು ಮೊದಲು ಕೆಲಸ ಆಂಭಿಸಿದ್ದು ಖ್ಯಾತ ನಟ ರಾಜೇಶ್ ಖನ್ನಾ ಅವರ ಮನೆಯ ಏಸಿ ರಿಪೇರಿ ಮಾಡುವ ಮೂಲಕ.


* 1994ರಿಂದ 1998ರವರೆಗೆ ಕಿರುತೆರೆಯಲ್ಲಿ ತುಂಬ ಬೇಡಿಕೆ ಪಡೆದುಕೊಂಡಿದ್ದರು. ಅಷ್ಟರಲ್ಲಾಗಲೇ ಅವರಿಗೆ ಕಿರುತೆರೆ ಬೋರ್ ಆಗಿತ್ತಂತೆ.

* 2012ರಲ್ಲಿ ತಮ್ಮ ಹೆಸರಿನನಲ್ಲಿ ಮತ್ತೊಂದು 'ಆರ್‌' (Irrfan Khan) ಅನ್ನು ಅವರೇ ಸೇರಿಕಸಿಕೊಂಡಿದ್ದರು.

* ಎನ್‌ಎಸ್‌ಡಿಯಲ್ಲಿ ವ್ಯಾಸಾಂಗ ಮಾಡಿದ್ದ ಸುತಾಪಾ ಸಿಕ್ದರ್‌ ಅವರನ್ನು 1995ರಲ್ಲಿ ಇರ್ಫಾನ್ ವಿವಾಹವಾದರು

* ಅತೀ ಎತ್ತರದ ಬಾಲಿವುಡ್‌ ನಟರಲ್ಲಿ ಇರ್ಫಾನ್ ಖಾನ್ ಕೂಡ ಒಬ್ಬರು. ಅವರು 6.1 ಅಡಿ ಎತ್ತರ ಇದ್ದರು.

ಬಹುಮುಖ ವ್ಯಕ್ತಿತ್ವದ ಪ್ರತಿಭಾನ್ವಿತ ನಟ ಇರ್ಫಾನ್ ಖಾನ್ ಅಪರೂಪದ ಚಿತ್ರಗಳು

* ಅವರ ನಟನೆಯ 'ಲಂಚ್‌ ಬಾಕ್ಸ್' ಚಿತ್ರವು ಟೊರೊಂಟೊ ಫಿಲ್ಮ್ ಕ್ರಿಟಿಕ್ಸ್ ಅಸೋಸಿಯೇಷನ್‌ ಪ್ರಶಸ್ತಿಯನ್ನು ಪಡೆದುಕೊಂಡಿತ್ತು. ಆ ಪ್ರಶಸ್ತಿ ಪಡೆದ ಮೊದಲ ಚಿತ್ರ ಇದಾಗಿತ್ತು.

* ಹಾಲಿವುಡ್‌ನ ಖ್ಯಾತ ನಿರ್ದೇಶಕ ಕ್ರಿಸ್ಟೋಫರ್ ನೊಲನ್ ಅವರ 'ಇಂಟರ್‌ಸ್ಟೆಲ್ಲರ್' ಸಿನಿಮಾದಲ್ಲಿ ಒಂದು ಮಹತ್ವದ ಪಾತ್ರವನ್ನು ಇರ್ಫಾನ್‌ ಮಾಡಬೇಕಿತ್ತು. ಆದರೆ, 4 ತಿಂಗಳು ಅಮೆರಿಕದಲ್ಲಿ ಇರಬೇಕು ಎಂಬ ಕಾರಣಕ್ಕೆ ಅದನ್ನು ತಿರಸ್ಕರಿಸಿದರಂತೆ ಇರ್ಫಾನ್!

* ಒಂದು ಸ್ಯೂಟ್‌ಕೇಸ್ ತುಂಬ ಹಣವನ್ನು ತಾಯಿಗೆ ನೀಡುವುದು ಅವರ ಆಸೆಯಾಗಿತ್ತು

* ಇರ್ಫಾನ್ ಖಾನ್ ತುಂಬ ಓದುತ್ತಿದ್ದರು. ಬೆಳಗಿನಜಾವ ಮೂರು ಗಂಟೆಯವರೆಗೆ ಅವರು ಓದುತ್ತಿದ್ದರು. ವಾರದಲ್ಲಿ ಒಂದು ಹಾಲಿವುಡ್‌ ಸ್ಕ್ರಿಪ್ಟನ್ನಾದರೂ ಅವರು ಓದುತ್ತಿದ್ದರಂತೆ.

* ಇರ್ಫಾನ್ ಮುಖ್ಯ ಪಾತ್ರದಲ್ಲಿ ನಟಿಸಿದ ಮೊದಲ ಕಮರ್ಷಿಯಲ್ ಸಿನಿಮಾ 'ರೋಗ್‌'. ಅದು 2005ರಲ್ಲಿ ತೆರೆಗೆ ಬಂದಿತ್ತು.

* ಎರಡು ಆಸ್ಕರ್ ಪ್ರಶಸ್ತಿ ಪಡೆದ ಚಿತ್ರಗಳಲ್ಲಿ ನಟಿಸಿದ ಮೊದಲ ಭಾರತೀಯ ನಟ ಇರ್ಫಾನ್ ಖಾನ್‌. ಅವರ ನಟನೆಯ 'ಸ್ಲಮ್‌ ಡಾಗ್‌ ಮಿಲಿಯೇನರ್‌' ಹಾಗೂ 'ಲೈಫ್‌ ಆಫ್‌ ಪೈ' ಸಿನಿಮಾಗಳಿಗೆ ಆಸ್ಕರ್‌ ಪ್ರಶಸ್ತಿ ಬಂದಿದೆ.

* ಒಂದು ಕಾಲದಲ್ಲಿ ಜುರಾಸಿಕ್ ಪಾರ್ಕ್‌ ಸಿನಿಮಾ ನೋಡಲು ಅವರ ಬಳಿ ಹಣವಿರಲಿಲ್ಲವಂತೆ. ಆದರೆ, 2015ರಲ್ಲಿ 'ಜುರಾಸಿಕ್‌ ವರ್ಲ್ಡ್' ಸಿನಿಮಾದಲ್ಲಿ ಇರ್ಫಾನ್ ನಟಿಸಿದರು

* 'ಪಾನ್‌ ಸಿಂಗ್ ತೋಮರ್‌' ಚಿತ್ರದ ನಟನೆಗಾಗಿ ರಾಷ್ಟ್ರ ಪ್ರಶಸ್ತಿ ಮತ್ತು ಫಿಲ್ಮ್‌ಫೇರ್ ಪ್ರಶಸ್ತಿ ಅವರಿಗೆ ಲಭಿಸಿದೆ.

* ಹಿಂದಿ ಮೀಡಿಯಂ ಚಿತ್ರದ ಅಭಿನಯಕ್ಕಾಗಿ ಅವರು ಫಿಲ್ಮ್‌ಫೇರ್ ಪ್ರಶಸ್ತಿಯನ್ನು ಪಡೆದಿದ್ದಾರೆ

* ಸಿನಿಮಾರಂಗದ ಸಾಧನೆಗಾಗಿ ಅವರಿಗೆ 2011ರಲ್ಲಿ ಪದ್ಮಶ್ರಿ ಪ್ರಶಸ್ತಿಯನ್ನು ನೀಡಲಾಯಿತು