ದಟ್ಟಾರಣ್ಯದಲ್ಲಿ ಕಳೆದು ಹೋದ ಅಮಲಾ ಪೌಲ್‌

ಕಾಲಿವುಡ್‌ ನಟಿ ಅಮಲಾ ಪೌಲ್‌ ಸಿನಿಮಾ ಒಂದರ ಶೂಟಿಂಗ್‌ಗಾಗಿ ದಟ್ಟ ಕಾನನದಲ್ಲಿ ಕಳೆದಿದ್ದಾರೆ. ತಮಿಳಿನ ಅಧೋ ಅಂಧ ಪರವೈ ಪೋಲ ಎಂಬ ನಾಯಕಿ ಪ್ರಧಾನ ಸಿನಿಮಾದಲ್ಲಿ ಕಾಡಿಗೆ ಹೋಗುವ ಮಹಿಳಾ ಉದ್ಯಮಿ ಅರಣ್ಯದಲ್ಲಿ ದಾರಿ ತಪ್ಪಿ ಅಲ್ಲಿಯೇ ಕಾಲ ಕಳೆಯುವ ಕಥೆಯಿದೆ. ಆ ಮಹಿಳಾ ಉದ್ಯಮಿಯ ಪಾತ್ರವನ್ನು ಅಮಲಾ ಪೌಲ್‌ ಮಾಡುತ್ತಿದ್ದಾರೆ.

ದಟ್ಟಾರಣ್ಯದಲ್ಲಿ ಒಬ್ಬಳೇ ಬಂಧಿಯಾಗುವ ನಾಯಕಿ ಹೊರ ಜಗತ್ತಿನ ಯಾವುದೇ ಸಹಾಯವಿಲ್ಲದೆ ಹೇಗೆ ಹೊರಗೆ ಬರುತ್ತಾರೆ ಎಂಬುದರ ರೋಚಕ ಕಥೆಯಿರುವ ಈ ಸಿನಿಮಾಗಾಗಿ ಅಮಲಾ ಪೌಲ್‌ ಸಾಕಷ್ಟು ತರಬೇತಿ ಪಡೆದಿದ್ದಾರೆ ಎಂದು ಈ ಸಿನಿಮಾದ ನಿರ್ದೇಶಕ ವಿನೋದ್‌ ಕೆ.ಆರ್‌ ಹೇಳಿದ್ದಾರೆ. ದಟ್ಟ ಕಾನನದಲ್ಲಿ ನಾಯಕಿ ಫೈಟಿಂಗ್‌ ಮಾಡುವ, ಮರ ಹತ್ತುವ ಮತ್ತು ಸ್ವಿಮ್ಮಿಂಗ್‌ ಮಾಡುವ ಮುಂತಾದ ಸಾಹಸ ದೃಶ್ಯಗಳು ಇದರಲ್ಲಿವೆ ಎಂದು ಅವರು ವಿವರಿಸಿದ್ದಾರೆ.