ಅಪ್ಪನಿಗೆ 102 ವರ್ಷ ವಯಸ್ಸಾದರೆ ಮಗನಿಗೆಷ್ಟು?

ಬಾಲಿವುಡ್‌ನ ಇಬ್ಬರು ದಿಗ್ಗಜರು 26 ವರ್ಷಗಳ ಬಳಿಕ ಮತ್ತೆ ತೆರೆ ಮೇಲೆ ಒಂದಾಗುತ್ತಿರುವ ವಿಷಯ ನಿಮಗೆಲ್ಲ ಗೊತ್ತೇ ಇದೆ. ಬಿಗ್‌ ಬಿ ಅಮಿತಾಭ್ ಮತ್ತು ರಿಷಿ ಕಪೂರ್‌ ಒಟ್ಟಾಗಿ '102 ನಾಟೌಟ್‌' ಎಂಬ ಚಿತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಸಹಜವಾಗಿ ಕುತೂಹಲಕ್ಕೆ ಕಾರಣವಾಗಿದೆ.

ಉಮೇಶ್‌ ಶುಕ್ಲಾ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಈ ಚಿತ್ರದ ಶೂಟಿಂಗ್‌ ಮೇ ತಿಂಗಳಲ್ಲಿ ಪ್ರಾರಂಭವಾಗಿದ್ದು, ಕೆಲವೇ ದೃಶ್ಯಗಳ ಚಿತ್ರೀಕರಣ ಬಾಕಿ ಇದೆ. ಈ ಚಿತ್ರದಲ್ಲಿ ಅಮಿತಾಭ್ 102 ವರ್ಷದ ತಂದೆಯ ಪಾತ್ರದಲ್ಲಿ ಕಾಣಿಸಿಕೊಂಡರೆ, ರಿಷಿ ಕಪೂರ್‌ 75 ವರ್ಷದ ಮಗನಾಗಿ ಮಿಂಚಿದ್ದಾರೆ.

ಅಮಿತಾಬ್‌-ರಿಷಿ ಒಟ್ಟಾಗಿ ಅಭಿನಯಿಸುತ್ತಿರುವ ಖುಷಿ ಒಂದೆಡೆಯಾದರೆ, ಇನ್ನೊಂದೆಡೆ ಇವರಿಬ್ಬರ ಕಂಠದಲ್ಲಿ ಹಾಡೊಂದು ಮೂಡಿ ಬರಲಿದೆ. ಈ ಹಾಡು ಮಜವಾದ ಲಿರಿಕ್ಸ್‌ ಹೊಂದಿದೆಯಂತೆ. ಸದ್ಯಕ್ಕೆ ಅಮಿತಾಭ್ ತಮ್ಮ 75ನೇ ಹುಟ್ಟುಹಬ್ಬದ ನಿಮಿತ್ತ ಕುಟುಂಬದೊಂದಿಗೆ ಮಾಲ್ಡೀವ್ಸ್‌ಗೆ ಹೋಗಿರುವ ಕಾರಣ ಅವರು ಬಂದ ನಂತರ ಹಾಡಿನ ರೆಕಾರ್ಡಿಂಗ್‌ ನಡೆಯಲಿದೆಯಂತೆ. ಇದಕ್ಕಾಗಿ ರಿಷಿ ಕಪೂರ್‌ ಅಭ್ಯಾಸದಲ್ಲಿ ತೊಡಗಿದ್ದಾರಂತೆ.

amitabh bachchan and rishi kapoor to jam for 102 not out