ಸಿನಿಮಾ ಲೋಕದ ಈ ಮಹಾನ್‌ ಸಾಧಕರು ಯಾರು ಎಂದು ಗುರುತಿಸಬಲ್ಲಿರಾ?

ಬ್ಲ್ಯಾಕ್‌ ಆ್ಯಂಡ್‌ ವೈಟ್ ಕಾಲದ ಆ ಫೋಟೋದಲ್ಲಿ ಇಬ್ಬರು ಬಾಲಕಿಯರು ಇದ್ದಾರೆ. ಮುದ್ದು ಮುಖ, ಬೆರಗು ತುಂಬಿದ ಕಣ್ಣುಗಳು, ಆಗಿನ ಕಾಲದ ಫ್ರಾಕ್‌, ಬೈತಲೆ ತೆಗೆದ ಕೇಶವಿನ್ಯಾಸದಲ್ಲಿ ಬಾಲಕಿಯರು ಪೋಸ್‌ ನೀಡಿದ್ದಾರೆ. ಇವರಿಬ್ಬರ ಹೆಸರು ಪ್ರಸ್ತಾಪಿಸದಿದ್ದರೆ ಭಾರತೀಯ ಸಿನಿಮಾರಂಗದ ಇತಿಹಾಸವೇ ಪೂರ್ಣವಾಗುವುದಿಲ್ಲ!

ಇವರು ಯಾರೆಂಬುದು ಈಗಲೂ ಗೊತ್ತಾಗದಿದ್ದರೆ ಇಲ್ಲೊಂದಿಷ್ಟು ಸುಳಿವುಗಳಿವೆ. ಇವರಿಬ್ಬರೂ ಖ್ಯಾತ ಗಾಯಕಿಯರು. ಸಿನಿಮಾ ಸಂಗೀತ ಕ್ಷೇತ್ರದಲ್ಲಿ ಅಚ್ಚಳಿಯದ ಸಾಧನೆ ಮಾಡಿದ್ದಾರೆ. ಎಲ್ಲ ಭಾಷೆಯ ಸಿನಿಮಾಗಳನ್ನೂ ಸೇರಿಸಿದರೆ ಸಾವಿರಾರು ಹಾಡುಗಳಿಗೆ ಧ್ವನಿ ನೀಡಿದ್ದಾರೆ. ಎಲ್ಲಕ್ಕಿಂತ ಮುಖ್ಯವಾಗಿ ಇವರು ಸಹೋದರಿಯರು. ರಾಷ್ಟ್ರ ಪ್ರಶಸ್ತಿ, ಫಿಲ್ಮ್‌ ಫೇರ್‌, ಪದ್ಮಪ್ರಶಸ್ತಿಗಳಿಂದ ಹಿಡಿದು, ನೂರಾರು ಗೌರವಗಳಿಗೆ ಪಾತ್ರರಾಗಿದ್ದಾರೆ.

ಕೋಟ್ಯಂತರ ಅಭಿಮಾನಿಗಳನ್ನು ಸಂಪಾದನೆ ಮಾಡಿರುವ ಈ ಸಹೋದರಿಯರು ಬೇರಾರೂ ಅಲ್ಲ. ಭಾರತದ ಹೆಮ್ಮೆಯ ಗಾಯಕಿಯರಾದ ಲತಾ ಮಂಗೇಶ್ಕರ್‌ ಮತ್ತು ಆಶಾ ಬೋಸ್ಲೆ. ಅವರ ಬಾಲ್ಯದ ಫೋಟೋ ಈಗ ಇಂಟರ್‌ನೆಟ್‌ನಲ್ಲಿ ಸದ್ದು ಮಾಡುತ್ತಿದೆ. ಹಿರಿಯ ನಟ ಅಮಿತಾಭ್‌ ಬಚ್ಚನ್‌ ಅವರು ಚಿತ್ರವನ್ನು ಶೇರ್‌ ಮಾಡಿಕೊಂಡಿದ್ದಾರೆ. ಅದಕ್ಕೆ ಅಭಿಮಾನಿಗಳು ಬಗೆಬಗೆಯಲ್ಲಿ ಕಾಮೆಂಟ್‌ ಮಾಡುತ್ತಿದ್ದಾರೆ. ಹೀಗೆ ಸಾಮಾಜಿಕ ಮಾಧ್ಯಮದಲ್ಲಿ ಸಕ್ರಿಯವಾಗಿರುವ ಅಮಿತಾಭ್‌ ಬಚ್ಚನ್‌ಗೆ ಬರೋಬ್ಬರಿ 4 ಕೋಟಿ ಫಾಲೋವರ್ಸ್‌ ಇದ್ದಾರೆ!

ಅಣ್ಣಾವ್ರನ್ನು ಸ್ಮರಿಸಿದ ಬಿಗ್ ಬಿ ಅಮಿತಾಭ್‌ ಬಚ್ಚನ್

ಟ್ವಿಟರ್‌ನಲ್ಲಿ ಸದಾ ಆ್ಯಕ್ಟೀವ್‌ ಆಗಿರುವ ನಟ ಅಮಿತಾಭ್‌ ಬಚ್ಚನ್‌, ಈ ಹಳೇ ಚಿತ್ರವನ್ನು ಅಭಿಮಾನಿಗಳಿಗಾಗಿ ಪೋಸ್ಟ್‌ ಮಾಡಿದ್ದಾರೆ. 'ಲತಾ ಜಿ ಮತ್ತು ಆಶಾ ಜಿ ಬಾಲ್ಯದ ಚಿತ್ರ. ಇಂದು ಲತಾ ಅವರು ಟ್ವಿಟರ್‌ನಲ್ಲಿ ತಮ್ಮ ಗುರುಗಳನ್ನು ನೆನಪು ಮಾಡಿಕೊಂಡಿದ್ದನ್ನು ಓದಿದೆ. ಅಚಾನಕ್‌ ಆಗಿ ನನಗೆ ಈ ಫೋಟೋ ಸಿಕ್ಕಿತು. ಟೆಲಿಪತಿ!' ಎಂದು ಅಮಿತಾಭ್‌ ಬಚ್ಚನ್‌ ಟ್ವೀಟ್‌ ಮಾಡಿದ್ದಾರೆ. ತಮ್ಮ ನೆಚ್ಚಿನ ಗಾಯಕಿಯರ ಬಾಲ್ಯದ ಫೋಟೋವನ್ನು ಕಂಡ ಅಭಿಮಾನಿಗಳು ಸಖತ್‌ ಖುಷಿ ಆಗಿದ್ದಾರೆ.


ಇಂಟರ್‌ನೆಟ್‌ನಲ್ಲಿ ಹವಾ ಸೃಷ್ಟಿ ಮಾಡಿದಳು ಜ್ಯೂನಿಯರ್ ಲತಾ ಮಂಗೇಶ್ಕರ್; ಆಕೆಯ ಪ್ರಾಯ ಎರಡು ವರ್ಷ