ಪತ್ನಿಗಾಗಿ ಎಂ ಎಫ್ ಹುಸ್ಸೇನ್ ಬಳಿ ಡೀಲ್ ಮಾಡಿಕೊಂಡಿದ್ದ ಅನಿಲ್ ಕಪೂರ್

ಬಾಲಿವುಡ್ ಧಕ್ ಧಕ್ ಬೆಡಗಿ ಮಾಧುರಿ ದೀಕ್ಷಿತ್ ಎಂದರೆ ಕೇವಲ ಸಿನಿಮಾ ಚಿತ್ರಸಿಕರಿಗಷ್ಟೇ ಅಲ್ಲ ಖ್ಯಾತ ಕುಂಚ ಕಲಾವಿದ ಎಂ.ಎಫ್. ಹುಸ್ಸೇನ್‍ಗೂ ಸಾಕಷ್ಟು ಅಭಿಮಾನ ಇತ್ತು. ಹಾಗಾಗಿ ಅವರು ರಚಿಸಿದ ಚಿತ್ರಪಟವನ್ನು ಪಡೆದುಕೊಳ್ಳಲು ಅನಿಲ್ ಕಪೂರ್ ಏನು ಮಾಡಿದರು ಗೊತ್ತಾ?

ಅನಿಲ್ ಕಪೂರ್ ಮನೆಯಲ್ಲಿ ಅದೆಷ್ಟೋ ಮಂದಿ ಕಲಾವಿದರು ರಚಿಸಿರುವ ಚಿತ್ರಪಟಗಳಿವೆಯಂತೆ. ಆದರೆ ಎಂ ಎಫ್ ಹುಸ್ಸೇನ್ ರಚಿಸಿರುವ ಚಿತ್ರಪಟ ಮಾತ್ರ ಇರಲಿಲ್ಲ. ಹುಸ್ಸೇನ್ ರಚಿಸಿರುವ ಚಿತ್ರಪಟ ಬೇಕು ಎಂದು ಅವರ ಪತ್ನಿ ಸುನಿತಾ ಕಪೂರ್ ಕೇಳುತ್ತಿದ್ದರಂತೆ.

ಆದರೆ ಆಗ ಹುಸ್ಸೇನ್ ರಚಿಸಿದ ಪೇಯಿಂಟಿಂಗ್ ಕೊಳ್ಳುವಷ್ಟು ಸಾಮರ್ಥ್ಯ ಅನಿಲ್‌ ಕಪೂರ್‌ಗೆ ಇರಲಿಲ್ಲ. ಅದೇ ಸಮಯದಲ್ಲಿ ಹುಸ್ಸೇನ್ ತನ್ನ ಆರಾಧ್ಯ ನಟಿ ಮಾಧುರಿಯನ್ನು ಭೇಟಿಯಾಬೇಕು ಎಂದುಕೊಳ್ಳುತ್ತಿದ್ದಾರೆ ಎಂಬ ಸಂಗತಿ ತಿಳಿಯಿತಂತೆ. ಇದೇ ಒಳ್ಳೆಯ ಅವಕಾಶ ಎಂದುಕೊಂಡ ಅನಿಲ್, ಹುಸ್ಸೇನ್‌ರನ್ನು ಭೇಟಿಯಾಗಲು ಹೋದರು.

"ಮಾಧುರಿ ಅವರನ್ನು ಭೇಟಿ ಮಾಡಿಸುತ್ತೇನೆ. ಅದಕ್ಕೆ ಉಡುಗೊರೆಯಾಗಿ ನೀವು ರಚಿಸಿರುವ ಚಿತ್ರಗಳನ್ನು ನೀಡುತ್ತೀರಾ" ಎಂದು ಕೇಳಿದರಂತೆ. ಇದಕ್ಕೆ ಹುಸ್ಸೇನ್ ಒಪ್ಪಿಕೊಂಡರು. ಈಗಲೂ ಆ ಚಿತ್ರಪಟಗಳೆಲ್ಲಾ ತುಂಬಾ ಮುತುವರ್ಜಿಯಿಂದ ನೋಡಿಕೊಳ್ಳುತ್ತೇನೆ ಎಂದಿದ್ದಾರೆ ಅನಿಲ್ ಕಪೂರ್. ಆ ರೀತಿ ಪತ್ನಿ ಆಸೆ ಪಟ್ಟ ಕಲಾಕೃತಿಗಳನ್ನು ನೀಡಲು ಹುಸ್ಸೇನ್‌ ಜತೆಗೆ ಅನಿಲ್ ಮಾಡಿಕೊಂಡ ಡೀಲ್ ಇದು. ಸಂದರ್ಭ ಸಿಕ್ಕಾಗಲೆಲ್ಲಾ ಈಗಲೂ ಅದನ್ನು ಅವರು ಸ್ಮರಿಸುತ್ತಿರುತ್ತಾರೆ.

ಇತ್ತೀಚೆಗೆ ಕಾಮಿಡಿಯನ್ ಕಪಿಲ್ ಶರ್ಮಾ ಶೋದಲ್ಲಿ 'ಟೋಟಲ್ ಧಮಾಲ್' ಚಿತ್ರತಂಡ ಭಾಗವಹಿಸಿತ್ತು. ಆಗ ಅನಿಲ್ ಕಪೂರ್ ಈ ಎಲ್ಲಾ ಸಂಗತಿಗಳನ್ನು ಹಂಚಿಕೊಂಡಿದ್ದಾರೆ. ಹದಿನೈದು ವರ್ಷಗಳ ಬಳಿಕ ಅನಿಲ್ ಕಪೂರ್ ಮತ್ತು ಮಾಧುರಿ ದೀಕ್ಷಿತ್ ಜತೆಯಾಗಿ ಅಭಿನಯಿಸಿರುವ ಸಿನಿಮಾ ಇದು. ಇಂದ್ರ ಕುಮಾರ್ ನಿರ್ದೇಶನದಲ್ಲಿ ಮೂಡಿಬಂದಿದೆ.