ವಿಚ್ಛೇದನದ ಬಳಿಕವೂ ಮಲೈಕಾ ಜತೆಗೆ ಸ್ನೇಹದಿಂದ ಇದ್ದೇನೆ: ಅರ್ಬಾಜ್ ಖಾನ್

ವಿಚ್ಛೇದನದ ಬಳಿಕ ಕೂಡ ತನ್ನ ಮಾಜಿ ಪತ್ನಿ, ನಟಿ ಮಲೈಕಾ ಅರೋರಾ ಜತೆಗೆ ಸ್ನೇಹದಿಂದ ಇರುವುದಾಗಿ ನಟ, ನಿರ್ಮಾಪಕ ಅರ್ಬಾಜ್ ಖಾನ್ ತಿಳಿಸಿದ್ದಾರೆ. 1998ರಲ್ಲಿ ಮದುವೆಯಾದ ಈ ಜೋಡಿ 2017ರಲ್ಲಿ ಕೆಲವು ಕಾರಣಳಿಂದಾಗಿ ದೂರವಾದರು.

ತಮ್ಮ 16 ವರ್ಷಗಳ ವೈವಾಹಿಕ ಜೀವನಕ್ಕೆ ಗುಡ್ ಬೈ ಹೇಳುತ್ತಿರುವುದಾಗಿ ಅಧಿಕೃತವಾಗಿ ಬಹಿರಂಗಪಡಿಸಿದರು. ಇದೀಗ ಮಲೈಕಾ ಜತೆಗಿನ ಬಂಧನದ ಬಗ್ಗೆ ಅರ್ಬಾಜ್ ಖಾನ್ ಮಾತನಾಡಿದ್ದಾರೆ. ದೂರದೃಷ್ಟಿಯಿಂದ ಯೋಚಿಸಿ, ಪರಿಸ್ಥಿತಿಗೆ ಅನುಗುಣವಾಗಿ ವಿಚ್ಛೇದನ ತೆಗೆದುಕೊಳ್ಳಬೇಕೆಂದು ತೀರ್ಮಾನಿಸಿದೆವು ಎಂದಿದ್ದಾರೆ.

"ನಾವಿಬ್ಬರೂ ಬಹಳಷ್ಟು ವರ್ಷ ಜತೆಗೆ ಬಾಳಿದೆವು. ನಮ್ಮ ನಡುವೆ ಸಾಕಷ್ಟು ಭಾವನೆಗಳಿವೆ. ನಮಗೆ ಮಕ್ಕಳೂ ಇದ್ದಾರೆ. ಹಾಗಾಗಿ ಒಬ್ಬರ ಮೇಲೆ ಇನ್ನೊಬ್ಬರಿಗೆ ಗೌರವವೂ ಇದೆ. ಇಬ್ಬರೂ ಜತೆಯಾಗಿ ಒಂದೇ ಮನೆಯಲ್ಲಿ ಸಂತೋಷವಾಗಿ ಇರಲು ಸಾಧ್ಯವಿಲ್ಲ ಎಂದುಕೊಂಡೆವು. ಕೆಲವು ಭಿನ್ನಾಭಿಪ್ರಾಯಗಳು ತಲೆದೋರಿದವು. ಇದರ ಅರ್ಥ ಒಬ್ಬರನ್ನೊಬ್ಬರು ದ್ವೇಷಿಸಿಕೊಳ್ಳುತ್ತಿದ್ದೀವಿ ಎಂದಲ್ಲ. ಇಬ್ಬರೂ ಪರಿಸ್ಥಿತಿಯನ್ನು ನಿಭಾಯಿಸಿದೆವು. ಈಗಲೂ ಅಷ್ಟೇ ಅವರ ಕುಟುಂಬಿಕರ ಜತೆಗೆ ನಾನು ಸ್ನೇಹದಿಂದ ಇದ್ದೇನೆ. ಮಕ್ಕಳು ದೊಡ್ಡವರಾದ ಬಳಿಕ ಎಲ್ಲವೂ ಸರಿಹೋಗುತ್ತದೆ" ಎಂದಿದ್ದಾರೆ ಅರ್ಬಾಜ್. [ಹೃದಯ ಛಿದ್ರವಾದ ಟೀ ಶರ್ಟ್ ಧರಿಸಿದ ಮಲೈಕಾ ಫೋಟೋ ವೈರಲ್]

ಇನ್ನೊಂದು ಕಡೆ ಪ್ರಮುಖ ನಿರ್ಮಾಪಕ ಬೋನಿ ಕಪೂರ್ ಮಗ ಅರ್ಜುನ್ ಕಪೂರ್, ಮಲೈಕಾ ಡೇಟಿಂಗ್ ಮಾಡುತ್ತಿದ್ದಾರೆ ಎಂಬ ಸುದ್ದಿ ಇದೆ. ಈ ವಿಷಯವನ್ನು ಅರ್ಜುನ್ ಪರೋಕ್ಷವಾಗಿ ಅಂಗೀಕರಿಸಿದ್ದಾರೆ. ಅರ್ಬಾಜ್ ಖಾನ್ ಸಹ ಇಟಲಿಯ ಮಾಡೆಲ್ ಒಬ್ಬರನ್ನು ಪ್ರೀತಿಸುತ್ತಿದ್ದಾರೆ. ಈ ಸಂಗತಿಯನ್ನು ಅವರೇ ಸ್ವತಃ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಆದರೆ ಆ ಮಾಡೆಲ್ ಹೆಸರನ್ನು ಬಹಿರಂಗಪಡಿಸಿಲ್ಲ.