ಮುರಿದು ಬಿತ್ತು ತಾರಾ ಜೋಡಿಯ ವೈವಾಹಿಕ ಬದುಕು; ಇನ್‌ಸ್ಟಾಗ್ರಾಮ್‌ನಲ್ಲಿ ಘೋಷಣೆ

ಜಿಸ್ಮ್ 2, ಆಯೇಷಾ ಚಿತ್ರಗಳಲ್ಲಿ ನಟಿಸಿರುವ ಬಾಲಿವುಡ್ ನಟ ಅರುಣೋದಯ್ ಸಿಂಗ್ ತನ್ನ ಪತ್ನಿ ಲೀ ಎಲ್ಟನ್‌ಗೆ ವಿಚ್ಛೇದನ ನೀಡುತ್ತಿರುವುದಾಗಿ ಇನ್‍ಸ್ಟಾಗ್ರಾಮ್‌ನಲ್ಲಿ ಘೋಷಿಸಿದ್ದಾರೆ. "ಇಂತಹ ವಿಷಾದನೀಯ ಪೋಸ್ಟ್ ಮಾಡುತ್ತೇನೆ ಎಂದುಕೊಂಡಿರಲಿಲ್ಲ. ನನ್ನ ವಿವಾಹ ಬಂಧನ ಮುಗಿದ ಅಧ್ಯಾಯ" ಎಂದಿದ್ದಾರೆ.

"ಪ್ರೀತಿಸಿಕೊಂಡಾಗ ನಾವು ತುಂಬಾ ಸಂತೋಷವಾಗಿ ಇದ್ದೆವು. ಆದರೆ ಮದುವೆ ಬಳಿಕ ಅಷ್ಟೇ ಆನಂದದಿಂದ ಮುಂದೆ ಸಾಗಲು ಆಗುತ್ತಿಲ್ಲ. ಆದರೆ ನಮ್ಮ ಬಾಂಧವ್ಯವನ್ನು ಉಳಿಸಿಕೊಳ್ಳಲು ಎಲ್ಲಾ ರೀತಿಯ ಪ್ರಯತ್ನಗಳನ್ನು ಮಾಡಿದೆವು. ಕೌನ್ಸೆಲಿಂಗ್ ತೆಗೆದುಕೊಂಡೆವು. ಕೆಲವು ದಿನಗಳ ಕಾಲ ದೂರ ಇದ್ದೆವು. ಆದರೆ ಅದ್ಯಾವುದೂ ನಮ್ಮ ಬಂಧನವನ್ನು ಗಟ್ಟಿಗಿಳಿಸಲಿಲ್ಲ. ಇದರಿಂದ ದೂರವಾಗುವುದೇ ಬುದ್ಧಿವಂತಿಕೆಯ ಕೆಲಸ ಅನ್ನಿಸಿತು. ನಮ್ಮಿಬ್ಬರಿಗೂ ಇದೇ ಒಳ್ಳೆಯದು. ಇದನ್ನು ನಾವು ಗೌರವಯುತವಾಗಿ ಪರಿಷ್ಕರಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದೇವೆ" ಎಂದು ಭಾವನಾತ್ಮಕವಾಗಿ ಪೋಸ್ಟ್ ಮಾಡಿದ್ದಾರೆ ಅರುಣೋದಯ್ ಸಿಂಗ್.

ಅರುಣೋದಯ್ ಸಿಂಗ್ ಕೆನಡಾ ಮೂಲದ ಲೀ ಎಲ್ಟನ್‌ರನ್ನು ಪ್ರೀತಿಸಿ ಮದುವೆಯಾಗಿದ್ದರು. ಎಲ್ಟನ್‌ಗೆ ಗೋವಾದಲ್ಲಿ ಒಂದು ರೆಸ್ಟೋರೆಂಟ್ ಇದೆ. ಗೋವಾಗೆ ಹೋಗಿದ್ದ ಅರುಣೋದಯ್‌ಗೆ ಎಲ್ಟನ್ ಪರಿಚಯವಾಗಿದ್ದರು. ಅದು ಬಳಿಕ ಪ್ರೀತಿಯಾಗಿ ಮಾರ್ಪಟ್ಟಿತ್ತು. 2016ರಲ್ಲಿ ಇವರಿಬ್ಬರೂ ಮದುವೆ ಮೂಲಕ ಒಂದಾದರು.
p
ಭೂಪಾಲ್‌ನಲ್ಲಿ ಹಿಂದೂ ಸಂಪ್ರದಾಯದಂತೆ ಇವರ ಮದುವೆ ನಡೆಯಿತು. ರಾಯಲ್ ಮದುವೆ ನೆನಪಿಸುವಂತೆ ಅದ್ದೂರಿಯಾಗಿ ಮದುವೆ ನಡೆಯಿತು. ಪ್ರೀತಿಸಿ ಮದುವೆಯಾದ ಈ ಜೋಡಿ ಇಷ್ಟು ಬೇಗ ದೂರವಾಗುತ್ತಿರುವುದು ಅವರ ಸ್ನೇಹಿತರು, ಅಭಿಮಾನಿಗಳಿಗೆ, ಬಂಧು ಬಳಗಕ್ಕೆ ನೋವಿನ ವಿಚಾರವೇ ಸರಿ.