'ಬಾಹುಬಲಿ' ವೀಡಿಯೋ ಸ್ಟ್ರೀಮಿಂಗ್‌ ಹಕ್ಕು ಪಡೆಯಲು ಆ ಸಂಸ್ಥೆ ನೀಡಿದ್ದೆಷ್ಟು?

ಎಸ್‌ಎಸ್‌ ರಾಜಮೌಳಿ ನಿರ್ದೇಶನದ 'ಬಾಹುಬಲಿ' ಸರಣಿ ಚಿತ್ರಗಳು ಬಿಡುಗಡೆ ಆದಾಗಿನಿಂದಲೂ ಒಂದಿಲ್ಲೊಂದು ಕಾರಣಕ್ಕೆ ಸುದ್ದಿ ಆಗುತ್ತಲಿವೆ. ಇನ್ನು 'ಬಾಹುಬಲಿ-2' ಚಿತ್ರ 100 ದಿನಗಳನ್ನು ಪೂರೈಸಿದ್ದು, ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ನಲ್ಲೂ ಭರ್ಜರಿ ದಾಖಲೆ ನಿರ್ಮಿಸಿದೆ. ಈಗ 'ಬಾಹುಬಲಿ' ಚಿತ್ರದ ಮುಕುಟಕ್ಕೆ ಮತ್ತೊಂದು ಗರಿ ಮೂಡಿದಂತಾಗಿದೆ.

ಜಗತ್ತಿನ ಅತಿದೊಡ್ಡ ವಿಡಿಯೋ ಸ್ಟ್ರೀಮಿಂಗ್ ಸಂಸ್ಥೆಯಾದ ನೆಟ್‌ಫ್ಲಿಕ್ಸ್, ಪ್ರಭಾಸ್‌ ಅಭಿನಯದ 'ಬಾಹುಬಲಿ' ಮತ್ತು 'ಬಾಹುಬಲಿ 2' ಚಿತ್ರಗಳ ಪ್ರಸಾರದ ಹಕ್ಕುಗಳನ್ನು ಪಡೆದುಕೊಂಡಿದೆ ಎಂದು ವರದಿಯಾಗಿದೆ. ಮೂಲಗಳ ಪ್ರಕಾರ ನೆಟ್‌ಫ್ಲಿಕ್ಸ್ 'ಬಾಹುಬಲಿ' ಸರಣಿ ಚಿತ್ರಗಳ ತಮಿಳು, ಹಿಂದಿ ಮತ್ತು ಮಲಯಾಳಂ ಆವೃತ್ತಿಯ ಪ್ರಸಾರದ ಹಕ್ಕಗಳನ್ನು ಸುಮಾರು 25.5 ಕೋಟಿ ರೂ.ಗೆ ಖರೀದಿಸಿದೆಯಂತೆ.

ಟಿವಿ ಕಾರ್ಯಕ್ರಮಗಳು ಹಾಗೂ ಸಿನಿಮಾಗಳನ್ನು ಕಂಪ್ಯೂಟರ್, ಮೊಬೈಲ್ ಅಥವಾ ಸ್ಮಾರ್ಟ್ ಟಿವಿಯಲ್ಲಿ ನೋಡಲು ನೆಟ್‌ಫ್ಲಿಕ್ಸ್ ಸಂಸ್ಥೆ ಅನುಕೂಲ ಮಾಡಿಕೊಡುತ್ತದೆ. ಇನ್ನು 'ಬಾಹುಬಲಿ 2' ಚಿತ್ರ 100 ದಿನಗಳಲ್ಲಿ ಜಗತ್ತಿನಾದ್ಯಂತ 1700 ಕೋಟಿ ಕಲೆಕ್ಷನ್‌ ಮಾಡಿದೆ ಎನ್ನಲಾಗುತ್ತಿದೆ.