ಬೆಂಗಳೂರು ಮೂಲದ ನಿಧಿ ಅಗರ್ವಾಲ್ 'ಮುನ್ನಾ ಮೈಖೇಲ್' ಹಿಂದಿ ಚಿತ್ರದೊಂದಿಗೆ ಬಾಲಿವುಡ್ಗೆ ಪದಾರ್ಪಣೆ ಮಾಡುತ್ತಿದ್ದು ಟೈಗರ್ ಶ್ರಾಫ್ಗೆ ನಾಯಕಿಯಾಗಿ ನಟಿಸಲಿದ್ದಾರೆ. ನಿಧಿ, ಮಾಡೆಲಿಂಗ್ ಮೂಲದ ಬೆಡಗಿ. ಬಿಸ್ನೆಸ್ ಮ್ಯಾನೇಜ್ಮೆಂಟ್ನಲ್ಲಿ ಪದವಿ ಪಡೆದು, ಫ್ಯಾಷನ್ ಕೋರ್ಸ್ವೊಂದನ್ನು ಮಾಡುತ್ತಿದ್ದರು. ಇದೀಗ ಕೋರ್ಸ್ ತೊರೆದು ಬಾಲಿವುಡ್ನಲ್ಲಿ ಭವಿಷ್ಯ ಅರಸುತ್ತಾ ಮುಂಬಯಿಗೆ ತೆರಳುತ್ತಿದ್ದಾರೆ. ಈ ಮೊದಲು 'ಬಾಘಿ' ಹಿಂದಿ ಸಿನಿಮಾ ನಿರ್ದೇಶಿಸಿದ್ದ ಸಬ್ಬೀರ್ ಖಾನ್ ನಿರ್ದೇಶನದಲ್ಲಿ 'ಮುನ್ನಾ ಮೈಖೇಲ್' ಮ್ಯೂಸಿಕಲ್-ಆ್ಯಕ್ಷ ನ್-ಡ್ರಾಮಾ ಸಿನಿಮಾ ಸೆಟ್ಟೇರಲಿದೆ.
ಚಿತ್ರದ ನಾಯಕಿ ಪಾತ್ರಕ್ಕೆ ನಡೆದ ಆಡಿಷನ್ನಲ್ಲಿ ಮುನ್ನೂರಕ್ಕೂ ಹೆಚ್ಚು ಸುಂದರಿಯರು ಪಾಲ್ಗೊಂಡಿದ್ದರಂತೆ. ನಾಯಕಿ ಪಾತ್ರಕ್ಕಾಗಿ ಶಾಸ್ತ್ರೀಯ ನೃತ್ಯದಲ್ಲಿ ಪರಿಣತಿಯಿರುವ ಯುವತಿಗಾಗಿ ನಿರ್ದೇಶಕರು ಹುಡುಕಾಟ ನಡೆಸಿದ್ದರು. ಇದು ನಿಧಿಗೆ ವರವಾಯ್ತು. ಆಕೆ ಕಳೆದ ಏಳು ವರ್ಷಗಳಿಂದ ಬ್ಯಾಲೆಟ್, ಕಥಕ್ ಮತ್ತು ಬೆಲ್ಲಿ ಡ್ಯಾನ್ಸ್ ಕಲಿಯುತ್ತಿದ್ದಾರೆ. ಅಷ್ಟೇ ಅಲ್ಲ ಭಾರತೀಯ ಮತ್ತು ಪಾಶ್ಚಿಮಾತ್ಯ ನೃತ್ಯವೂ ಅವರಿಗೆ ಗೊತ್ತು. ಹಾಗಾಗಿ ಪಾತ್ರಕ್ಕೆ ಸೂಕ್ತ ಯುವತಿ ಎಂದು ಅಂತಿಮವಾಗಿ ನಿರ್ದೇಶಕರು ನಿಧಿಯನ್ನು ಆಯ್ಕೆ ಮಾಡಿದ್ದಾರೆ.
'ಒಪ್ಪಂದಕ್ಕೆ ಸಹಿ ಹಾಕಿದ ನಂತರ ನಾನು ಬೆಂಗಳೂರಿಗೆ ಹಿಂತಿರುಗಿದೆ. ನನ್ನ ಚಿತ್ರದ ಹೀರೋ ಯಾರೆನ್ನುವುದನ್ನು ಪೋಷಕರಿಗೆ ಹೇಳದೆ ಗೋಪ್ಯವಾಗಿಟ್ಟಿದ್ದೆ. ಟೈಗರ್ ಶ್ರಾಫ್ ಜೋಡಿಯಾಗಿ ನಟಿಸಲಿರುವ ವಿಷಯ ತಿಳಿದು ಅಪ್ಪ ತುಂಬಾ ಖುಷಿಪಟ್ಟರು. ಅಪ್ಪ ಕೂಡ ಕರಾಟೆ ಚಾಂಪಿಯನ್ ಆಗಿದ್ದು, ಕರಾಟೆ ಕಲಿತಿರುವ ಹೀರೋ ಟೈಗರ್ ಶ್ರಾಫ್ ಅಂದ್ರೆ ಅವರಿಗೂ ಇಷ್ಟ' ಎನ್ನುತ್ತಾರೆ ನಿಧಿ. ಮಾಡೆಲಿಂಗ್, ರಾರಯಂಪ್ವಾಕ್ ಮಾಡಿಕೊಂಡಿದ್ದ ನಿಧಿಗೆ ಸಿನಿಮಾ ನಟಿಯಾಗಬೇಕೆನ್ನುವ ಕನಸಿತ್ತಂತೆ. ಇದೀಗ ಅದೃಷ್ಟ ಅವರ ಕೈಹಿಡಿದಿದ್ದು ಬಾಲಿವುಡ್ ಹಾಟ್ ಹೀರೋ ಟೈಗರ್ ಶ್ರಾಫ್ಗೆ ಜೋಡಿಯಾಗುವ ಅವಕಾಶ ಸಿಕ್ಕಿದೆ.
'ರಸ್ತೆ ಬದಿಯಲ್ಲಿ ಹಿರೋಯಿನ್ ಐಶ್ವರ್ಯಾ ರೈ ಹೋರ್ಡಿಂಗ್ಗಳನ್ನು ನೋಡಿದಾಗಲೆಲ್ಲಾ ಅಲ್ಲಿ ನನ್ನ ಫೋಟೋಗಳೂ ಇರುವಂತಾಗಬೇಕು ಎಂದುಕೊಳ್ಳುತ್ತಿದ್ದೆ. ಅಂತಿಮವಾಗಿ ಆಸೆ ಕೈಗೂಡಿದೆ! ಚಿತ್ರದಲ್ಲಿ ಆ್ಯಕ್ಷ ನ್ ಜತೆ ಡಾನ್ಸ್ಗೂ ಹೆಚ್ಚು ಸ್ಕೋಪ್ ಇದೆ' ಎಂದು ಸಂಭ್ರಮಿಸುವ ನಿಧಿ ಸದ್ಯ ಪಾತ್ರಕ್ಕಾಗಿ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ. 'ಮುನ್ನಾ ಮೈಖೇಲ್' ಚಿತ್ರದ ಮತ್ತೊಂದು ಪ್ರಮುಖ ಪಾತ್ರದಲ್ಲಿ ನವಾಜುದ್ದೀನ್ ಸಿದ್ದಿಕಿ ನಟಿಸಲಿದ್ದಾರೆ ಎನ್ನುವುದು ವಿಶೇಷ.