ಭಾರತದ ಆ್ಯನಿಮೇಷನ್ ಪ್ರವರ್ತಕ ಭೀಮ್‌ಸೈನ್ ವಿಧಿವಶ

ಬಾಲಿವುಡ್‌ನ ಹಿರಿಯ ಚಲನಚಿತ್ರ ನಿರ್ಮಾಪಕ ಮತ್ತು ಭಾರತೀಯ ಸಿನಿಮಾಗಳ ಆ್ಯನಿಮೇಷನ್ ಪ್ರವರ್ತಕ ಭೀಮ್‍ಸೈನ್ (81) ಬುಧವಾರ ಮುಂಬೈನಲ್ಲಿ ವಿಧಿವಶರಾಗಿದ್ದಾರೆ. ಅವರ ನಿರ್ಮಾಣದ 'ಘರಾಂಡ' ಮತ್ತು ಆ್ಯನಿಮೇಷನ್ ಕಿರುಚಿತ್ರ 'ಏಕ್ ಅನೇಕ್ ಏಕ್ತಾ' ಚಿತ್ರಗಳ ಮೂಲಕ ಜನಪ್ರಿಯರಾಗಿದ್ದಾರೆ.

ಮೂತ್ರಪಿಂಡ ವೈಫ್ಯಲ್ಯದಿಂದ ಬಳಲುತ್ತಿದ್ದ ಅವರು ಮುಂಬೈ ಜುಹು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಮಂಗಳವಾರ ರಾತ್ರಿ ನಿಧನರಾಗಿದ್ದಾರೆ. ಅವರಿಗೆ ಪತ್ನಿ ನೀಲಂ ಮತ್ತು ಪುತ್ರರಾದ ಹಿಮಾಂಶು, ಕಿರೀತ್ ಖುರಾನಾ ಇದ್ದಾರೆ.

ದೂರದರ್ಶನ ಸುವರ್ಣಯುಗದಲ್ಲಿದ್ದಂತಹ ಸಮಯದಲ್ಲಿ ಭೀಮ್‍ಸೈನ್ ಆ್ಯನಿಮೇಷನ್ ಮೂಲಕ ಗುರುತಿಸಿಕೊಂಡವರು. ಹಾಗಾಗಿಯೇ ಅವರನ್ನು ಭಾರತೀಯ ಆ್ಯನಿಮೇಷನ್ ಪ್ರವರ್ತಕ ಎಂದು ಗುರುತಿಸುತ್ತಾರೆ. ಆ್ಯನಿಮೇಷನ್ ಮೂಲಕ ಅತ್ತ ಚಿತ್ರರಂಗ ಇತ್ತ ಕಿರುತೆರೆಯನ್ನು ಉತ್ಕೃಷ್ಟಗೊಳಿಸಿದ ಖ್ಯಾತಿ ಇವರದು.

1936ರಲ್ಲಿ ಮುಲ್ತಾನ್‌ನಲ್ಲಿ (ಇಂದಿನ ಪಾಕಿಸ್ತಾನ) ಭೀಮ್‍ಸೈನ್ ಜನಿಸಿದರು. ಲಖನೌ ವಿಶ್ವವಿದ್ಯಾಲಯದಲ್ಲಿ ಚಿತ್ರಕಲೆ ಮತ್ತು ಶಾಸ್ತ್ರೀಯ ಸಂಗೀತದಲ್ಲಿ ಡಿಪ್ಲೊಮಾ ಪದವಿ ಪಡೆದ ಶ್ರೀಯುತರು 1970ರಲ್ಲಿ 'ದಿ ಕ್ಲೈಂಬ್' ಎಂಬ ಆ್ಯನಿಮೇಷನ್ ಕಿರುಚಿತ್ರದ ಮೂಲಕ ನಿರ್ದೇಶನಕ್ಕೆ ಅಡಿಯಿಟ್ಟರು. ಶಿಕಾಗೋ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶನ ಕಂಡಿದ್ದ ಈ ಚಿತ್ರಕ್ಕೆ ಸಿಲ್ವರ್ ಹ್ಯೂಗೋ ಪ್ರಶಸ್ತಿ ಗೌರವಕ್ಕೆ ಪಾತ್ರವಾಗಿದೆ.

ಏಕ್ ಅನೇಕ್ ಏಕ್ತಾ ಚಿತ್ರದ 'ಏಕ್ ಚಿಡಿಯಾ, ಅನೇಕ್ ಚಿಡಿಯಾನ್' ಎಂಬ ಹಾಡು ತುಂಬ ಜನಪ್ರಿಯವಾಗಿತ್ತು. ನಾ, ಏಕ್ ದೋ, ಮುನ್ನಿ, ಫ್ರೀಡಂ ಈಸ್ ಎ ಥಿನ್ ಲೈನ್, ಕಹಾನಿ ಹರ್ ಝಮಾನೇ ಕಿ ಮತ್ತು ಬಿಝಿನೆಸ್ ಈಸ್ ಪೀಪಲ್ ಎಂಬ ಹಲವಾರು ಆ್ಯನಿಮೇಷನ್ ಚಿತ್ರಗಳನ್ನು ನಿರ್ಮಿಸಿ, ನಿರ್ದೇಶಿಸಿದ್ದಾರೆ.

ಅಮೋಲ್ ಪಾಟೇಕರ್ ಮತ್ತು ಝರೀನಾ ವಹಬ್ ಮುಖ್ಯಭೂಮಿಕೆಯಲ್ಲಿರುವ ಘರೋಂಡಾ ಸಿನಿಮಾ ಮೂಲಕ ಸಿನಿಮಾ ನಿರ್ದೇಶಕ್ಕೂ ಅಡಿಯಿಟ್ಟರು. ಇದು 70ರ ದಶಕದ ಅತ್ಯಂತ ಜನಪ್ರಿಯ ಚಿತ್ರಗಳಲ್ಲಿ ಒಂದಾಗಿದೆ. ದೂರಿಯಾನ್, ತುಮ್ ಲೌಟ್ ಆವೋ ಅವರ ನಿರ್ದೇಶದ ಯಶಸ್ವಿ ಚಿತ್ರಗಳು. ಇವೆಲ್ಲವುಗಳ ಜತೆಗೆ ಹಲವಾರು ಸಾಕ್ಷ್ಯಚಿತ್ರಗಳನ್ನೂ ನಿರ್ಮಿಸಿದ್ದಾರೆ. 1991ರ 'ಲೋಕ್ ಗಾಥಾ' ನಮ್ಮ ದೇಶದ ಮೊದಲ ಕಂಪ್ಯೂಟರ್ ಸಹಾಯದಿಂದ ಸೃಷ್ಟಿಸಿದ ಆ್ಯನಿಮೇಷನ್ ಸರಣಿ.