ಜಸ್ಟಿನ್‌ ಕಾರ್ಯಕ್ರಮಕ್ಕೆ ಸಲ್ಲು, ಶಾರೂಖ್ ಪೈಪೋಟಿ

ಭಾರತದಲ್ಲಿ ಮೇ. 10ಕ್ಕೆ ಸಂಗೀತ ಕಾರ್ಯಕ್ರಮ ನೀಡಲು ಪಾಪ್ ತಾರೆ ಜಸ್ಟಿನ್‌ ಬೀಬರ್‌ ಮೇ 8ಕ್ಕೆ ಭಾರತಕ್ಕೆ ಬರುತ್ತಿದ್ದಾರೆ. ಈ ತಾರೆಯನ್ನು ಸ್ವಾಗತಿಸಲು ಸಕಲ ಸಿದ್ಧತೆಗಳು ನಡೆಯುತ್ತಿದ್ದು, ತಮ್ಮ ನೆಚ್ಚಿನ ಗಾಯಕ ಹಾಡನ್ನು ಖುದ್ದಾಗಿ ಕೇಳುವ ಕ್ಷಣಕ್ಕಾಗಿ ಕಾತರದಿಂದ ಕಾಯುತ್ತಿದ್ದರೆ ಜಸ್ಟಿನ್‌ ಅಭಿಮಾನಿಗಳು.

ಆದರೆ ಜಸ್ಟಿನ್‌ ಕಾರ್ಯಕ್ರಮವನ್ನು ಯಾರು ನಿರೂಪಣೆ ಮಾಡುತ್ತಾರೆ ಎಂದು ಇನ್ನೂ ತೀರ್ಮಾನವಾಗಿಲ್ಲ, ಇದಕ್ಕೆ ಬಾಲಿವುಡ್‌ನ ಬದ್ಧ ವೈರಿಗಳಾದ ಸಲ್ಮಾನ್‌ ಹಾಗೂ ಶಾರೂಖ್‌ ಹೆಸರು ಕೇಳಿ ಬರುತ್ತಿದ್ದು, ಇಲ್ಲಿಯೂ ಇಬ್ಬರ ನಡುವೆ ಪೈಪೋಟಿ ಏರ್ಪಟ್ಟಿದೆ. ಮತ್ತೊಂದು ಮೂಲದ ಪ್ರಕಾರ ಉದ್ಯಮಿ ಮುಖೇಶ್‌ ಅಂಬಾನಿ ಹೆಸರು ಕೂಡ ಕೇಳಿ ಬರುತ್ತದೆ.

ಈ ಕಾರ್ಯಕ್ರಮ ಈ ಇಬ್ಬರ ನಟರ ನಡುವೆ ಮಾತ್ರವಲ್ಲ ಎರಡು ತೆರೆ ಕಾಣಲಿರುವ ಹಾಫ್ ಗರ್ಲ್‌ ಫ್ರೆಂಡ್ ಮತ್ತು ಮೇರಿ ಪ್ಯಾರಿ ಬಿಂದು ಈ ಎರಡು ಚಿತ್ರಗಳ ನಡುವೆ ಕಿತ್ತಾಟಕ್ಕೂ ಕಾರಣವಾಗಿದೆ.

ಈ ಎರಡೂ ಚಿತ್ರದ ತಂಡದವರೂ ಜಸ್ಟೀನ್‌ ಸ್ಟೇಜ್‌ ಆಕ್ರಮಿಸುವ ಮುನ್ನ ತಮ್ಮ ಚಿತ್ರದ ಪ್ರಮೋಷನ್ ಅನ್ನು ಎಕ್ಸ್‌ಕ್ಲೂಸಿವ್‌ ಆಗಿ ಮಾಡಲು ಆಲೋಚಿಸುತ್ತಿದ್ದಾರೆ. ಆದರೆ ಈ ಕುರಿತು ಇದುವರೆಗೆ ಯಾವುದೇ ನಿರ್ಧಾರವನ್ನು ಆಯೋಜಕರು ಪ್ರಕಟಿಸಿಲ್ಲ.

ಈ ಕಾರ್ಯಕ್ರಮದಲ್ಲಿ ಸೆಲೆಬ್ರಿಟಿಗಳನ್ನು ಜಾಕ್ವಲಿನ್‌ ಫರ್ನಾಂಡಿಸ್‌ ಸ್ವಾಗತಿಸಲಿದ್ದು, ಅಭಿಷೇಕ್‌ ಬಚ್ಚನ್, ಐಶ್ವರ್ಯ ರೈ ಬಚ್ಚನ್, ದೀಪಿಕಾ ಪಡುಕೋಣೆ, ರಣವೀರ್‌ ಸಿಂಗ್‌, ಗೌರಿ ಖಾನ್, ಮನೀಶ್‌ ಮಲ್ಹೋತ್ರ, ಕಂಗನಾ ರಣಾವತ್‌ ಆಗಮಿಸಲಿದ್ದಾರೆ.

ಜಸ್ಟಿನ್‌ ಸಂಗೀತ ಕಾರ್ಯಕ್ರಮದ ಟಿಕೆಟ್‌ ದರ ಅಧಿಕವಿದ್ದರೂ ಟಿಕೆಟ್‌ಗಳು ಹಾಟ್‌ ಕೇಕ್‌ನಂತೆ ಸೇಲ್‌ ಆಗಿವೆ.