ಮಾಜಿ ಬಾಯ್‌ಫ್ರೆಂಡ್‌ಗೆ ಬೈಗುಳ ಗಿಫ್ಟ್‌ ನೀಡಿದ ಬಿಪಾಶಾ

ಬಾಲಿವುಡ್‌ ಅಂಗಳದಲ್ಲಿ ಹೆಚ್ಚು ಸುದ್ದಿ ಮಾಡಿದ ಪ್ರಣಯ ಪಕ್ಷಿಗಳೆಂದರೆ ಅದು ಜಾನ್‌ ಅಬ್ರಾಹಂ ಮತ್ತು ಬಿಪಾಶಾ ಬಸು. ಸರಿಸುಮಾರು 10 ವರ್ಷಗಳ ಕಾಲ ಲವ್ವು-ಗಿವ್ವು ಅಂತ ಬೀದಿ ಸುತ್ತಿದ ಈ ಜೋಡಿ ನಂತರದ ದಿನಗಳಲ್ಲಿ ಇವರಿಬ್ಬರ ನಡುವೆ ಬಿರುಕು ಉಂಟಾಗಿದ್ದು ದೊಡ್ಡ ಸುದ್ದಿಯೇ ಆಯಿತು.

ಕೆಲವರ ಪ್ರಕಾರ ಪ್ರಿಯಾ ಜತೆ ಮದುವೆಯಾಗುವ ಸಂಬಂಧ ಬಿಪಾಶಾಗೆ ಕೋಕ್‌ ನೀಡಿದರಂತೆ ಜಾನ್‌ ಅಬ್ರಾಹಂ. ಇದಾದ ಮೇಲೆ ಬಿಪಾಶಾ ಬಸು ಸಹ ಕಿರುತೆರೆಯ ಖ್ಯಾತ ನಟ ಕರಣ್‌ ಸಿಂಗ್‌ ಗ್ರೋವರ್‌ ಜತೆ ಸಪ್ತಪದಿ ತುಳಿದು ಸುಖಕರ ದಾಂಪತ್ಯ ನಡೆಸುತ್ತಿದ್ದಾರೆ. ಆದರೆ ಗತಿಸಿದ ದಿನಗಳನ್ನು ಬಿಪ್ಸ್‌ ಮರೆತಂತಿಲ್ಲ. ಜಾನ್‌ ಬಗ್ಗೆ ದ್ವೇಷ ಹೊಂದಿರುವ ಕಪ್ಪು ಸುಂದರಿ, ಸಂದರ್ಶನವೊಂದರಲ್ಲಿ ಮಾಜಿ ಬಾಯ್‌ಫ್ರೆಂಡ್‌ಗೆ ಅವಾಚ್ಯ ಶಬ್ದದಿಂದ ನಿಂದಿಸಿದ್ದಾರೆ.

ಮಾಧ್ಯಮವೊಂದರ ಸಂದರ್ಶನದಲ್ಲಿ ಪಾಲ್ಗೊಂಡಿದ್ದ ಬಿಪಾಶಾಗೆ, 'ನಿಮ್ಮ ಮಾಜಿ ಬಾಯ್‌ಫ್ರೆಂಡ್‌ ಜತೆ ಮತ್ತೊಮ್ಮೆ ಸ್ನೇಹ ಸಂಬಂಧ ಏರ್ಪಡುವ ಸಾಧ್ಯತೆ ಇದೆಯಾ?' ಎಂಬ ಪ್ರಶ್ನೆಯನ್ನು ಕೇಳಲಾಯಿತು. ಇದಕ್ಕೆ ಖಾರವಾಗಿ ಪ್ರತಿಕ್ರಿಯಿಸಿದ ಬಿಪಾಶಾ, 'ಒಂದು ವೇಳೆ ಅವನು ಒಳ್ಳೆಯ ವ್ಯಕ್ತಿ ಆಗಿದ್ದರೆ ಅದು ಸಾಧ್ಯವಾಗುತ್ತಿತ್ತು' ಎಂದು ಹೇಳುತ್ತ ಅವಾಚ್ಯ ಪದವನ್ನು ಬಳಸಿದ್ದಾರೆ. ಆದರೆ ಅವರು ಸಂದರ್ಶನದಲ್ಲಿ ಜಾನ್‌ ಅಬ್ರಾಹಂ ಹೆಸರನ್ನು ಮಾತ್ರ ತಪ್ಪಿಯೂ ಬಳಸಲಿಲ್ಲ.

ಜಾನ್‌ಗೂ ಮೊದಲು ಬಾಲಿವುಡ್‌ ನಟ ಡಿನೋ ಮೋರಿಯಾ ಜತೆ ರಿಲೇಶನಷಿಪ್‌ನಲ್ಲಿದ್ದರು. ಸದ್ಯಕ್ಕೆ ಬಿಪಾಶಾ ಮತ್ತು ಡಿನೋ ಮಧ್ಯೆ ಉತ್ತಮ ಸ್ನೇಹವಿದೆ. ಬಿಪಾಶಾ ಬೈಗುಳ ಬಳಸಿದ್ದು ಜಾನ್‌ಗೇ ಎಂದು ಬಾಲಿವುಡ್‌ ಪಂಡಿತರು ಹೇಳುತ್ತಿದ್ದಾರೆ.