ವಿಶ್ವದಲ್ಲೆಲ್ಲ ಸಖತ್ ಸೌಂಡ್ ಮಾಡುತ್ತಿರುವ ದೀಪಿಕಾ ಪಡುಕೋಣೆ

ಬಾಲಿವುಡ್ ನಟಿ ದೀಪಿಕಾ ಪಡುಕೊಣೆ ಮದುವೆ ಆದ ಮೇಲೂ ಕೂಡ ಸಖತ್ ಮಿಂಚುತ್ತಲೇ ಇದ್ದಾರೆ. ಮದುವೆಗೂ ಮೊದಲು ಅವರು ಬಾಲಿವುಡ್ ಆಳುತ್ತಿರುವ ಟಾಪ್ ನಾಯಕಿಯರಲ್ಲಿ ಒಬ್ಬರು ಎನ್ನುವುದು ಎಲ್ಲರಿಗೂ ಗೊತ್ತು. ಆದರೆ, ನಟ ರಣ್‌ವೀರ್ ಸಿಂಗ್ ಅವರನ್ನು ಮದುವೆ ಮಾಡಿಕೊಂಡ ಮೇಲೆ ಸಹಜವಾಗಿ ದೀಪಿಕಾ ತೆರೆಮರೆಗೆ ಸರಿಯಬಹುದು ಎಂದುಕೊಂಡವರೇ ಹೆಚ್ಚು. ಆದರೆ, ಬಹಳಷ್ಟು ಜನರ ಅನಿಸಿಕೆಯನ್ನು ನಟಿ ದೀಪಿಕಾ ಪಡುಕೋಣೆ ಅವರು ಸುಳ್ಳು ಮಾಡಿದ್ದಾರೆ. ಈಗಲೂ ನಟಿ ದೀಪಿಕಾ ಅವರು ಮೊದಲಿನ ಬೇಡಿಕೆಯನ್ನೇ ಉಳಿಸಿಕೊಂಡಿದ್ದಾರೆ ಎನ್ನಬಹುದು.

ಇತ್ತೀಚಿಗಷ್ಟೇ ಹಾಡಲಿವುಡ್ ಸಿನಿಮಾ ಶೂಟಿಂಗ್‌ಗೆಂದು, ಪತಿ ರಣ್‌ವೀರ್ ಜೊತೆಗೆ ಲಂಡನ್ ಹೋಗಿರುವ ನಟಿ ದೀಪಿಕಾ ಅವರು, ಅಲ್ಲಿ ತಮ್ಮದೇ ಮೇಣದ ಪ್ರತಿಮೆ ಮುಂದೆ ನಿಂತು ಫೋಟೋ ತೆಗೆಸಿಕೊಂಡಿದ್ದಾರೆ. ಅಷ್ಟೇ ಅಲ್ಲ, ಅಲ್ಲಿ ತಮ್ಮ ಮೇಣದ ಪ್ರತಿಮೆ ಮುಂದೆ ಗಂಡನೊಟ್ಟಿಗೆ ನಿಂತು ಬಹಳಷ್ಟು ಫೋಟೋಗಳನ್ನು ಕೂಡ ತೆಗೆದುಕೊಂಡಿದ್ದಾರೆ. ಅಲ್ಲಿ ನಿಂತು ನಕ್ಕು-ನಲಿದು ಖುಷಿ ಅನುಭವಿಸಿರುವ ದೀಪಿಕಾ ಅವರು "ನನ್ನದೇ ಪ್ರತಿಮೆ ಮುಂದೆ ನಿಂತು ನಾನು ಧನ್ಯತಾ ಭಾವ ಅನುಸರಿಸಿದೆ. ನನಗನಿಸುವ ಮಟ್ಟಿಗೆ, ಸೆಲೆಬ್ರೆಟಿಗಳಾದ ನಾವು ನಮ್ಮ ಅಭಿಮಾನಿಗಳಿಗೆ ಕೊಡಬಹುದಾದ ಬಹುದೊಡ್ಡ ಕಾಣಿಕೆ ಇದು" ಎಂದಿದ್ದಾರೆ ನಟಿ ದೀಪಿಕಾ ಪಡುಕೋಣೆ.

ದೀಪಿಕಾ ಅವರ ವಿಶ್ವವ್ಯಾಪಿ ಪ್ರಸಿದ್ಧಿ ಇಷ್ಟಕ್ಕೇ ಸೀಮಿತವಾಗಿಲ್ಲ. ಕಾರಣ, ತಮ್ಮ ಮೇಣದ ಪ್ರತಿಮೆಯ ಜೊತೆಗಿನ ಫೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಫೋಸ್ಟ್ ಮಾಡಿರುವ ದೀಪಿಕಾ ಅವರು, ಅಷ್ಟಕ್ಕೇ ಸುಮ್ಮನಾಗಿಲ್ಲ. ಬದಲಿಗೆ, ಯುಎಸ್‌ಎ ವೋಗ್‌ನ 'ಗ್ಲೋಬಲ್ ಟ್ಯಾಲೆಂಟ್' ಎನ್ನುವ ಮ್ಯಾಗಜಿನ್ ಒಂದರ ಕವರ್ ಫೋಟೋದಲ್ಲಿ ಅವರು 'ಎವೆಂಜರ್ಸ್ ಎಂಡ್‌ಗೇಮ್ ಖ್ಯಾತಿಯ ನಟಿ ಸ್ಕಾರ್ಲೆಟ್ ಜೊಹಾನ್ಸ್‌ನ್ ಮತ್ತು ಸೌತ್ ಕೋರಿಯನ್ ಸೆನ್ಸೇಷನಲ್ ನಟಿ ಬೈ ಡೋನಾ ಅವರೊಂದಿಗೆ ನಿಂತಿರುವ ಫೋಟೋವನ್ನು ಕೂಡ ಸಾಮಾಜಿಕ ಜಾಲತಾಣದ ಮೂಲಕ ಪೋಸ್ಟ್ ಮಾಡಿದ್ದಾರೆ. ಈ ಮ್ಯಾಗಜಿನ್ 14 ದೇಶಗಳ ಸೂಪರ್ ಸ್ಟಾರ್ಸ್' ಎಂಬ ಟ್ಯಾಗ್‌ಲೈನ್ ಹಾಕಿಕೊಂಡಿದ್ದು, ಯಾವುದೋ ಚಿಕ್ಕಪುಟ್ಟ ಮ್ಯಾಗಜಿನ್ ಅಲ್ಲ ಎನ್ನಬಹುದು.

ಅದೇನೇ ಇರಲಿ, ನಟಿ ದೀಪಿಕಾ ಅವರ ಪ್ರಸಿದ್ಧಿ ಭಾರತದ ಗಡಿ ದಾಟಿ ಯಾವುದೋ ಕಾಲವಾಗಿದೆ. ಅವರು, ಹಾಲಿವುಡ್ ಸಿನಿಮಾದಲ್ಲಿ ನಟಿಸಲು ಪ್ರಾರಂಭಿಸಿದ್ದಾರೆ. ಮೇಣದ ಪ್ರತಿಮೆ ಮೂಲಕವೂ ದೀಪಿಕಾ ಅವರು ಜಗತ್ತಿನ ಗಮನವನ್ನು ತಮ್ಮ ಕಡೆಗೆ ಸೆಳೆಯುತ್ತಿದ್ದಾರೆ. ಇತ್ತೀಚಿಗಷ್ಟೆ 'ರಾಝಿ' ಖ್ಯಾತಿಯ ನಿರ್ದೇಶಕಿ ಮೇಘನಾ ಗುಲ್ಜಾರ್ ಅವರ ನಿರ್ದೇಶನದ ಮುಂಬರುವ ಚಿತ್ರ "ಚಪ್ಪಾಕ್'ನಲ್ಲಿ ನಟಿಸುತ್ತಿದ್ದಾರೆ.