ರಾಣಿಗೆ ಎರಡನೇ ಮಗುವಿನ ಬಯಕೆ?

ತುಂಬಾ ದಿನಗಳ ನಂತರ ಬಾಲಿವುಡ್‌ ನಟಿ ರಾಣಿ ಮುಖರ್ಜಿ ಹಿರಿತೆರೆಗೆ ಮರಳುತ್ತಿದ್ದಾರೆ. ಇಷ್ಟು ದಿನ ಮಗುವಿನ ಆರೈಕೆ ಹಾಗೂ ಕುಟುಂಬ ನಿರ್ವಹಣೆಯಲ್ಲಿ ಬ್ಯುಸಿಯಾಗಿದ್ದ ರಾಣಿ, 'ಹಿಚ್ಕಿ' ಚಿತ್ರದ ಮೂಲಕ ಬಾಲಿವುಡ್‌ಗೆ ಮರಳುತ್ತಿದ್ದಾರೆ.

ಈ ಸಂಬಂಧ ಮಾಧ್ಯಮವೊಂದರ ಸಂದರ್ಶನದಲ್ಲಿ ಪಾಲ್ಗೊಂಡ ರಾಣಿ, ಪತಿ ಆದಿತ್ಯ ಚೋಪ್ರಾ, ಮಗಳು ಅದಿರಾ ಹಾಗೂ ಸಿನಿ ಕರಿಯರ್‌ ಬಗ್ಗೆ ಒಂದಿಷ್ಟು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ರಾಣಿ ಮುಖರ್ಜಿ ಪತಿ ಆದಿತ್ಯ ಚೋಪ್ರಾ ಬಾಲಿವುಡ್‌ನ ಖ್ಯಾತ ನಿರ್ದೇಶಕ ಹಾಗೂ ನಿರ್ಮಾಪಕರಲ್ಲಿ ಒಬ್ಬರು. ಇವರ ನಿರ್ದೇಶನ ಹಾಗೂ ನಿರ್ಮಾಣದಲ್ಲಿ ಮೂಡಿಬಂದ ಚಿತ್ರಗಳು ಗಲ್ಲಾಪೆಟ್ಟಿಗೆಯಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡಿರುವುದು ಸುಳ್ಳಲ್ಲ.

ಪತಿರಾಯ ಅಷ್ಟೆಲ್ಲ ಹೆಸರು ಮಾಡಿದ್ದರೂ ರಾಣಿ ಮಾತ್ರ ಸಿನಿಮಾ ವಿಚಾರವಾಗಿ ಅವರೊಡನೆ ಎಂದೂ ಚರ್ಚೆ ಮಾಡುವುದಿಲ್ಲವಂತೆ. 'ನಿಮ್ಮ ಚಿತ್ರಕ್ಕೆ ನನ್ನನ್ನು ಆಯ್ಕೆ ಮಾಡಿ' ಎಂದು ರಾಣಿ ಯಾವತ್ತೂ ಕೇಳಿಕೊಂಡಿಲ್ಲವಂತೆ. ಮುಂದೆಯೂ ಆ ಸಂದರ್ಭ ಬರುವುದಿಲ್ಲ ಎಂದಿದ್ದಾರೆ ರಾಣಿ.

'ನಾನು ಪತಿಯ ಜತೆ ಎರಡನೇ ಮಗುವಿನ ಬಗ್ಗೆ ಚರ್ಚಿಸುವೆ ಹೊರತು ಸಿನಿಮಾ ಬಗ್ಗೆ ಚರ್ಚಿಸುವುದಿಲ್ಲ. ಆದಿತ್ಯನ ಜತೆ ನನ್ನ ಮಾತುಕತೆ ಯಾವತ್ತಿಗೂ ಪ್ರೀತಿ ಹಾಗೂ ಮಗಳು ಅದಿರಾಗೆ ಸಂಬಂಧಿಸಿದ್ದಾಗಿರುತ್ತದೆ,' ಎಂದು ರಾಣಿ ಮುಖರ್ಜಿ ನೇರವಾಗಿ ಹೇಳಿದ್ದಾರೆ. ಒಟ್ಟಾರೆ ಅವರ ಈ ಮಾತಿನಿಂದ 'ರಾಣಿ ಮತ್ತೊಂದು ಮಗುವಿಗೆ ಪ್ಲ್ಯಾನ್‌ ನಡೆಸಿದ್ದಾರಾ?' ಎಂಬ ಚರ್ಚೆ ಬಾಲಿವುಡ್‌ ಅಂಗಳದಲ್ಲಿ ಜೋರಾಗಿ ನಡೆದಿದೆ.