ಚೀನಾದಲ್ಲಿ ಸೌಂಡ್ ಮಾಡುತ್ತಿರುವ ಶ್ರೀದೇವಿ ಕೊನೆಯ ಚಿತ್ರ 'ಮಾಮ್'

ಬಾಲಿವುಡ್ ಲೇಡಿ ಸೂಪರ್ ಸ್ಟಾರ್ ದಿಗಂಗತ ಶ್ರೀದೇವಿ ನಟನೆಯ ಕೊನೆ ಚಿತ್ರವಾದ 'ಮಾಮ್' ಚೀನಾದ್ಲಿ ಸಖತ್ ಸೌಂಡ್ ಮಾಡುತ್ತಿದೆ ಎನ್ನಲಾಗಿದೆ. ಈ ಚಿತ್ರವು ಇತ್ತೀಚೆಗೆ ಚೀನಾದಲ್ಲಿ ಬಿಡುಗಡೆಯಾಗಿದ್ದು, ಅಲ್ಲಿ ಚಿತ್ರವು ಭಾರಿ ಮೆಚ್ಚುಗೆ ಗಳಿಸಿದೆ ಎನ್ನಲಾಗಿದೆ. ಈವರೆಗೆ ಈ ಚಿತ್ರವು ಚೀನಾದಲ್ಲಿ 11.47 ಕೋಟಿ ರೂ. ಗಳಿಸಿದೆ ಎಂದು ಖ್ಯಾತ ಬಾಕ್ಸ್‌ ಆಫೀಸ್ ವಿಮರ್ಶಕ ತರಣ್ ಆದರ್ಶ್ ಅವರು ಟ್ವೀಟ್ ಮಾಡಿದ್ದಾರೆ.

ವಿಮರ್ಶಕ ತರಣ್ ಆದರ್ಶ್ ಅವರ ಟ್ವೀಟ್‌ಗೆ ಶ್ರೀದೇವಿ ಪತಿ ಬೋನಿ ಕಪೂರ್ ಅವರು ಸಂತೋಷ ವ್ಯಕ್ತಪಡಿಸಿದ್ದಾರೆ ಎನ್ನಲಾಗಿದೆ. ಜೊತೆಗೆ, "ಈಗ ಈ ಯಶಸ್ಸನ್ನು ನೋಡಲು ಶ್ರೀದೇವಿ ಇದ್ದಿದ್ದರೆ ತುಂಬಾ ಚೆನ್ನಾಗಿತ್ತು" ಎಂದು ಹೇಳಿದ್ದಾರೆ ಎನ್ನಲಾಗಿದೆ. ದಿವಂಗತ ನಟಿ ಶ್ರೀದೇವಿಯವರ ಕೊನೆಯ ಚಿತ್ರವು 'ಮಾಮ್' ಆಗಿದ್ದು, ಈ ಚಿತ್ರವು ಭಾರತದಲ್ಲಿ ಕೂಡ ಪ್ರೇಕ್ಷಕರ ಮತ್ತು ವಿಮರ್ಶಕರ ಮೆಚ್ಚುಗೆ ಗಳಿಸಿತ್ತು. ಜೊತೆಗೆ, ಬಾಕ್ಸ್ ಆಫೀಸ್‌ನಲ್ಲಿ ಕೂಡ ಒಳ್ಳೆಯ ಗಳಿಕೆ ಕಂಡಿತ್ತು.

ಕಳೆದ ವರ್ಷ ನಟಿ ಶ್ರೀದೇವಿ ಅವರು ದುರಂತ ಸಾವಿಗೆ ಈಡಾಗಿದ್ದು, ಸಿನಿಮಾರಂಗಕ್ಕೆ ಯುಂಬಲಾಗದ ನಷ್ಟವಾಗಿದೆ ಎಂಬ ಮಾತನ್ನು ಇಂದಿಗೂ ಎಲ್ಲರೂ ಹೇಳುತ್ತಿದ್ದಾರೆ. ಸೌತ್ ಇಂಡಿಯನ್ ಸಿನಿಮಾಗಳ ಮೂಲಕ ಚಿತ್ರರಂಗಕ್ಕೆ ಬಾಲಕಲಾವಿದೆಯಾಗಿ ಎಂಟ್ರಿ ಕೊಟ್ಟ ನಟಿ ಶ್ರೀದೇವಿ ಅವರು ಆ ಬಳಿಕ ಸೌತ್ ಇಂಡಿಯಾದಲ್ಲಿ ಯಶಸ್ವಿಯಾಗಿ ಮೆರೆದವರು. ನಂತರ, ಬಾಲಿವುಡ್ ಸಿನಿಮಾಗಳಲ್ಲಿ ನಟಿಸುತ್ತ ಬರೋಬ್ಬರಿ ದಶಕಕ್ಕೂ ಹೆಚ್ಚು ಕಾಲ ನಂ. 1 ಸ್ಥಾನದಲ್ಲಿ ನಿಂತು ಬಾಲಿವುಡ್‌ ಆಳಿದಂಥ ನಟಿ. ಅವರು ಸುಮಾರು 300ಕ್ಕೂ ಹೆಚ್ಚು ಸಿನಿಮಾಗಳಲ್ಇ ನಟಿಸಿ ಲೇಡಿ ಸೂಪರ್ ಸ್ಟಾರ್ ಪಟ್ಟ ಗಿಟ್ಟಿಸಿಕೊಂಡ ನಟಿ.

ಒಟ್ಟಿನಲ್ಲಿ, ಇದೀಗ ಶ್ರೀದೇವಿ ನಟಿಸಿರುವ ಕೊನೆಯ ಚಿತ್ರ 'ಮಾಮ್' ಚೀನಾದಲ್ಲಿ ಸಖತ್ ಸೌಂಡ್ ಮಾಡುತ್ತಿದೆ. ಆದರೆ, ತಮ್ಮ ಚಿತ್ರದ ಯಶಸ್ಸನ್ನು ನೋಡಲು ನಟಿ ಶ್ರೀದೇವಿಯವರು ನಮ್ಮೊಂದಿಗಿಲ್ಲ.