ಆ ಸೈನಿಕ ನನ್ನ ಎದೆಯನ್ನೇ ಗುರಾಯಿಸುತ್ತಿದ್ದ: ವಿದ್ಯಾ ಬಾಲನ್‌

ಬಾಲಿವುಡ್‌ನ ಖ್ಯಾತ ನಟಿಯರಲ್ಲಿ ವಿದ್ಯಾ ಬಾಲನ್‌ ಕೂಡ ಒಬ್ಬರು. ಇವರು ಅಭಿನಯಿಸಿದ ಎಲ್ಲ ಚಿತ್ರಗಳು ಸೂಪರ್‌ ಹಿಟ್‌ ಸಾಲಿಗೆ ಸೇರದಿದ್ದರೂ ವಿದ್ಯಾ ಅಭಿನಯ ಮಾತ್ರ ಎಲ್ಲರ ಮನಸ್ಸಿನಲ್ಲಿ ಉಳಿದು ಬಿಡುತ್ತದೆ. ಅಂತಹ ಪಾತ್ರಗಳ ಮೂಲಕ ವಿದ್ಯಾ ಬಿಟೌನ್‌ ಜಗತ್ತನ್ನೂ ಆಳುತ್ತಿದ್ದಾರೆ ಎಂದರೆ ಅದು ಅತಿಶಯೋಕ್ತಿ ಅಲ್ಲ.

ಇತ್ತೀಚೆಗೆ ನಡೆದ ಒಂದು ಸಂದರ್ಶನದಲ್ಲಿ ಹೆಣ್ಣಿನ ಮೇಲಿನ ಲೈಂಗಿಕ ದೌರ್ಜನ್ಯದ ಬಗ್ಗೆ ಮಾತನಾಡಿರುವ ವಿದ್ಯಾ, ತಮ್ಮ ಜೀವನದಲ್ಲಿ ಗತಿಸಿದ ಒಂದು ಘಟನೆಯನ್ನು ಬಿಚ್ಚಿಟ್ಟಿದ್ದಾರೆ. ದೇಶವನ್ನು ಕಾಯುವ ಸೈನಿಕನೋಬ್ಬ ತಮ್ಮನ್ನು ಕೆಟ್ಟ ದೃಷ್ಟಿಯಿಂದ ನೋಡುತ್ತಿದ್ದ ಎಂದು ಹೇಳುವ ಮೂಲಕ ಚರ್ಚೆಗೆ ಗ್ರಾಸರಾಗಿದ್ದಾರೆ.

ಅದು ವಿದ್ಯಾ ಕಾಲೇಜು ದಿನಗಳ ಕಥೆಯಂತೆ. ಆ ದಿನಗಳಲ್ಲಿ ವಿದ್ಯಾ ಮುಂಬಯಿ ಲೋಕಲ್‌ ಟ್ರೇನ್‌ ಮೂಲಕ ಚೆಂಬುರ್‌ ನಿಲ್ದಾಣದಿಂದ ವಿಟಿ ಸ್ಟೇಷನ್‌ವರೆಗೂ ಹೋಗಬೇಕಿತ್ತು. ಒಮ್ಮೆ ವಿಟಿ ಸ್ಟೇಷನ್‌ನಲ್ಲಿ ನಿಂತಾಗ ಸೈನಿಕನೊಬ್ಬ ವಿದ್ಯಾರ ಎದೆಯನ್ನು ಗುರಾಯಿಸುತ್ತಿದ್ದನಂತೆ. ಅಷ್ಟೇ ಅಲ್ಲದೆ ಕಣ್ಣು ಹೊಡೆದು, ಕೆಟ್ಟ ಸನ್ನೆ ಮಾಡಿದ ಎಂದೂ ವಿದ್ಯಾ ಬಹಿರಂಗಪಡಿಸಿದ್ದಾರೆ. ಸೈನಿಕನ ಈ ವರ್ತನೆಯಿಂದ ಕೋಪಗೊಂಡ ಅವರು ಸೈನಿಕನನ್ನು ತರಾಟೆಗೆ ತೆಗೆದುಕೊಂಡರಂತೆ.

'ದೇಶವನ್ನು ರಕ್ಷಿಸುವ ಸೈನಿಕನಾಗಿರುವ ನೀನು, ಒಂದು ಹೆಣ್ಣನ್ನು ಕೆಟ್ಟ ದೃಷ್ಟಿಯಿಂದ ನೋಡುವುದು ಎಷ್ಟು ಸರಿ?' ಎಂದು ಪ್ರಶ್ನಿಸಿ, ಸೈನಿಕನ ಬೆವರಿಳಿಸಿದ್ದಾಗಿ ಹೇಳಿ ಕೊಂಡಿದ್ದಾರೆ. ಕೆಲವರು ಹೆಣ್ಣಿನ ಮೇಲೆ ತಮ್ಮ ದೃಷ್ಟಿಯಿಂದಲೇ ಲೈಂಗಿಕ ದೌರ್ಜನ್ಯ ನಡೆಸುತ್ತಾರೆ ಎಂದು ಹೇಳುವ ವಿದ್ಯಾ, ಇಂತಹ ಸಂದರ್ಭಗಳಲ್ಲಿ ಹೆಣ್ಣು ಸುಮ್ಮನಿರಬಾರದು ಎಂದು ಖಡಕ್ಕಾಗಿ ಸಲಹೆ ನೀಡಿದ್ದಾರೆ. ಇನ್ನು ಸಿನಿಮಾ ವಿಷಯಕ್ಕೆ ಬರುವುದಾದರೆ ವಿದ್ಯಾ ಅಭಿನಯದ 'ತುಮ್ಹಾರಿ ಸುಲು' ಚಿತ್ರ ಸದ್ಯದಲ್ಲೇ ಬಿಡುಗಡೆಯಾಗಲಿದೆ.