ಇವರದು ಮ್ಯಾರೇಜ್‌ ಆದ್ಮೇಲೆ ಲವ್‌

ಈಗಿನ ಸಾಕಷ್ಟು ಯುವಜನತೆ ಅರೆಂಜ್‌ ಮ್ಯಾರೇಜ್‌ ಎಂಬ ಪದವನ್ನು ಕೇಳಿದರೆ ಸಾಕು ದೂರ ಓಡ್ತಾರೆ. ಅದರಲ್ಲೂ ಬಾಲಿವುಡ್‌ ಸೆಲೆಬ್ರಿಟಿಗಳು ಮನೆಯವರು ನೋಡಿದ ವಧು/ವರನನ್ನ ಮದುವೆ ಆಗ್ತಾರೆ ಅಂದ್ರೆ ಅದು ದೊಡ್ಡ ಸುದ್ದಿಯೇ.

ಏಕೆಂದರೆ ಬಾಲಿವುಡ್‌ ಅಂಗಳದಲ್ಲಿ ದಿನಕ್ಕೊಂದು ಹೊಸ ಜೋಡಿಗಳು ಹುಟ್ಟಿಕೊಳ್ಳುತ್ತವೆ, ಹಾಗೂ ದಿನಕ್ಕೊಂದು ಸಂಬಂಧ ಮುರಿದು ಬೀಳುತ್ತದೆ. ದಾಂಪತ್ಯ ಜೀವನ ಸುಖಕರವಾಗಿರಲು ಲವ್‌ ಮ್ಯಾರೇಜ್‌ ಉತ್ತಮ ಎನ್ನುವ ಜನರೂ ಇದ್ದಾರೆ. ಆದರೆ ಕೆಲ ಬಾಲಿವುಡ್‌ ಸೆಲೆಬ್ರಿಟಿಗಳು ಅರೆಂಜ್‌ ಮ್ಯಾರೇಜ್‌ ಆಗಿ ನಂತರ ತಮ್ಮ ಬಾಳಸಂಗಾತಿಯನ್ನ ಲವ್‌ ಮಾಡುತ್ತಿದ್ದಾರೆ. ಮದುವೆಗೂ ಮುಂಚೆ ಲವ್‌ ಮಾಡದೇ ಮದುವೆಯ ನಂತರ ಲವ್‌ನಲ್ಲಿ ಬಿದ್ದಿರೋ ಬಾಲಿವುಡ್‌ ಸೆಲೆಬ್ರಿಟಿಗಳ ಬಗ್ಗೆ ನಾವು ಹೇಳ್ತಿವಿ.

ಶಾಹಿದ್‌ ಕಪೂರ್‌:

ಅರೆಂಜ್‌ ಮ್ಯಾರೇಜ್‌ ಆಗುವ ಮೂಲಕ ಎಲ್ಲರಿಗೂ ಶಾಕ್‌ ನೀಡಿದ ಬಾಲಿವುಡ್‌ ನಟ ಶಾಹಿದ್‌. ದಿಲ್ಲಿ ಮೂಲದ ಮೀರಾ ರಜಪೂತ್‌ರ ಕೈಹಿಡಿದ ಶಾಹಿದ್‌, ಈಗ ಸುಖ ದಾಂಪತ್ಯ ಜೀವನವನ್ನು ನಡೆಸುತ್ತಿದ್ದಾರೆ. ಇಲ್ಲಿ ಮತ್ತೊಂದು ವಿಶೇಷತೆ ಈ ಶಾಹಿದ್‌ ಕೈಹಿಡಿಯುವ ಮುನ್ನ ಮೀರಾಗೆ ಬಾಲಿವುಡ್‌ ಜತೆ ಯಾವ ನಂಟೂ ಇರಲಿಲ್ಲ. ಇತ್ತೀಚೆಗಷ್ಟೇ ಈ ದಂಪತಿಗೆ ಮುದ್ದಾದ ಹೆಣ್ಣುಮಗು ಜನಿಸಿದ್ದು ನಿಮಗೆಲ್ಲ ಗೊತ್ತಿರುವ ವಿಚಾರವೇ.

ನೀಲ್‌ ನಿತಿನ್‌ ಮುಕೆಶ್‌:

'ಜಾನಿ ಗದ್ದಾರ್‌' ಚಿತ್ರದ ನಟ ಕೂಡ ಲವ್‌ ಮ್ಯಾರೇಜ್‌ ಹಾದಿ ತುಳಿಯದೆ ಅರೆಂಜ್‌ ಮ್ಯಾರೇಜ್‌ ಆಗುತ್ತಿದ್ದಾರೆ. ಇದೆ ಫೆಬ್ರವರಿ 9ರಂದು ರುಕ್ಮಿಣಿ ಸಹಾಯ್‌ ಜತೆ ಸಪ್ತಪದಿ ತುಳಿಯಲಿದ್ದಾರೆ ನೀಲ್‌.

ಮಾಧುರಿ ದೀಕ್ಷಿತ್‌:

ಧಕ್‌ ಧಕ್‌ ಗರ್ಲ್‌ ಮಾಧುರಿ ದೀಕ್ಷತ್‌ ಮದುವೆ ವಿಚಾರ ಆಗಿನ ಕಾಲದಲ್ಲಿ ತುಂಬ ಸುದ್ದಿಯಾಗಿತ್ತು. ಬಾಲಿವುಡ್‌ನ ಫೇಮಸ್‌ ನಟಿ ಸೆಲೆಬ್ರಿಟಿ ಅಲ್ಲದ ವರನನ್ನು ವರಿಸಿದ್ದು ಕುತೂಹಲ ಮೂಡಿಸಿತ್ತು. ಡಾ. ಶ್ರೀರಾಮ್‌ ನೇನೆಯವರ ಜತೆ ಸಪ್ತಪದಿ ತುಳಿದ ಮಾಧುರಿ ಕೆಲ ವರ್ಷಗಳ ಕಾಲ ಅಮೆರಿಕದಲ್ಲಿಯೇ ತಂಗಿದ್ದರು. ಈ ದಂಪತಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ.

ವಿವೇಕ್‌ ಒಬೆರಾಯ್‌:

'ಸಾಥಿಯಾ' ಚಿತ್ರದ ನಟ ಪ್ರಾರಂಭದ ದಿನಗಳಲ್ಲಿ ಐಶ್ವರ್ಯ ರೈ ಜತೆಗಿನ ರಿಲೇಶನಷಿಪ್‌ನಿಂದಾಗಿ ಸುದ್ದಿಯಾಗಿದ್ದರು. ನಂತರ ಸಲ್ಮಾನ್‌ ಖಾನ್‌ರ ಕೆಂಗಣ್ಣಿಗೆ ಗುರಿಯಾದ ವಿವೇಕ್‌, ಸೆಲೆಬ್ರಿಟಿ ಅಲ್ಲದ ಪ್ರಿಯಾಂಕ ಆಳ್ವಾರನ್ನ ಮದುವೆಯಾದರು. 7 ವರ್ಷಗಳಿಂದ ಸುಖಕರ ದಾಂಪತ್ಯ ನಡೆಸುತ್ತಿರುವ ಈ ಜೋಡಿಗೆ ಇಬ್ಬರು ಮುದ್ದಾದ ಮಕ್ಕಳಿದ್ದಾರೆ.