ಆರ್ಟಿಕಲ್‌ 370 ಟೈಟಲ್‌ಗೆ ಮುಗಿಬಿದ್ದ ನಿರ್ಮಾಪಕರು

ಜಮ್ಮು ಕಾಶ್ಮೀರದಲ್ಲಿ370ನೇ ವಿಧಿ ಮತ್ತು 35ಎ ವಿಧಿ ರದ್ದುಗೊಂಡ ಬೆನ್ನಲ್ಲೇ ಆರ್ಟಿಕಲ್‌ 370 ಮತ್ತು ಆರ್ಟಿಕಲ್‌ 35ಎ ಟೈಟಲ್‌ಗಳಲ್ಲಿಸಿನಿಮಾ ನಿರ್ಮಿಸಲು ಬಾಲಿವುಡ್‌ ನಿರ್ಮಾಪಕರು ಮುಂದಾಗಿದ್ದಾರೆ.

ಕಳೆದೆರಡು ದಿನಗಳಿಂದ ಸುಮಾರು 20ರಿಂದ 30 ನಿರ್ಮಾಪಕರು ಈ ಟೈಟಲ್‌ಗಳನ್ನು ರಿಜಿಸ್ಟರ್‌ ಮಾಡಲು ಮುಗಿಬಿದ್ದಿದ್ದಾರೆಂದು ಗೊತ್ತಾಗಿದೆ. ಈ ಟೈಟಲ್‌ಗಳ ಹಕ್ಕು ಕೇಳಿ ಈಗಾಗಲೇ ಅನೇಕ ನಿರ್ಮಾಪಕರು ಭಾರತೀಯ ಸಿನಿಮಾ ನಿರ್ಮಾಪಕರ ಸಂಘವನ್ನು ಸಂಪರ್ಕಿಸಿದ್ದಾರೆ ಎಂದು ವರದಿಯಾಗಿದೆ.

ಆರ್ಟಿಕಲ್‌ 370 ರದ್ದುಗೊಳಿಸುವ ಮುನ್ನವೇ ಈ ವಿಷಯದ ಕುರಿತು ಸಿನಿಮಾ ನಿರ್ಮಾಣಕ್ಕೆ ಮುಂದಾಗಿದ್ದ ನಿರ್ಮಾಪಕ ಆನಂದ್‌ ಪಂಡಿತ್‌, ಈಗಾಗಲೇ ಆರ್ಟಿಕಲ್‌ 370 ಮತ್ತು ಆರ್ಟಿಕಲ್‌ 35ಎ ಟೈಟಲ್‌ಗಳಿಗೆ ಹಕ್ಕು ಮಂಡಿಸಿದ್ದಾರೆ ಎಂದು ತಿಳಿದುಬಂದಿದೆ. ಮಾಜಿ ಪ್ರಧಾನಿ ಮನಮೋಹನ್‌ ಸಿಂಗ್‌ ಬಯೋಪಿಕ್‌ ನಿರ್ಮಿಸಿರುವ ಅವರು, ಕೇವಲ ಒಂದು ರಾಜ್ಯಕ್ಕೆ ಮಾತ್ರ ಈ ಸವಲತ್ತು ಯಾಕೆ ಎಂಬ ಬಗ್ಗೆ ನಾನು ಸಿನಿಮಾ ನಿರ್ಮಿಸಬೇಕು ಎಂದುಕೊಂಡಿದ್ದೆ. ಈಗ ಮೋದಿಯವರ ಐತಿಹಾಸಿಕ ನಿರ್ಧಾರದಿಂದಾಗಿ ನನ್ನ ಸಿನಿಮಾಗೆ ಪರ್ಫೆಕ್ಟ್ ಎಂಡಿಂಗ್‌ ಸಿಕ್ಕಂತಾಗಿದೆ ಎಂದಿದ್ದಾರೆ.

ಆರ್ಟಿಕಲ್‌ 370 ಮತ್ತು ಆರ್ಟಿಕಲ್‌ 35ಎ ಈಗ ಎಲ್ಲೆಡೆ ಚರ್ಚಿತ ವಿಷಯವಾಗಿರುವ ಕಾರಣ ಈ ಟೈಟಲ್‌ಗಳಲ್ಲಿಸಿನಿಮಾ ಮಾಡಿದರೆ ಜನರು ಖಂಡಿತಾ ನೋಡುತ್ತಾರೆ ಎಂಬ ಲೆಕ್ಕಾಚಾರ ಸಿನಿಮಾ ನಿರ್ಮಾಪಕರದ್ದಾಗಿದೆ. ಇವೆರಡು ಟೈಟಲ್‌ ಮಾತ್ರವಲ್ಲದೆ, ಕಾಶ್ಮೀರ್‌ ಹಮಾರ ಹೇ, ಧಾರ 370, ಧಾರ 35ಎ, ಕಾಶ್ಮೀರ್‌ ಮೆ ತಿರಂಗಾ, ಕಾಶ್ಮೀರ್‌ ಹಮಾರ ಹೇ, ಆರ್ಟಿಕಲ್‌ 370 ಸ್ಕ್ರಾಪ್‌ಡ್‌ ಎಂಬ ಟೈಟಲ್‌ಗಳಿಗೂ ಬೇಡಿಕೆ ವ್ಯಕ್ತವಾಗಿದೆ ಎಂದು ಸಿನಿಮಾ ನಿರ್ಮಾಪಕರ ಸಂಘ ತಿಳಿಸಿದೆ. ಆದರೆ ಈ ಕುರಿತು ಬಂದಿರುವ ಅರ್ಜಿಗಳಿಗೆ ಸಂಘ ಇನ್ನೂ ಒಪ್ಪಿಗೆ ನೀಡಿಲ್ಲ.